الگاردينيا - مجلة ثقافية عامة - ليشْ اتـمــــــــــــــوتْ؟؟؟

ليشْ اتـمــــــــــــــوتْ؟؟؟

التفاصيل: تم إنشاءه بتاريخ الثلاثاء, 11 تشرين2/نوفمبر 2014 23:05; كتب بواسطة: ميسون نعيم الرّومي

ميسون نعيم الرومي

ليـشْ اتـمـوتْ
يابـرعـمْ وَردْ يادَمـعَة القـدّاحْ
ليـشْ اتـمـوتْ
واسـنينـَكْ السـتـَّـه اوفـوگهه العشريـنْ
دَمهنْ سـاحْ عَ التابـوتْ
ليـشْ اتـمـوتْ
يتـّمتْ القصيـدَه والشعرْ يـَـتمـانْ
صاحْ اوسـألْ
ليـشْ اتـمـوتْ
گـَـلبْ امَّكْ صرَخ يابني
يصيحْ احاه
باگوْ مهجتي او هالذبحَوْ
السِـبـّـاحْ
عـمودْ البيتْ چانْ المرتـفعْ
هالطاحْ
هالإيـدي اصفـَگـِـتْ بالگاعْ
تـَعـْـبي هالتـِـبـَـدَّه ! وانـتهَه
اوهالراحْ

ليـشْ اتـمـوتْ
يابلبلْ يـغـَـرّدْ مَحْلـَه بيكْ
الصوتْ
ليـشْ اتـمـوتْ
هاليبچي الفـُـراتْ اودجلـَه
حتى الكـوتْ
والبَصرَه إحـزنـَـتْ
هالتبـچي كل بغداد
سـمـَعْ كل العراق
اوصاحْ كل الصوتْ
ليـشْ اتـمـوتْ

لـيش اتـروحْ؟؟؟
گـلـّي : اشـِّـفـتْ من دنـياكْ
وانـتَ للشعـرْ عـنوانْ
ياحِزنْ القـَـوافي منْ يمـرْ طرواكْ
يابَحـرْ الشعـرْ مَلفاه بَس النـّـوحْ
لـيش اتـروحْ
ليـشْ اتـمـوتْ
يانـَـشـغـَـة الهورْ اوحـزنْ مـيـسـانْ
غـَـمَّه المـوتْ
ياخذ عينة الشبان
غـَـمهَه الگاعْ
انطبگـَـتْ على الشجعانْ
عَلي اسمَكْ علي من حيدرْ الكرارْ
انـتَ ابـنْ الفـراتْ الزيـنْ
عـَلّاوي رشـَـمْ
يالكلْ الشعـرْ يـرثيكْ
ألفْ رَحمَه إلـَـكْ
ياألفْ رَحمَه اونـورْ
ياغـِـصنْ انگطـَعْ من شجـْـرَة الأغصانْ
لـيش اتـروحْ
ليـشْ اتـمـوتْ