هلا بريحة هلي

التفاصيل

تم إنشاءه بتاريخ الخميس, 17 آذار/مارس 2016 18:51

كتب بواسطة: مثنى عبيدة

مثنى عبيدة

هلا بريحة هلي

كوردي تركماني عربي كلها إلي
مسيحي صابئي مسلم حنبلي
من الفاو للعمادية للشوملي
فلوجة موصل  بغداد ومندلي
ربعي وأعمامي وأخوالي وهلي
هلا بريحة هلي
أذكر جيران المحلة وصديقاتي ومنزلي
الچوبي بالشارع ويا حلوة هلهلي
بالشارع ويا حلوة هلهلي
أمهاتنا مجمعات ويا بنتي تجملي
اليوم عرسك ِ وشتريدين تدللي
أشبكي أيدك بيد زوجك ِ وتقابلي
وأمشي وسط الناس وتوكلي
على الله نعم الحارس والولي
الله يا ريحة هلي
وصتني أمي بالخير والمحبة تعاملي
العراق وطنا بيه تجولي
الجنوب طيبة وحنان شيعة علي
الغربية كرم ونخوة بيوتنا بيها تفضلي
كوردستان الجمال افرحي و تمايلي
قران .. أنجيل .. توراة .. بيه آيات رتلي
أهلك ِ العراقيين شجرة بيها تضللي


الله يا ريحة هلي
أختي العراقية حقك ِ تنقهرين و تزعلي
وما تصدكين وما تتخيلي
وأنا مثلك ِ حين تتكلمين وتنفعلي
على ما يجري بالعراق بيتنا الأجمل ِ  
نبع الرحمة منه ننهل وتنهلي
الدنيا تعرفه وتعرف حضارة البابلي
الله كريم خيتي يرجع وترجع كل هلي
لان والله والله ماكو مثل هلي
الله الله يا ريحة  هلي
الله الله يا هلي
ربعي وأعمامي وأخوالي وكل هلي
ـــــــــــــــــــــــــــــــــ
الإهداء إلى أختي العراقية السيدة ( إيمان قاشات ) التي كلما زرت عيادة طبيب الأسنان التي
تعمل فيها تستقبلني بعبارتها العراقية الجميلة
هلا بريحة هلي / وهذه هو شعور كل عراقي وعراقية تجاه أهلهم العراقيين الشرفاء دون تميز ديني أو مذهبي لأننا هكذا تربينا كلنا أخوة وأبناء وطن واحد هو العراق الأصيل
17 / 3 / 2016 /م