أبكي دون دموع

التفاصيل

تم إنشاءه بتاريخ الأحد, 10 آب/أغسطس 2014 08:19

كتب بواسطة: ميسون نعيم الرّومي

ميسـون نعـيم الـرومي

أبكي دون دموع

جفـَـنْ عيـني المْايـِـنامْ – إعْيوني بَـغدادْ السَـلام
روحي طارَتْ ليـَـچْ كلهَه – اوبـيهَـه من عندي سَــلامْ
إعْيوني انتِ اوروحي كلهَه
گـلبي والله الغرْبـَـه مَـلهَه
اشلون تالي احبيبـَه حَلهَـه
ضاعْ من حَلگي الكـَـلامْ - جفـَـنْ عيـني المْايـِـنامْ
***
مَدْري گولي اشلونْ تالي
غـيـرچْ أبْـداً مالي والي
هـذا تـالي اللي جـرالي
غربـَـه وابگـَـلبي السهامْ - إعْيوني بَـغدادْ السَـلام
***
بَعَـدْ هذي اوبَعَـدْ هايَه
صرْنـَـه للعالمْ روايَـه
ماكوْ بَـدْوَه اولا نِـهايَه
والشـَعبْ كلـَّـه نيامْ – جـفـَـنْ عيـني المْايـِـنامْ
***
ذولـَـه ولدچْ نهضي شوفي
حِـنـَّـه دَمهمْ گعـدي دوفي
إجروحي نـَـدَّتْ هاچْ روفي
إمْصايبْ اوصارتْ عِظامْ – إعْيوني بَـغدادْ السَـلام
***
إعْـيوني بَغدادْ الحَبيبَـه
مِبْعِـدْ ابْـروحي گريـبَـه
دَرْفـَـشْ إهلالْ اوصَليبَه
إخوَه إحْنـَـه إمنْ الفطامْ - جفـَـنْ عيـني المْايـِـنامْ
***
نـَـخـْـلـَـة الـْبرحي يَطولچْ
نشفـَـتْ اوتدْمَعْ اعــثوگچْ
إحْبَيبَه هالگـَـصَّوْ ازلوفچْ
تـَـتـَـرْ هولاكوْ اولئامْ - اوتالي كتـْـلوه السَلامْ
***
ليَـشْ أهـْـلچْ هالجـفوچْ
للأجانـبْ هَــالـْـرمـوچْ
ابْليَلـَـه ظـَـلمَه اوهالسبوچْ
اخوالْ واخوانْ اوعَمامْ – إعْيوني بَـغدادْ السَـلام
***
عيني بَــغـداد القـَصيــدَه
إمْصايِــبچْ صارَتْ جَريدَه
گطعَــوْ إعراقي وَريــدَه
إرْهابْ متغـَـطي ابْلثامْ – أمريكه وى ذولـَـه اللئامْ
***
دجلتِــچْ يبچي الفــُراتْ
انباعَنْ ابـ ( رقْ) البَناتْ
العالـَـمْ اشمالـَـه ابسباتْ
اويحمي حاكمنـَـه الهمامْ - جَرحْ جفني الماينامْ
***
آخْ .. إلمَــنْ نشكي هَـــمْـنـَـه؟
ضعتي انتِ اوضعنـَـه إحْنـَـه
كتـْـلـَـوْ الفـَـرْحَه ابشـَـعَـــبْنـَـه
الــيوم صار إبْألفْ عامْ
إقـْـري بَغـــدادْ السـَـلامْ
روحي طارَتْ ليـَـچْ كلهَه – اوبـيهَـه من عندي سَـلامْ

آب / 2014
 ســـتوكهولم