الراتب ..... بركة!!! واذا متصدكون شوفوا التفاصيل

التفاصيل

تم إنشاءه بتاريخ الأحد, 27 كانون1/ديسمبر 2015 19:15

كتب بواسطة: موظف عراقي

الراتب ..... بركة!!! واذا متصدكون شوفوا التفاصيل؛بقلم موظف .....مهتوك!

مقدار الصرفيات الشهرية بآلاف الدنانير:

- 300 ألف: ايجار .. كَعدت بطابق ثاني .. خو مو اروح اكعد بالتاجي لو بالمحموديه؟
- 20 ألف: أجور مولدة، سحبت بس امبيرين كوللش كافيه للثلاجة والتلفزيون والاضاءة!
- 50 ألف: اشتراك نت .. ( مابيه مجال ) خو مو أعوف اصدقائي والكَروب مالتي ..
- 10 ألف: رصيد .. احاول اكضيهه ترميش ..
- 50 ألف جكاير .. ( خط احمر !!) ..
- 100 ألف لأمي الحنونه .. (دعوة وحدة منها تسهل الامور كلها) ..
- 125 ألف: خط لبنتي .. ادفعهن وامري لله لايخطفوهه ويكسرون وجهي ..
- 75 ألف: بانزين .. هم مبيهه مجال خو مو ادير للسياره سفن آب؟ ..
- 50 ألف: واجبات .. وأنا كاعد بمدينة الصدر وكل يوم شهيدين بقطاعنه ..
- 60 ألف: صمّون .. منا لما الله يسهلهه وام علاوي تتعلم تخبز (جذب) ..
- 30 ألف: طماطه .. بواقع ربع للزلاطه ونص لمركة الغده، وربع نشويهن بالعشاء..
- 10 ألف: بصل .. لتزيين الاطباق، واضافة نكهه، ووووو (لمآرب اخرى) !!
- 25 ألف: بيض بواقع 4 بيضات X ثلاثين يوم = 120 بيضه(تره سَلك موعبالكم) .
- 60ألف .. يوميات الجهال للبنيه 1000 وللوليد 1000 ( الله يخليهم ) .
- 10ألف: صابون وتايد وزاهي (نحاول نشيل الصابون ونرجع لاوراق النبك) .
- 17 ألف: غاز.. على ماندبر منقله نشوي الطماطه والبصل (من باب التغيير) .
- 30 ألف: للشكر والجاي ( كلشي ولا ذولي ) ..
المجموع 1,022,000 مليون واثنان وعشرون الف دينار عراقي (لاغيرها) .. مصاريف شهر تشرين الثاني ..
شبيكم لعد ثبرتونه ميكفي وميكفي، وتريدون تطلعون مظاهرات.. هاي مو آني كدامكم؟ راتبي مليون دينار ورتبت حالي عالسُلم العبادي الجديد ومثل مدتشوفون .. خيييير من الله .. شنو يعني انكَلبت الدنيا خو ما انكلبت ؟ إلا ملابس ؟ نكضيهه شلون ماكان .. الا طلعه ؟ الناس هي تجينه ... الا لحم ودجاج وسمج ؟ ( ناكل قززززرقط ) ... الا كيري وكرافت ؟ شبيه البيض (اكرر السلك) .. الا مكياج ؟ شبيه الديرم ... الا شامبوات ؟ شبيه التايد .......
شعب بطران، شعب متذمر .. شعب ميبوس ايده وجه وكُفه .. شعب يدوّرلي سوالف تعبانه ... اصلاح هي مال اصلاح!!!

أخوكم موظف زهكان... ومهتوووك