عمي أبختي حراميكم خوش حرامي و بهلوان بس احنه دماغ سزية!!

التفاصيل

تم إنشاءه بتاريخ الأربعاء, 08 نيسان/أبريل 2026 07:58

كتب بواسطة: جلال چرمگا

 عمي أبختي حراميكم خوش حرامي و بهلوان بس احنه دماغ سزية!!

ياجماعة الخير المؤمن مايصير يتقشمر مرة ومرتين واذا تكررت الحالة معناها الأخ لو قشمر لو أمسودن وما يعرف شكو ماكو بالدنيا وهذه حسب الأحاديث الشريفة ومنها:

«لا يُلدَغُ المؤمنُ من جُحْرٍ واحد مرتين».
وحتى وفق القوانين والأنظمة المعمل بيها:
" القانون لا يحمي المغفّلين"
انت بأرادتك سويت شغله وبعدين تنكر وتتندم و تصيح وصياحك يملأ الدنيا مايفيد .. روح بلط البحر!!.
أكو هواية بشر من اهلنا وناسنا يحلف بكل المقدسات أنه ما ينطي صوته للحرامية والفاسدين و الجواسيس وبعدين وكت الأنتخابات ولا كأنما حلف وعربت بأنه اصلا حتى يجوز ما يصوت ولكن : عادت حليمة لعادتها القديمة و گُبل لصدنوق الأنتخابات وأنطى صوته لنفس الشكولات الزفرة وأرتاح و ينتظر رحمة الله بلكن تفرج ... خوش تفرج من دبش!!.
والغريب أنه من تسأله يگول:
سمعت انهم تغيروا وراح يعدلون أنفسهم ويمشون عدل و بعد لا يسرقون ولا يكذبون ولا يتجسسون و يمشون عالمسطرة ومقتنع كودن قسم منهم معممين ونور الله بوجوههم ، لايشربون منكر ولا يدورون حرام وواحدم زار مدينة قم المقدسة مرات و مرات!!.
يا مغفل انت سامع ( ذيل الچلب يعدل)!!؟؟ .. مستحيل.
اذاً دأكلها وراحت فلوسك يا صابر ، لادينك ولا القوانين راح ترحمك كودن قمت بهذا العمل وبأراتك والسبب كونك مغفل وما تفتهم ولو مو عيب كان أنطيتك صفة اخرى .. يا أبو صابر!!.
مرة غلطت وعدتها ، فهنا لازم تتحمل نتيجة غلطتك و كان الله يحب المحسنين.

قصة حقيقية حدثت قبل لأعوام في بغداد:

يگوللك اكو حرامي سرق سيارة ابو علوان البرازيلي خطيه يشتغل بيها تكسي وصاحب عائلة وعيشته عليها !
اجت سنين وراحت سنين رجع الحرامي لصاحب السيارة؟
وكاله عمي اني السرقت سيارتك ..وجاي اعتذر منك وانه ندمان واريدك تسامحني !! وعلى عين سيارتك الله رزقني !وصار عندي املاك وفلوس وسيارات وخير من الله !..
وهسه جايك واريد اعوضك واشتريلك سيارة بدل سيارتك السرقتها ايام زمان من چنت فقير ..
گاله صاحبنه : عمي انت مبري الذمة !وما اريد منك كل شي روح الله وياك !ما دام انت ندمان وحسيت بروحك غلطان آنه مسامحك ..
الحرامي اصر على التعويض وكال لصاحبنه ابو علوان !
جيب المستمسكات وهسه تجي وياي للمعارض ؟واخذ السياره التعجبك واني ادفع فلوسها !!
صاحبنه من شاف الحرامي مصر على رأيه ومتحمس !!
ما گال باطل جاب مستمسكاته وراح وي الحرامي للمعارض! اجه يم السيارات الايرانيه يريد ياخذ سايبه ؟؟

الحرامي انزعج وگاله لا عمي الا اخذلك جكساره ! المهم اجه لصاحب المعرض وسأل عن السعر !
فأتفق وي صاحب المعرض وقرر يشتريها !فطلب منه صاحب المعرض فلوس السيارة ؟؟
الحرامي گاله .. اكو واحد يشتري سمج بالشط! غير اشوفها افحصها تراي امشي بيها ؟؟
انت نظم عقد البيع وي الحجي واني طالع تراي ربع ساعه وراجع ؟؟
المهم الحرامي شغل وطلع !! خلصت الربع ساعه.. خلصت الساعه.. خلصت الساعتين !!
والحرامي ما رجع لا ابو علي ولا مسحاته ؟؟ طفر بالسياره وتورط ابو علوان وظل يلطم على راسه وصاحب المعرض مجلب بي يريد فلوسه من صاحبنه الغشيم !!
 الرباط
هسه احنه صرنه مثل ابو علوان !! يجيك نفس السياسي الناعم قبل الانتخابات هو اللي سارقك قبل سنوات ؟
يقشمرك ويگلك راح اعوضك .. وانت مكيف ومصدگ بي وتنتخبه مرة ثانية !!وهم راح يرجع يسرقك مثل كل مرة !!
والسرقة تكون اكبر !! لان صار صاحب خبرة وتجربة .. ورزقه ورزق عائلته على الشعب وعلى هل الرنة طحينج ناعم من 2003 ولحد الآن... وماندري الى متى يبقى البعير على التل؟؟؟
وأني أضيف وأگول:
ياربي اهدي هؤلاء المغفلين وارشدهم الى الطريق الصحيح..
نودعكم على امل ان نلتقي بكم بحلقات اخرى اذا الله انطانا عمر.. في أمان الله.
أخوكم / رئيس التحرير

• التالي >