وي كـُل رنه من التلفونات

التفاصيل

تم إنشاءه بتاريخ الإثنين, 12 تشرين2/نوفمبر 2012 16:35

 

وي كـُل رنه من التلفونات

 

ينهد الحيل ونگضيها بالهبطات

 ترتجف الايد وتتسارع النبضات

 

نركض ركض  بالممرات

 

ها هذا تلفون من بغداد والمحافظات

 

آلو شلونكم شلون الأخوة والأخوات

 

شلون شمعات البيوت الطيبات

 

صحتهن عافيتهن أحبيباتنه  الأمهات

 

ها أخويه خو مو أحد مات

 

انتم سالمين.. أمي.. العيال والحفيدات

 

ويتگطع الصوت من وراء  هالمسافات

 

يجاوبني أنت شلونك وسط الغربه والغريبات  

 

سلامنا وأشواقنا ولأطفالك القبلات

 

مني ومن أطفالي وكل البنات

 

إلك يا الغالي يا أبو الغانمات

 

 

أخويه أنا بخير والحمد لرب السموات

 

بس جاوبني أنتوا ... أنتو.. شلونكم بهالازمات

 

يگولي الحمد لله أحنا بخير رغم الانفجارات

 

صحيح شويه عندنا جوع  وننتظر المايات

 

والحر گاتلنه وبيدينه المهفات

 

والكهرباء تجي وتروح  وي الرايحات

 

وكل يوم  عجة و ترابات

 

نختنك ونمرض ونداوي جهالنا بالدعوات

 

بس لا تهتم تعلمنه على الضيم والحسرات

 

خلص العمر ضيم وهضم وكضيناها بالدمعات

 

الله كريم وما ينسى الصابرين والصابرات

 

هسه أمي تريد تحچي وياك ها الچلمات

 

 

أي هلا بيها والله مشتاق لأجمل الأصوات

 

ها يمه... شلونك َ يا بعد بيتي والشيبات

 

بالي يمك وأدعيلك ليل ونهار وبالصلوات

 

الله يحفظك ويرجعك بالسلامات

 

يمه من عمري على عمرك وتعيش كل السنوات

 

تكضيها بسعادة وصحة وألف عافيات

 

يمه أني راضيه عليك اليوم وحتى الممات

 

بوسلي أطفالك وخلي بالك عليهم من البردات

 

الله يحفظكم يا يمه وانتو بعيدين  بالولايات

 

يمه أني تعبت أريد أمد رأسي على المخدات

 

 

يمه .. يمه ..

 

 تسمعيني اروحلچ فدوه يا نعم السيدات

 

شنسه منج ربيتينا على عزة نفس وكرامات

 

تشبيرنه شبر شبرا ومترات

 

تگولين انتو أخوتي وبناتي نعم الأخوات

 

دنياي تكبر بيكم وأنسى كل أيامي الموجعات

 

يمه والله  والله ما ننسى تعبچ ودموعچ المنهمرات

 

يمه أعذرينه شبابنا أخذته حروب ونكبات

 

جروح وندب ومشي على العكازات

 

ومن مشت الأيام وفرحت ِ بينه والزوجات

 

الغربة أخذتني فاعذريني يا أغلى الأمهات

 

ما لازمت ايديچ واخذتچ بالفواتح والمسرات

 

ما حنيت ظهري حتى تمشين عليه بالخطوات

 

ما شربتچ ماي ودوءه ولا اخذتچ للطبيبات

 

وما گعدتي بصدر بيتي ولا نمت بالحجرات

 

يمه أتنغصلچ بكل لگمة وكل  هالنسمات

 

فرحتي تبقى منقوصة وما هي كل الفرحات

 

لان أنت بعيدة يا نبع كل الخيرات

 

ونبقى يا يمه وي كل رنه من التلفونات

 

ينهد حيلنا ونگضيها بالهبطات

 

 

لا .. لا وليدي لا يظل بالك ربك حافظ للعائلات

 

إني مع السلامة ويبقى گلبي وياك عبر المحيطات

 

 

يمه .. يمه  يبقى   وي سنين عمري الباقيات

 

أسمچ علم أفتخر بيه و رفعة رأسي والهامات

 

أسمچ علم أفتخر بيه و رفعة رأسي والهامات

 
مع كل رنه هاتف يأتي من العراق تتسارع النبضات والخوف والترقب يسيطران على دقائق المكالمة.

 
مهداة إلى كل العراقيين المغتربين عن الأهل والوطن والأحباب

12 / 11 / 2012 م