حچاية التنگال ١٤٥

التفاصيل

تم إنشاءه بتاريخ الثلاثاء, 15 آذار/مارس 2016 06:40

كتب بواسطة: د.سعد العبيدي

                       د.سعد العبيدي

المثل العراقي يگول ذيل الچلب ما ينعدل، وأهل گبل خلو أربعين يوم وگالو ما ينعدل عبالهم الأربعين هواي. خطيه غشمه. والله لو يطلعون من گبورهم هم ما ينعدل. وأگلكم ليش:

ضابط شرطة مرور بالكرادة يبين مسلكي، لو مشتري الرتبه. وگف السيارة، شاف الحزام مربوط مثل حبل التبليهَ.
سأل وين المثلث؟.
أشرت عليه، باوع على الاجازة شافها مجددة وأوراق السيارة كلها كامله مكملهَ.
افتر على السيارهَ وگام يصدر أوامر عبالك لچمن:
اعلگ عالي، ناصي، شافها تمام. أخذ فره ثانيه داير ما دايرها، مالگه حتى خدش.
صفن إگبالي وآني مطوّله خلگ أريد أشوف تاليها.
طلع من صفنته وگال:
يعني إشلون ما نغرمك.
گتله لا، واتحداك اذا لگيت مخالفه لو شي يستحق الغرامه.
ولمن يأس صار ظريف وگام يتطارف، آني هم استغليت الموقف وسألته:
ليش هالنگرزه مو من عوايدكم؟.
گال أگلك وما تضوج.
يابه دگول. فگال:
والله مو بيدي، إحنه مرات يجينه أمر من فوگ يگولون بيه علناً يعني بالمفتشر (جيبولنه حالات - يقصدون غرامات - إشگد ما تگدرون)، واحنه هم ما نصدگ، عاد نگوم إنبيس بالناس.
گتله هاي مو جديدهَ عليكم ولا علينا.
گال إشلون.
جريت حسرة وگتله تتذكر بالتسعينات بأيام الحصار الأگشر هم گامت المرور تدور دفاتر عتيگه وراحت تغرم الناس عامي شامي.
گال إي شنسوي احنه عبد مأمور.
گتله گبل ما اروح اريد أسألك سؤال بس لا تزعل.
گال لا يابه شزعل بعد ما كشفتلك كل اوراقي.
گتله تعتقد ذيل الچلب ينعدل؟.
ومن شفته ما إفتهم قصدي وانعقچ اشويه عفته ومشيت وبقيت أدردم ويه نفسي وأگول أبد ما ينعدل لو أربعين سنه.