سوالف معيجل فانتازيا عراقية

التفاصيل

تم إنشاءه بتاريخ الإثنين, 10 كانون1/ديسمبر 2012 11:26

        سوالف معيجل فانتازيا عراقية بقلم - إيمان ألبستاني
تعريف: شخصية معيجل.. مجنون الاهوار هو من تراثنا الاهواري الذي لا ينسى...

 أبو نجيبة - صبّحك ألله بالخير أخوي أبو ضوية
أبو ضوية - وي مية هلا بهل ألصباح .....تعال هنا أگعد يمي ....وليدي عليوي فد أستكانين چاي
أبو نجيبة- هاي شلون صايرة ألدربونة لخة .....كلها جهال وزعط وصفگة وعياط ورا معيجل
أبو ضوية - أي .....خطية هذا معيجل ....تخبل تالي وكت ....أي وألله صارت ألهوسة قريبة ....لازم وصل يمنا ....معيجل .....يا معيجل ....تعال هنا بابا
معيجل : شتريد ....ما دريت ترا صاير أنقلاب وثورة يم قصر ألرحاب بالاذاعة كل شوية راگعينا ببيان ..ألدبابات سادة ألطريق .....وألسحل بالشوارع .. وألتعليك بفلس عالجسر
أبو ضوية  - دأگعد هسة ......أگعد أرتاح .....ياأنقلاب؟ ....ترا راحت أيام ألانقلابات  ... راحت رجال ألحامض ألسماكي!!
أبو نجيبة -لا عاب حلگك ....وظلت رجال أل بالعصا تنساكي
معيجل - أبو ألطبر .....شفته أخذ مخضر من ألصدرية .....بعد لاتحجي عالنائب ....أفتهمت ....ترا يسفروك تبعية
أبو ضوية - لا أله ألا ألله .....هاي شغلته معيجل ....يسردها سرد مال ٥٠ سنة يلا يرتاح
معيجل -ألاجهزة ألدقيقة جابت حاسبات ماركة لؤلؤة  ....وألعالم طلعوا مسيرة يريدون حرب ويا أيران ....وأخذوا نوط شجاعة علمود وكفوا سرا على لحم ألروست وكت ألغارة....أكول ...وين وكع ألصاروخ
أبو نجيبة - على رأسنا ....عليمن تريده يوكع يامعيجل
معيجل - كلها راحت أسرى ومفقودين ....دأكولة راحت ألفاو مايصدك ....راحت من ورا ألطابور ألخامس وطلعوا بالاخير كلهم فرارية جابوهم ملفوفين بعلم
أبو ضوية - شلون راح يطّلع ألقضى وألمضى ....أي وبعدين
معيجل - مس بوشي ٨٢ مال نواب ألضباط .....أجيت بيها ....شلون عليها محرك ....تكول طلقة ....بس ألعيادة طلعت معزلة مال ألطبيب ... ماخذينا جيش شعبي وسيارته ألمارسيدس ألنفخ مال ألطيارين أنطاها للآمر
أبو ضوية - لاحول ولا قوة ألا بالله .....كمل أغاتي
معيجل - أي أيام ألفردي وألزوجي ....دينطون طبقة بيض لكل محافظة .....تقشف علمود ألمؤتمر ألقطري ألسابع ....أللي صار بمعارض ألبياع ....وين ألسيارة مال ألدكتورة أللي ما ماشية وساكنة بشقة فوك ألعيادة ...ومثقفة حيل  ....ثقافة قومية بس عانس وخشمها أعوج
أبو نجيبة - أتفضل أغاتي ....شلون خيط وخرابيط
معيجل - فايدة وسنجار يوزعون بيها كلوصات سومر أبو ألجيس ....علمود خلصت ألحرب ....أحنا أنتصرنا بالحرب لو لا ؟؟
أبو ضوية - لا أله ألا ألله ....تگدر تگوله لا ....مو ديحچي صدك ...أي معيجل وبعدين؟؟
معيجل - بس لايضربونا نووي .....لا .....راح يضربونا بحصار أقتصادي .....بحرب ألكويت أنتو وين جنتو  ? بالنجف لو بسليمانية ...لايظل بالكم ....ماكو كهرباء ....بس أحمو ماي ....يكولك بغداد أنهجمت .....أكيد راح يطْيروه .....ماطار ....مذكرة ألتفاهم عدموا بيها ألتجار مال ألحملة ألايمانية
