تغرَّبنه

التفاصيل

تم إنشاءه بتاريخ الخميس, 19 كانون1/ديسمبر 2013 17:42

حذام الحداد

تغرَّبنه

 

تغرَّبنه .....والغربه شكثر مرّه

نجر حسرات والحسره بأثر حسره

هجَرنه الوَطن وأرواحنه مكَدْره

غدرنه الزمن بأفعاله الرديّه

علَ فراگك ياوطن الروح متوجعَه

مذلولين وكاس الذل منو يجرعهْ

خوفي يطول بعادنَه  وماإلنه رجعهْ

جذوري بگاعك تنادي عليّه

 

يمته نعود ونتهنّه بحلو صبحك

فيروز التغني والشمس إِلك تضحكْ

وشوفك تشفه ويبره من الألم جرحك

ريتك تشفه ويصير الجرح بيّه


دورنه بكتار الكون بشرقه وغربه

وتعبنه ومالگينه وطن مثلك نحبه

يبو النهرين فرگاك شكثر صعبه

على وصالك ترد الروح ليّه

 

كبرنَه بعاد عنـّـك مو بــيدينه

وبسيرتك صبح ومسه ينوّر حجينَه

عگب عينك يغالي شصار بينَه

وبعدنه نتباهى بهويتنه العراقيه
 

يالساكن بنص الگلب وساكن صبا عيني

تعبني لفراگ وذبت من شوگي وحنيني

أونْ توالي الليل  طيفك لو يجيني

ونّه مبينه  وونّه خفيّه


 

يخلي أمشي نرد للوطن ونعود

ذبلن هروش الگلب ماظلْ فرد عود

أحنه أهل الأرض ولسومر نعود
ماريد بالغربه توافينَه المنيّه