رئيس كوريا الشمالية سيحكم العراق لثلاثة أشهر فقط!!

التفاصيل

تم إنشاءه بتاريخ الإثنين, 04 كانون2/يناير 2016 10:41

كتب بواسطة: جلال چرمگا

   رئيس كوريا الشمالية سيحكم العراق لثلاثة أشهر فقط!!

الله بالخير يا جماعة...
الخبر نزل مثل الصاعقة على رؤس حرامية المنطقة الخضراء (كلهم شلع) نعني الرئاسات الثلاث وحتى الموظفين الصغار .. تعرفون ليش؟؟
يگولك هذا الشاب ( كيم جون أون) اللي راح يجي يحكمنا من موقع أدنى ولمدة ثلاثة أشهر قابل للتجديد ، ما يتفاهم مطلقاَ.. أيده والمسدس ،ما يعرف أبو و مايتساهل وية الحرامية أبدا .. يمشي و وراه مجموعة جنرالات واحدهم أكبر من جده و شايلين حگة ونص أوسمة ونياشين و أنواط و دگم و أشارات و غيرها.. وليغاد مجموعة شباب يحملون أنواع الأسلحة من السچين الى المدافع اللي تنحمل عالكتف!!.
بس شاف غلطة من احد المسؤلين..رأستاَ!! أشر براسه وگال:
انشو بهو ري نووووم .. نعني بالعربي أعلسوا فورا..
والحرس رأستاَ!!.. منومنميم تر.. أمرك سيدي القائد..
بهاي.. بهاي.. وعيونكم ماشافت ، هاا نسيت بالمناسبة هو قبل ما يباشر ،المخابرات الكورية زودت سيادته بتفاصيل مملة عن الحرامية اللي يحكمون العراق منذ 2003 .. أكيدن!! لعد شلون؟؟ وهو أصلا لويش جاي؟؟ قابل جاي يگشر بصل؟؟ غير حتى يصفيهم واحد واحد!!
يا هلا وجثير الهلة بالرفيق القائد الوسيم الكبير العظيم ( كيم جون أون ) دام ظلكم الوارف و كل خطوة الف هلة من كوريا الشمالية الى أرض الرافدين... عاد كم خطوة عندكم الحساب!!.
+رفيقي بيمن نبدأ والعقوبة لوسمحت جنابك؟؟
- جيبولي هذا اللي أسمه السوداني وزير التجارة.
+تقصدون عبدالفلاح السوداني.. هذا ديصلي.. ننتظر؟؟.
- أنشو بهو ري نوووم .. معقولة هيج مخلوق يصلي؟؟ وشيگول الربه ؟؟؟
+يگول جيبوا.. بسرعة .. هاا.. اجه شنو عقوبته؟؟
- ادفنوا في حاوية مليانة زيت ساخن فاسد من اللي أستورده للشعب العراقي المسكين  و خلوا راسه أولا ورجليه ليفوك ولمدة نصف ساعة ..بعدين طلعوا.. اذا مامات افراج ..هذه العقوبة كافية ماكو أكثر..!!.
+رفيقي هذا أول دقيقتين ينطيك عمره..
- الى الجهنم..
+ منو اللي ورا رفيقي؟؟
- جيبوا لي أبوالداخلية صاحب دكان الخضراوات في الدنمارك (عدنان الأسدي) اللى أستورد أجهزة كشف المتفجرات و الدروع ضد الرصاص وسرق مليار دولار من الشعب ..
+ وشنو عقوبته؟؟
- لبسوا درع واقي من اللي أستورده.. واضربوا بمدفع 106 ملم.. اذا مامات أتركوا ..
+ رفيقي هذا راح يصير مية وصلة..
- الى الجهنم..
+ بعد منو؟؟
- جيبولي وزيري النقل ..
+ تقصدون العامري و صولاغ ؟؟
- بسرعة..هو أكو غيرهم؟؟
+ عقوبتهم رفيق؟؟
- شدوهم  ورا طيارة مالة الخطوط الجوية العراقية.. خلي الطيارة أتطير لمسافة عشرين كيلو متر.. وتهبط بالمطار..اذا عاشوا أتركوهم..
+ رفيقي راح ويصيرون كفتة .. الطيارة تسحلهم عالمدرج.. وتطير.. وتنزل.. لا الأخوة انتهوا ورب الكعبة.. ومنو اللي وراهم؟؟
-جيبولي صابر العيساوي و الوسيم عبعوب ابو الصخرة..
+ عقوبتهم؟؟
- هذولي والمدراء العامين الحرامية أدفنوهم بأقرب سبتي تنك وأغلقوا عليهم القبغ ..
+ لاء هذه مو خوش موته!!..وبعد منو؟؟
- جيبولي وزراء الكهرباء.. سلطوا عليهم ضغط عالي يعني آلآف الواطات لمدة ساعة الى أن يغدون فحم ولاترموهم نستعملهم للشوي!!
+ واللي بعدهم؟؟
- جيبولي صالح المطلگ..
+ عقوبته رفيق؟؟
- شلعوا كل سنونه (لأنه طول عمره ماغاسل سنونه وبالتالي باك فلوس النازحين).. وحطوا گدامة نص گونية جوز لازم يكسرهن خلال خمس دقائق ..واذا ما گدرشلعوا عيونه!!
+راحن عيونك يا صالح..عقوبة قاسية..
+ واللي بعده؟؟
- المالكي و نواب العبادي الى طردهم قبل فترة..
+عقوبتهم رفيقي؟؟
- ما نكتلهم.. ننطيهم كل واحد رشاشة وأنهدهم يتوجهون للموصل لتحريرها!..وأكيد نعلن للمجرمين الدواعش بأن الجماعة بالطريق اليكم.. عاد هم وشجاعتهم..اذا حرروا الموصل نعفيهم..!!واذا لاء يتحاسبون ويةالجهة الأخرى..اقصد الدواعش..وهذه أخف عقوبة!!.
بالتأكيد و من غير سين و جيم مايصلون ديلتاوا(الخالص) ينتهون ، طبعا الرفيق يأمر وفرقة الأعدامات والتنفيذ بصوت جهوري واحد:
منو منيم تررر .. خلال دقائق العقوبة تنفذت و راحوا بالرجلين..
+واللي بعدهم رفيق ؟؟
- جيبولي حنونة الفتلاوي و عالية نصيف ..
+العقوبة؟؟
- گصوا السنتهن بالمگص وأتركوهن خطية لأنهن نسوان!!!
+ واللي بعدهن؟؟
- جيبولي عباس البياتي ..
+العقوبة ؟؟
- حطوا بفوهة مدفع عملاق وأطلقوا بأتجاه أمرلي و سليمان بيك.. وهناك راح تستقبله فرقة التأديب (هذا اذامامات بالطريق اثناء القذف!!) راح يستلموا الجماعة ويحطوا نيشان بميدان الرمي ..هذا ناكر جميل ناسي حتى قوميته.. لوگي خمس نجوم يريد يستنسخ سيده نوري المالكي!!.
+اللي بعده سيدي؟؟
- جيبولي بهاء الأعرجي
+ سيدي هذا راح للموصل ويه المالكي و الجماعة..
- اوكي جيبولي مها الدوري
+ العقوبة؟؟
- خنگوهه بعبايتها ..لاتنطوها مجال هذه ثرثارة و توجع راسي!!
+واللي بعدها؟؟
- جيبولي هذا اللي يگلون عنه القاضي.. قصدي ( محمود الحسن زوج بنت خالد العطية) هذا أفترى على كتابكم(القرآن) و مايفرق بين قول لأبن خلدون و آية قرآنية ..
+والعقوبة؟؟
- علگوا اباب المحكمة الأتحادية لمدة شهر من غير أكل و ماي .. وبعدين نزلوا اذا كان بعده عايش أفرجوا عنه!!.
+ واللي بعده؟؟؟
- جيبولي الشهرستاني.. شنو هذا عراقي؟؟؟..أسمه غريب!!
+ رفيقي بالعراق ماكو عائلة بهذا الأسم ..شنسوي؟؟؟.. شنو العقوبة؟؟
- هذا كذاب.. گال راح أنصدر الكهرباء..وبعدين خرب المؤسسات التعليمية.. علگوا بساحة التحرير الى حين ظهور المهدي المنتظر، وبعدين أطلقوا سراحه!! ..
+أمرك..واللي بعده؟؟
- جيبولي القصة خون اللي فشل بالتربية و خرب المؤسسة التربوية بالكامل ورقوا وعينوا رئيس جمهورية بالوكالة خضير الخزاعي..
+عقوبته؟؟.
- حطوا بفرن عراقي(تنور) وجيبوا كل الدولارات اللي سرقها بحدود 100 مليون..خلوا هالدولارات فوگ راسا وأشعلوا النار بالفرن وخلوا باقي نص ساعة اذا كان بعده عايش أتركوا يرجع الى شغلته الأساسية قصخون..
+رفيق هذا أيگول ماسارق غير تسعين مليون دولار!!........اللي بعده؟؟
- ما أريد كلام زايد التسعين أخو المية  ... جيبولي وزراء الدفاع من أول وزير ( حازم الشعلان) الى الأخير..
+عقوبتهم؟؟
- عقوبة عسكرية رمي بقاذفات أر بي جي ١٥ في ميدان الرمي بمنطقة البسماية ..

