شعر شعبي قصيدة الام

التفاصيل

تم إنشاءه بتاريخ الخميس, 23 كانون2/يناير 2014 18:53

الشاعر علي مجيد الكرعاوي

الى من يخفق قلبي كثيرا عند رؤيتها والجأ اليها لاعقد طرف ردائها طلبا للتبرك وقضاء الحوائج

{ شيلة امي }

شيلة امي مطرزة بعز وعفاف

 امي للغيرة ضفاف
 امي كعبة البيها طاف
 تنجلي اهمومة القديمة
ويرجع لاول مطاف
 امي قانون العشك عدها كرامة  وكبرياء
 امي نهر من الوفاء امي كعبة من العطاء
 امي حرية واباء
 بشرع امي اليحب طاهر يكون
 وبوضوء العشك يتوضوه بعسل
 حتى يملي الدنيا احلام وامل
 وبشرعها
 الوردة من تحضن فراشة
 تمتص الالاف القبل
 وياسوادين العشك من تعشك امي
 تعشك بعفة وطهارة ومن تصلي امي منارة
 امي تاريخ وحضارة وتحت رجليها الجنان
 وحور وانهار وشجر
 امي للخايف امان وامي بالظلمة كمر
 امي حصن العاديات وامي حرز لكل خطر
 امي قانون الحياة
 منها نتعلم حكم امي شعلة من الحنان
 وامي دستور وعلم
 امي تاريخ العراق واحلى ما خط القلم
 امي زقورة ومسلة
 امي بالديوان دلة
 امي من الوردة احلى
 امي سالوفة عشك بلسان شاعر
 امي يا صدق المعاني وروعة حروفج مشاعر
 امي ملهمة الخيال السطر الالاف الخواطر
 امي لابياتي قوافي  وامي لشعاري وزن
 امي ماتعرف تجافي  لحضن امي شكد احن
 امي شمس الله الجبيرة التنثر علينا الضوه
 امي ياريح الشمال واعذب انسام الهوه
امي يا لمة اهلنا الننجمع يمها سوه
امي وردات الربيع
امي خلق الله البديع
وابقى خادمها المطيع
 
 الشاعر علي مجيد الكرعاوي