الزورق مو بس مقلوب ،لا والله مقلوب و مثقوب و منهوب!!

التفاصيل

تم إنشاءه بتاريخ الإثنين, 19 آب/أغسطس 2019 17:29

كتب بواسطة: جلال چرمگا

الزورق مو بس مقلوب ،لا والله مقلوب و مثقوب و منهوب!!

بكل العالم حينما يفشل مسؤول حكومي وما گدر يدبر الأمور ، يعني مو گد المسؤولية في ادارة دائرته أو وزارته يحال الى محكمة وبعدين يبعدوا و يجيبون اخر بمكانه.

وهذا اللي انطرد ما ممكن يخلو بوظفية اخرى حتى لو كانت اقل من وظيفته السابقة.
نعم هذا السياق موجود في كل العالم عدى بعض الدول التعبانة مثل عراقنا العظيم ( بفضل ديمقراطية الأخ ومهجة القلب المستر بريمر) اللي كل يوم انشوف ونعيش حالات اغرب من الخيال.
يابة مو هذا فشل و حرامي و ملعون والدين و جاسوس لويش خليتوا بوظيفة اعلى وهو مايساتهل تنطي نعجتين يرعاهن و حتى شهادته مزورة جابها من سوگ مريدي؟؟!.
- عمي اسكت هذا (ابو فلان) عنده ميليشيات وعضو قيادي بحزب اسلامي وعنده قصر بطهران يگولك من يوصل للمطار يفرشولة سجادة حمرة طولها بطول ملعب كرة قدم.
بس هو فاشل قبل فترة سرق كذا مليون و يتخابر مع دولة اجنية وكان السبب في خسارة مليار دولار من خزينة الدولة ومن قوت الشعب!!.
- اگولة تى ويگولي بى.. عمي هذا ظهره كونكريت مسلح انت ليش ماتسكت ،مو عندك عائلة وجهال ، تريد يطگوك بالدهن واهلك يخسرونك ويتيتم جهالك لو شنو؟؟.والمهم ترة كلامك هذا لايقدم ولايؤخر مجرد خسارة بالوقت و لاتصدگ احد يسمعك لو يأيدك مطلقا!!.
عمي مو طفح الكيل اللي دنشوفها فوك التصور والله حتى بأكبر الدول دكتاتورية ماصايرة..مثلا:
انت شايف ضابط امن فاشل يخلو وزير دفاع وبأمرته كذا جنرال و كل صنوف الجيش؟؟؟؟
مايگدر يعبر جملة مفيدة وعدى وزارة الدفاع يخلوا وزير للثقافة!! هذه مو كارثة!!؟؟.
يعني هذا على حد المثل:شنو علاقة الدولمة بالجلاق؟؟ يعني شنو علاقة ضابط أمن بوزارة الثقافة؟؟شنو قحط مثقفين وأصحاب شهادات عليا بالعراق؟؟.
ببداية الأحتلال كان نازل ويه صديق بنفس الفندق وبالليل يسهرون ويتباحثون.
أكثر من مرة يخاطب صديقة ويگول: تتوقع يرجعوني للوظيفة وأصير مدير أمن؟؟؟؟.
تصوروا أقصى احلامه مدير أمن !! وبعدين بقدرة قادر يحمل حقيبتين وزارتين بدل من واحدة!! هاي شلونكم بيها؟؟؟.
كل مؤهلاته انه ربى لحية وحاطلة حگة علچ بحلگة والنهار كله يعلچ و نظارة شمسية ، مايستحي والله العظيم عمشة أم اللبن أفهم منه بألف مرة!!.
والأخر وزير سياحة يظهر بالتلفزيون ويكرر اكثر من عشر مرات انه قابل (ضخامة الرئيس بشار الأسد) هذا شلون مطي مايفرق بين (فخامة و ضخامة) ؟؟ الله عليك هذه ينسكت عنها؟؟.
الأخر كان وزير تربية وفشل فشل ذريع گام يخيط ويخربط يلغي أقسام بمعهد فنون الجميلة ويطبع كتب مدرسية بأيران مملؤة اخطاء ويسرق و يلعب بالوزارة شاطي بطي!!.
تعرف من ابعدوا وين ودو؟؟.
خلوا نائب رئيس جمهورية وبسبب مرض (مام جلال) صار رئيس جمهورية بالوكالة وراتبة بالملاين يستلمها الى اليوم!!.
الكارثة الأخ شبه أمي و فاشل بكل المقاييس كان (قصخون) بكندا..كل هذا وتريدني أسكت ، ليش عمي ليش؟؟.
- وبعد؟؟
عشرات الأمثلة وأمثلة..الأخ يدعي أنه مهندس، خوش ما أختلفنا ، يستلم وزارة الأسكان ويفشل وبعدين يستلم أهم وزارة هي الداخلية وبعدين النقل وبالأخير وزارة المالية.