بعد هذه الجهود لابد للرفيق أن يرتاح شوية ، نصحوه الجنرالات بالتوجه الى ساحة التحرير لكون هناك آلآف من العراقيين بأنتظاره وهم يهتفون بحياته و يثمنون جهوده في القضاء على الفساد و الفاسدين.
وصل الرفيق الى ساحة التحرير وآلآف الحناجر تهتف من كل موزاييك الشعب العراقي منهم من يحمل مسحاة ومنهم منجل و چاكوچ و مگوار وسيف وخنجر وسنابل قمح ..الخ
وهنا أرتفع صوت أحد الأخوة عرفناه من عگاله انه من الجنوب و گام ينشد و يوجه كلامه للرفيق القائد ( دام ظله الوارف) :
كـيم جـون الـبـَـطـَـل لـلـمـَجـِـد هالعـنـوان
مـيـزان الـشـَـرَف يـاعـِـزَّة الأوطـان
يـالإسـمـَـك عـَـلـَـم يـافـَـخـَـر كـل إنـسـان
هـا احـرار الـعـالـَـم هـا.......
كـلـْـنـَـه الـيـوم انـْـصيـح انـّـادي....
هـذا الـعـالـَـم كـلـَّـه امـهـَـدَّم ، إگـعـد (جـون ) اوعـَـمـّـر بـيـه
هـذا الـعـالـَـم كـلـَّـه امـهـَـدَّم ، إگـعـد (جـون ) اوعـَـمـّـر بـيـه

وحق أبوخيمة الزرگة حتى لو يظهر الشيطان  ويستلم السلطة وهو قوي أنهوسلة وأنهزلة رگبة وأچتاف.. و ها خوتي ها:
بسمارچ منچ يا لوحة ... بسمارچ منچ يا لوحة

يبقى الرفيق في العراق لتصفية بقية الحرامية
أودعناكم عيوني....
رئيس التحرير

• < السابق
• التالي >