أبو نجيبة - وألله قابلية .....حافظها كلها بدماغه
معيجل - أني أدز ورقة بالشهر لأهلي ....أمورهم عدلة ....أبيش ألدولار بالحارثية ....ترا فاتو  هسة فريق ألتفتيش .....لؤي ....تعرفه ...مهندس بس يشتغل سايق بلUNعلمود أسلحة ألدمار ألشامل ....ترا ألامريكان جايين جديات هالمرة
أبو ضوية - لاتضوج أبو نجيبة  ...راح يخّلص وصل للامريكان ...سود ألله وجههم
معيجل - لا بابا لا .....كلها هجت للسويد ....سوسو ...ترا خوش قجغجي ...وأنت كاعد بحضن أمك يوصلك وين متريد ....مضمون يطير وياك وعنده ألجوازات ....بس أذا صحته بأسمه سهيل يطنكر ويسد ألنقال .....لو ألامريكان أشراف جان سووها بحرب ألكويت .....بل ٢٠٠٣ ماظل زيتوني بالشارع ..عجباً وين صارت بدلات ألزيتوني  وألاقلام.....محد يعرف...... لا سنة ....لا شيعة ....وتاليتها راح ألوطن بأرخص بيعة ....وألله يمكن يرجعون ألملكية
أبو ضوية - حتى ألملكية بعد ما تتلاحگنا
معيجل - بابا ....أمريكا ما أحتلت  بلد ألا وتطور ...خوب شفت ألتطور أللي سووه بسجن ابو غريب ....دير بالك ....مفخخة ....حرب أهلية ....لا .....أهل حربية ....طكت .....ومن ألتمت ألعالم طكت أللخ ......شسمك ؟ أني علي بالنجف..... بس يدلعوني عموري على حدود طريبيل...حكومة تكنوقراط ...  وين أكو حرامي وخايس دخل بألانتخابات ....دستور مسودن .......صحوة ....قشمرة ....أصبع بنفسجي ....محابس ....لطم ...مراجع عظام .....خمط ....رعب ....طكوه ....لا ....خطفوه ...هدوه....لاماهدوه ..حطوه بصندوك ألسيارة وكبل لجامع براثا .....كاللهم أني مسيحي بس أحب أسمع عبدالباسط .....گالوله ....أنچب ولك عبالك أحنا ألمكون ألاخر ......جبار أبو ألنفط .....صاير تاجر بعمان وبيته أكو مهبط مال طائرات ....كل ألعقود تندار ويا ألثريد ....... محيسن أبو ألغاز....صاير أحوال وألليل كله منبطح على كرشه عنده فيسبوك .....يتحجج مية حجة حتى يطلك مرته سعدية...تگول چنها سعلوة يستحي يمشي وياها بمول مكة ....خالها للفواتح بس..
أبو ضوية - وألتالي وين نولي؟؟
معيجل - أذا عندك تومان لو همر بالمنطقة ألخضراء ....أمورك تصير عدلة .....لو نائب بالبرلمان .......لو تروح يم ألاكراد .....وألله هذولة ألاكراد لا طلعوا سنة ....ولا شيعة ....بس أربيل صايرة تخبل....بس ماتفوت ألا بفيزا وكون تحگي بلبل كردي ....لو تگول أني أبراهيم تاتلس
أبو نجيبة - أشو وين راح يوصلنا معيجل؟؟
معيجل - بيش تريد توصل عمي ....هية وين ألخدمات ..فرهود أكشر ....شايف واحد يبوگ بيته  .....ذولة حواسم مال ألديمقراطية ألجديدة ......من طاح حظچ أمريكا .....ألكل تنهب .....مذهب ألحلو ....تريدلك شريف ماكو .....وهسة ألكل واگفين على مسافة واحدة من ألاسد بس يوگع كلها تصير جريدية ....بس شيوگعه ....ألمولدة بظهره ....مو ألوطنية

-أبو ضوية - هاك عمي هاك مصرفك وروح لأهلك ....كافي تسولف!!

أبو نجيبة - أني هماتين رايح ....رأسي أنسطر سطر .... يعني كل هذا جرى بينا وماتخبلنا مثل معيجل ...قادر ربي .....أني رايح أودعناكم..!