أجاكم الخير يا العراقيين !!!

التفاصيل

تم إنشاءه بتاريخ السبت, 12 آذار/مارس 2016 09:56

كتب بواسطة: جلال چرمگا

أيها العراقيين الغيارى..
أبشروا أنحلت مسألة الرواتب وكافي مظاهرات و احتجاجات وتهديدات .. شعبالكم ؟؟شنو ماكو عقول تفكر بيكم وبمستقبل أولادكم؟؟

لا أخوان أنتوا متوهمين مازال الجعفري و صولاغ  متعدد المواهب وبقية الأخوة موجودين سدكم أمين..واللي يگولكم الخزينة أفلست و من شهر مايس ماكو رواتب وسعر برميل البترول بفلس..گولوله البركة بالحكومة ومجلس النواب و خبراء سوگ مريدي .. اليكم الحلول:
وزارة الصحة:
كل موظف مخول أن يفتح (چمبر) لبيع الأدوية ومايهم حتى لو كانت الأدوية منتهية الصلاحية (اكس باير) وهناك تسهيلات أخرى ممكن أن يشارك احدى الدلالات على الچمبر لكون الأخ الموظف عنده دوام .. لعد شلون؟؟.
أما الأطباء يشتغلون بدون راتب لكون لديهم عياداتهم الخاصة أو يشتغلون في المستشفيات الأهلية ونفس الشي بالنسبة للصيادلة والمضمدين و الفراشين.

وزارة الموارد المائية:
الوزارة راح ستزود كل مجموعة من الموظفين بسيارة (حوضي) مليانة بالماء الصافي ويقوم أحدهم بقيادة السيارة وأخر مساعد له ببيع الماي للمناطق البعيدة و النائية و من جهة أخرى يأجرون المكائن الثقيلة للأهالي بساحةالسباع بشارع الكفاح والأرباح خير من الله بعد شيسون بالمعاش!!؟

وزارة الداخلية:
تبليغ كل السيطرات بأخذ كم دينار من كل سيارة تمر ..انشاءالله الف تالاف سيارة نعني مثل المنشار الرايح والجاي يدفع المقسوم وبعدين أكو تسهيلات رجل الأمن مايشغل جهاز كشف العطور ..قصدي المتفجرات ومايأخرهم لاء..جيب أخوية..الله وياك!!.

وزارة الثقافة والسياحة:
الجميع لازم تشارك بالمسرحيات و حفلات الأغاني والمعارض و بذلك رواتبهم مصوگرة يجوز يلوحهم أكثر..
أما السياحة هذه تدخل السياحية الدينية على الساحة ايضا لذلك يبربعون الأخوة كلها بالتومانت ..تومان ينطح تومان..!!.
وزارتي التعليم العالي و التربية:
بعد ماكو تعليم مجاني ، كل طالب عليه أن يدفع كل شهر هالقاسمه الله وبذلك وين أكو مشكلة بعد؟؟؟.

وزارت العمل و الشؤن الأجتماعية و العلوم و التكنلوجيا و التخطيط:
هذه تلغى ويوزعون موظفيها على بقية الوزارات ..عليش؟؟ .

وزارة النفط والكهرباء:
يحجزون الوزراء الحاللين والسابقين منذ أول يوم للأحتلال ويجبرون بدفع معاشات الموظفين إلا أن يفرجها الله وممكن للموظف أن يشغل مولدة ويبيع أمبيرات و الربح؟؟!!!!.

وزارة الرياضة والشباب:
هذولة أمورهم عدلة بسبب بطايق الملاعب.. خير وبركة..

وزارة الهجرة والمهجرين:
يفتحون مكاتب في كل المحافظات لتهريب العراقيين الى الخارج ، ياخذون على كل راس ثلاثة آلآف دولار..  والحساب عندكم خير من الباري!!.

وزارة التجارة:
يجيبون الوزير الأسبق السوداني و يزوعوا المليارات اللي سرقها.. وبعدين نتحاسب!!.

وزارة الأتصالات:
ياخذون رواتب الموظفين من شركات الأتصالات.

وزارة الصناعة:
بدل الرواتب يوزعون على الموظفين قنادر ونعالات عتگ و بايسكلات وحليب و زبد و  وبقية منتوجات الألبان..

وزارة النقل:
كل عشر موظفين يشتركون بـ (ستوتة) ويشتغلون بشوارع بغداد..
وأخيرا:
مازال الأخوة النشامى بالمنطقة الخضراء موجودين سدنا أمين وماكو أي خوف علينا..
واللي شبكنا يخلصنا
دا حبيبي شغل بالي
اه يابا يابا شغل بالي
يا راميني بسحر عينيك الاتنين
ما تقولي واخدني ورايح فين
على جرح جديد
ولا لتنهيد
ولا ع الفرح موديني
وها أخوتي..هااا .. هااا أخوتي هاااا
بسمارچ منچ يا لوحة.. بسمارچ منچ يا لوحة!!!

رئيس التحرير

• < السابق
• التالي >