حسنة أم اللبن ..

التفاصيل

تم إنشاءه بتاريخ الثلاثاء, 29 كانون1/ديسمبر 2015 09:59

كتب بواسطة: شاعر العراقي

قصيدة سريالية رائعة لشاعر مجهول تتناول الوضع السياسي في العراق حيث اصبح كل من هب ودب سياسيا وفوكاها ماينكدر عليه .. هذه القصيدة الساخرة تعبر عن لسان حال الشعب المسكين الذي يأس من الجميع على ما يبدو .. كذلك القصيدة تنتقد الحالمون بالسلطة و الحكم .. و قد تصبح هذه القصيدة نشيد وطني بالمستقبل ..
     

عدنه شلون دولة وبيها حرية
حسنة ام اللبن صارت سياسية

    حسنة شلون لعبت بالخلگ طوبة
راحت للسياسة وعافت الروبة
    الفضائيات كلها عليها مگلوبه
    وامريكة ياربي بيها مسبيّة
    حسنة ام اللبن صارت سياسية

    حسنة لفلفت كلشي بعبايتها
    وسبعتالاف من تمشي حمايتها
    بسوگ العورة متشكلة وزارتها
    وحكومتها حكومة محو اميه
    حسنة ام اللبن صارت سياسية


طلابتنا چبيره وحسنة حبابة
واوباما يگول هي تحل الطلابة
حسنة للحكم صعدت بدبابة
وگامت ترسملنه خطط امنية
حسنة ام اللبن صارت سياسية

ياناس على حسنة بعد مانعتب
لان مگرودة لا تقره ولا تكتب
ملتهية تفرهد بينه وتسلّب
وحصتها بنفطنه ألف بالميّه
حسنة ام اللبن صارت سياسية

ماندري ويه حسنة شلون تاليها
ياناس وتعبنة من بلاويها
لان دولتها حاميها حراميها
حظنه الوگعانه بحلگ واوية
حسنة ام اللبن صارت سياسية

گالوا حسنه راح تعالج الاحباط
وتذب شيلة فگرها وترد تلبس قاط
وتأسس حكومة كلها تكنوقراط
وتعالج بناء البنى التحتية
حسنة ام اللبن صارت سياسية

لبست قاطها وتسودنة حسنة
وردّت تزمّخ علينه وتفارسنه
درجعي للبن مو خرب واهسنه
عساها بّخت من سواچ حزبية
حسنة ام اللبن صارت سياسية