دارميات عراقية

التفاصيل

تم إنشاءه بتاريخ الخميس, 21 آب/أغسطس 2014 06:59

كتب بواسطة: ميسون نعيم الرّومي

ميسون نعيم الرومي

دارميات عراقية

 مابيـَّـه آنـَـه انساچْ  يـَـحـْـبَيبـَـه بغداد
وَيـَّـه النـَـبضْ تسرينْ  يالكلـّـچْ أمْجادْ
 
بغداد العَزيزَه اتـْـرابْ سَووهَه الأشرارْ
وَي الزَمَــنْ تنعادْ دَگــّـاتْ الكـبارْ
 
تبچي اوتصيحْ أحّو  موجوعَه بَغداد
گـَـطـّـعَـوْ بيهَه اوصالْ  ذولاكْ الأوغادْ
 
رَيْـفـَـوْ بَـلـَـدْنـَـه ليـشْ سَـوّهَــه ثـِـحـرابْ
حتى النـَـخـَـلْ والطيَرْ  من ضيَـمَـه هالشابْ
 
بَغداد الأحبهَه اهواي  كسرَتــْـلي ضلعي
يـومْ الشـفـت عـيـناچْ ما نـشـَــفْ دَمْعــي
 
جابـَـوْ زبـلْ حـكامْ  طحْـنـَـوْ اضلوعـچْ
دَمْ ابأرضنـَـه ســالْ  دفـْـنـَـوْ اربـوعچْ
 
يا شـَـعَـبْ يا مَضيومْ  ياهـو اليعـيـنـَـكْ
كلـَـه نحيبْ اوخوفْ  راحَـنْ اسْـنينـَـكْ
 
أرْبـَـعْ عقودْ ابْضيجْ  ما شفـْـنـَـه راحـَه
گـلنـَـه الگـَـلبْ يرتاحْ صارَتْ مَـناحَــه
 
دجْـلـَـه اوفراتْ الفاضْ وابدَمْعَـة العينْ
يا شـَـعْـبي الله اعـليـَـكْ لاترضه بالشينْ
 
ريشـَـه ابْـمَـهَـبْ الريحْ  ضَليَـنـَـه نـفـتـَـرْ
مَوجوعَه هاي الروحْ  من هَـمْهَه تِشـْعَـرْ
 
جارْ الزَمانْ اوعالْ طـَـشـَـشْ ضَعَـنــَّـه
مَـسْحـونـَـه تـلعي الروحْ تـذكـر أهَـلنـَـه
 
بَـسْ القـَـهـَـرْ والضيَـمْ لا يا سَـهَـمْـنـَـه
يـَـمْـتـَـه الوَكـتْ يـنـْـدارْ تـخـْـلصْ محَنـَّـه

آب / 2014
ســـــتوكهولم