أنا و الچلبي ...

التفاصيل

تم إنشاءه بتاريخ الجمعة, 13 تشرين2/نوفمبر 2015 20:28

كتب بواسطة: حبيب العربنجي

                                   حبيب العربنچي

ما تصير إلنا چارة حتى لو عرفنا نلعب دوبارة، نحب الجيف مثل نسور الكومودور، بس ننتظر واحد يصير جيفة حتى تشتغل الأفلام ويشتغل الچذب... طلع الكل عدهم ذكريات عظيمة وي الچلبي، من هنري كيسنجر إلى عزت الشابندر رغم الفارق الذهني بين الإثنين، ومو بعيد، راح نشوف ونقرا إن الچلبي گعد مرة في مطعم كبة أبو فتاح بباب الشرجي ، لو گعد يضرب ثريد باگلا في قدوري، ويجوز وگف سرة حتى يحصل على لفة فلافل عد فالح أبو العمبة، لو يطلع أبو بنزينخانة أبو أقلام ويگول ويحلف شلون الچلبي وگف سرة حاله حال الناس وهو يريد نفط بشهر كانون وه ما لابس بهالبرد غير فانيلة أبو التعلاگة.

أبو العمامة واللحية طلع وقرا جنجلوتية عن علاقته وي الچلبي، والرفيق أبو فلاديمير طلع بيان عن ذكرياته وي الرفيق الشيوعي غير المعلن الچلبي، وإحتمال راح تنزل هيفاء وهبي أغنية إسمها ( چلوب حش صاحبك عني) إهداء لذكرياتها وي الچلبي خاصة إن الچلبي من رواد الضاحية الجنوبية من بيروت. ويگولون حتى صدام سجل شريط من گبره ودزه وراح يطلع الشريط لو عالشرقية لو عالبغدادية عن ( ذكرياتي وي الچلبي من أكلنا اللبلبي – أوراق من السجن) .
بس من بين هاي الذكريات نجي على ذكريات بنت الدملوجي وي الچلبي، صدگ مغثة فايف ستار. من تجي تقراها ، إذا صدگ لو چذب مغثة، نشوف نص البلد صاروا لاجئين وهي الدملوجي والچلبي ما عدهم شي يسولفون بيه غير تصاميم أثاث إللي يسوويها المصمم ( فرانك لويد رايت)!! والناس طامسة بالطين في الخيم ومخيمات النازحين والبلد مهتوك ومشگوك شگين. نقرا في ذكريات الدملوجي شلون هي من تروح عد الچلبي في قصره إللي تسميه ( السيف) ويگعدون يسمعون الموسيقى !! حتى ما ينزعحون من آهات الفقرا وبكاء الأطفال. نقرا شلون بكل مرة چان الچلبي يشوّفها لوحة جديدة (إقتناها) ، طبعاً من بوگ المتاحف الفنية العراقية ، عندك من مركز صدام للفنون إللي إنباكت بنفس اليوم مال بوگ وسرقة المتحف العراقي إللي لو ما إبن الچلبي ما چنا نشوف هيچ يوم ! ناس ما لاگية ستر وغطاء وهم حايرين أثاث عالمي لو بالموسيقى أو بسرقة اللوحات.
نقرا في ذكريات الدملوجي، إن هي ( العراقية) وهو الچلبي (العراقي) كانوا كل مرة من يگعدون يسولفون عن الحضارة الفارسية والتراث الإيراني والسجاد الإيراني، والناس بالعراق تفرش كراتين البيض وتنام
عليها وتتغطى بالنايلون ! والمقاام العراقي والتراث العراقي سرقها الملحنون العرب وماكو جهة تطالبهم بالتعويض لأن الجماعة مشغولين بتراث غيرهم.
ويبدي الخرط، من نقرا أن الچلبي چان يريد حماية البعثيين من طلع قانون إجتثاث البعث !!! على أساس گايللها آني ردتهم يطلعون حتى لا أحد يكتلهم ! مو أنت يا أبن الچلبي كتلت شعب وذبحت وطن ودمرت كل شي بالعراق حتى تطلع البعثيين هسة صرت شريف براسنا وتريدهم يطلعون ويفلتون! ما أعرف الدملوجي يمكن چانت تاخذ حبوب هلوسة گبل ما تروح عد الچلبي في قصره. بس أحلى شي من نقرا أن الچلبي چان يقضي كل وقته في مسبح قصره والناس غرگانة بالخيسة !! من غير ما نعرف هي چانت تشاركه هذي الهواية لو لا ! ويجوز چانت إهتماماتهم هي نفسها في موديل المايوهات مثل ما هي نفسها في حب تصاميم أثاث فرانك لويد رايت !
ومن منطلق المسؤولية التاريخية وحماية الوثائق الوطنية ، أعلن أنا أيضا حبيب العربنجي ذكرياتي وي الچلبي، أذكر إحنا چنا عايشين بوطن صح عليل ومريض بس مثل ما تعرفون أب مريض بالبيت أفضل من بيت بلا أب، ذكرياتي وي الچلبي أن إجى وكتل هذا الوطن العليل وصرنا بلا أب، ومن ذكرياتي وي الچلبي چان عدنا وطن واحد، همين صح عليل ومريض بس چان واحد، إلى ان جاب الچلبي مگص الطائفية وي الدبابات الأمريكية وحول الوطن إلى جيوب وبنطلونات وقمصان كل حسب الموديل لأن هو چان كشاخ ويحب موديلات الملابس.
ودتشوفون الرجل ناطي لكل واحد حقه، عربنجي وي العربنجي، وصاحب مزاج وي الراقصات والمغنيات ، ورئيس عصابة وي أهل العصابات وسرقة البنوك، وفنان تشكيلي وي أهل اللوحات وبيع اللواحات المسروقة، ومهندس معماري من توصل الشغلة إلى إستملاك بيوت وسرقتها، وبعثي وي البعثيين، شيوعي ويالشيوعيين ، كردي وي الأكراد، أكيد هو مكتشف الخلطة العجيبة إللي هي أساس معجون المحبة !
بس رغم إن هو چان ألوَت واحد بالشلة إللي جونا في 2003، بس هو همين أول واحد بيهم إنصاد، وشلون صيدة، من منگاره، لان مثل ما تعرفون الطير النچر ينصاد من منگاره، والچلبي نقطة ضعفه چان منگاره، ...أكيد الحچي واضح من غير ما نعدل الأريل .
المهم هسة إن عزرائيل لگف راس الخيط...وراح يبدي يحوك بلوزة الموت ، بس أشوية أشوية... حتى نلحگ نصفط الچذبات تحت بند: ذكرياتي وي الراحل أو الراحلة !
گولوا يا الله....حتى عزرائيل يتوفج في المسعى... والله الموفج.