من أنهجم بيوتكم ولكم هذا شنو ؟؟ست البيت لو كرندازير لو عنتر زمانه؟؟.
الأخر كان عضوبرلمان (على قائمة سماحة السيد مقتدى / دام ظله الوارف وأبقاه سند للفقراء و المحتاجين!!) و يملك حماية بالعشرات من بينهم ضباط كبار گام يبوگ وياخذ كومشنات و رشاوي عينك عينك حتى صار مليونير وبعدين من حسوا به انه حرامي عينوا نائب لرئيس الوزراء حتى يصير ملياردير ... وفعلا صار و نص وتلت أرباع ..
والأخ كان أيام زمان (قبل الأحتلال) بلندن يبيع جواريب و كارتات تلفونات وحسرة عليه لفة همبركر وقوطية كولا.
اليوم يملك عقارات بلندن وابغداد وعنده اكبر يخت بدبي وأرصدة فلكية الله وكيلكم بأرقام مخيفة لا تصدق!!.
والأخر كان مضمد يضرب ابر و يطهر جهال المنطقة ومن سافر واستقر بأوربا فتح دكان صغير لبيع الخضروات و أكياس حنة ايراني و علج ماي و قواطي دبس و مصاصات وشكرلمة ( العمل شرف) وهناك يعينوا وكيل أقدم لوزارة الداخلية وبسبب عدم وجود وزير يصير وزير بالوكالة و تصوروا المنظر من مضمد الى وزير داخلية العراق.
طبعا الأخ هم صار ملياردير بأمتياز وبعده لليوم عضو برلمان و محد يتجرأ ويگوله على عينك حاجب!!.
الأخر عينوا وزير تجارة!! يا يابه على هذا الحرامي..ماخلى على وزارته حال ، باگ الى ان الباري گاله يا معود مو كافي بسك عاد!!.
اشترى قصور وعمارات واملاك مختلفة ورصيده بحدود مليار دولار ، وبعد مطاردات القوا القبض عليه في بيروت بتوصية من الشرطة الدولية ( الأنتربول) ورجعوا الى بغداد وتبين ان الأخ نزيه وماعنده شىء لابل يخاف الله (شوفوا لحيته ومحابسه !) وخدم الشعب والوزارة وگاعد ايجار ومايملك شىء يذكر و التهم كلها باطلة وهذاك هو يفتر براحته بسيارات دفع رباعي ولا چنه سوى شىء!!!.
ها تريد أمثلة بعد؟؟؟.
وهناك معتوه محسوب على العراق وامخلي عمامة سودة طولها كذا متر ، يطلع بلقاء تلفزيون عراقي وعلى ارض العراق يسأله المذيع اذا نشب حرب بين العراق وايران وية من توگف؟؟.
بكل وقاحة يگول: طبعا مع الجمهورية الأسلامية!!؟
هذا مو تلزمة وتشد أيديه و رجليه و تشمره من عمارة الدامرچي؟؟؟
أما بعض أعضاء البرلمان لحد اليوم ما مصدگين برلمانيين بحق وحقيقة!!.
أكثر من وحدة تتصور لاتزال هذيج الدلالة اللي كانت تفرش الأرض وتبيع اللنگة لو نعالات بسوگ العورة بمدينة الثورة ، لذلك تصرفاتها ماتغيرت ،اللي تغير سيارات دفع رباعي و حماية ورواتب بالملايين وجواز دبلوماسي و عشرات الأمتيازات!!.
كفيلكم العباس ابو راس الحار حتى هن ما مصدگات ، صدگ؟؟ چذب؟؟ دلالة بسوگ العورة تسافر للخارج وتشترك بمؤتمرات دولية و تمثل العراق!!.
برلمانية تطلع بالتلفزيون وأمام الملايين وأدگول:كلنا أخذنا كومشنات!!.
لو أكو قانون ودولة لازم تتحاسب فوراً ، تنسحب من ستوديو التلفزيون تنخنگ بعبايتها اباب الشرجي و تتعلق جوة نصب الحرية!..
رشحت لدورة برلمانية اخرى فشلت ومافازت!! ، تدرون شتشتغل آلآن؟؟؟.
مستشارة بدرجة وزير عند العم رئيس الوزراء عادل عبدالمهدي!!.
هاا، هاي شلونك بيها؟؟؟.
لا والله عمي الزورق مو بس مقلوب بل مقلوب ومثقوب و منهوب ومايصيرله چاره مادام هالحرامية و الجهلة والجواسيس يحكمونا!!.
الى اللقاء الى مهزلة أخرى من مهازل المنطقة الخضراء ..أودعناكم عيوني.
أخوكم / رئيس التحرير

• < السابق
• التالي >