فطومة إمهاجرة إلى كندا!!!

التفاصيل

تم إنشاءه بتاريخ الإثنين, 12 تشرين2/نوفمبر 2012 10:45

للاسف لم اتوصل الى اسم كاتبها لكنها قطعة نقدية ساخرة وممتعة ومهداة لأهلنا في كندا...

              
ستسافرفطومة غدا من مدينة الثورة الى كندا، لتتزوج من ابن عمها ارحيّم
وبهذه المناسبة التاريخية جلست عمشة خالة فطومة  تقدم النصائح تلو النصائح لابنة اختها فأول شيء طلبته منها هو تغيير (اللوك ) يعني تعديل جهرتها وجعلها (مودرن) ، قصت لها ظفيرتيها وذهبت بها الى بيت حمدية الحفافة ، لتقوم بواجبها على اكمل وجه من ناحية (قاط الشيرة القوي) ، عادت بها الى البيت وباشرت وشم جسد البنت المسكينة برسوم وكلمات اجنبية وعربية ، (حتى ارحيم ليگول اجيتيني متخلفة وكلشي متعرفين واني سويتچ ادمية) ، فقد رسمت على كتفها الايسر عقرب اسود ، وكتبت على بطنها (اه ونص ) ، وفي مكان اخر كتبت (هسة ارتاح گلبي)وبعد الانتهاء من هذه المهمة النبيلة اعطت الخالة الحنون دروسا خصوصية  في الحياة الزوجية:
 فمن (گلوب احمر ابو الستين) الذي يجب ان يضيء غرفتها يوميا بعد التاسعة بتوقيت كندا المحلي ،الى نوعية الشراشف الناعمة الملمس ،الى ملابس النوم والبخور والبقلاوة التي تقدم كوجبة مهمة قبل النوم ..
انهت الخالة عمشة دروسها بتقديم ورقة ملفوفة بقطعة قماش خيطت بعناية لتضعها العروس تحت وسادتها لتطرد الجن والشياطين الكندية تحديدا،الان جاء دور العمة ،التي اوصتها باطاعة الزوج والامتثال  لاوامره وعدم رفع الصوت امامه وعدم الذهاب الى السوك او للعيادة الشعبية او للجيران بدون علمه ، كما اوصتها بالنظافة وكنس باب البيت يوميا ونشر البسط والبطانيات على السطح (من تطلع الشمس) وان تكون (مرة شاطرة ) تكعد من غبشة تخبز وتطبخ وان لاتتشرط وتاكل الي الله قاسمه وتشارك رجلها بالحلوة والمرة.وبالاضافة الى هاتين الوصيتين يمكننا تسجيل مجموعة اخرى من وصايا الجارات العزيزات
 * بنيتي الاجانب مايحبون الغيبة والنميمة والقال والقيل ،ديري بالچ تگرضين احد گدامهم
*الكنديات عيونهن تكتل ديري بالچ من الحسد ،يومية اقري المعوذات ونامي ..
* الاجنبيات سمعهتن موهلگد لاتختلطين بيهن هواي ، تره يجرنچ للطريق .
* مو تتبواسين وية الزلم مثل مايسوون بالتلفزيون تره هاي عدنه ماينلبس عليها ثوب!!!!
* خلي بالچ على رجلچ تره الكنديات ياما هجمن بيوت .
* اذا كالولچ (گود مورننك ) يعني صباح الخير واذا ( گود ايفننك ) يعني مساء الخير
* اذا قدمولچ عرگ لوبيرة گليلهم (ثانكيو فري ماچ) بلاعيمي توجعني .
* مو كل يوم زعلانه ، ترى الطيارة كروتها كلش كلش  غالية ..
* اخذي وياچ كاسيتات ردح حتى تتذكرين الثورة .
* اذا قدمولچ بيبسي موتشربي كله ، جنچ ماشايفه ، خلي منه شوية بالبطل
* لاتذبين تنكة الزبالة بالركن ، ترى راسا يجوچ الشرطة .
* اذا سألوچ شيعية لو سنية كليلهم كلنا مسلمين ماكو فرق .
* اذا طلگچ ارحيم ، بس گليلهم هذا ارهابي وانت معليچ، يصلخوه صلخ ..وداعتج يودون جلده للدباغ هذا الساقط .
* اذا واحد غمزلچ لاتگولين لارحيم عليه ، سوي روحچ ما شفتي ترى تصير بالتواثي
* مو تتفلين بالگاع ترى يغرموچ ورقتين .
  استمعت فطومة لهذه النصائح القيمة واستاذنت الجميع لتنام ، الجارات زعلن و لم يرق لهن تصرفها هذا ، خاصة وهذه هي اخر مرة يلتقين بها لانها ستسافر غدا ، خرجن على الفور زعلانات وعقدن مؤتمرا  في منتصف الشارع جاء فيه:
 
* والله  اذا مالعبت شاطي باطي  هناك وفضحتنه اني مو سعيدة
* يمعودة عبالچ اتوب نفس الشي، راح تگض الباب وتأشر للرايح والجاي
* هو ارحيم ما لگه غيرها ، لو سألني چان عددت كل فتوگها
*الله هي  هاي شكولات مال كندا ، همه عايزيين دببة ورايحتلهم فطومة ام بوز
* هسة هو ارحيم شلونة ، يگولون حتى بكندا بعده املح وسنونة طايحة وگصته امشكه ويبيع غاز بعربانة
* اذا فطومة مافلتت ويه شاب كندي اشگر وتعال ياعمي شيلني ماتسمى باسمي
* وين الله ويرجعوها من الحدود عبالهم كاولية
* انشالله بكندا وتطگ عليها عبوة .
* لايمعودة لتخافين عليها هاي عده حظ مال گ.........!!