حچاية التنگال ١٩

التفاصيل

تم إنشاءه بتاريخ الإثنين, 28 آذار/مارس 2016 06:52

كتب بواسطة: د.سعد العبيدي

                          د.سعد العبيدي

يگلك ليش تحچي وتضوج نفسك والناس الي حواليك. وإچماله يگلولك إمشي بصف الحايط، ولا تگول حلگ السبع جايف. هذا اشلون حچي مو يفطر الگلب.

تره بقينه اسنين ودهور مچلبين بهذا الحچي وطلع ما بيه فايده، وكأن المي يمشي من جوانه وما ندري.
لا يابه لا، مو هو هذا الحچي الصحيح الي يبني أمم.
الحچي الصحيح، لازم آني احچي وانت تحچي ونوفه تحچي وحجي إجعاز يحچي، بس كون الحچي كله صدگ، مو تصفيط وإتكرفت واتهام وتسقيط مثل ما دا يصير ببعض القنوات الفضائيه العراقية الي تحط فوگ النار حطب، وتريد بس تشعلها وتسوي حريق بعد ما يطفيه كل الحچي. يابه والله لو احنه حاچين الصدگ من الأول چان بعد ما احتاجينه نرفع صوتنه، ولا إنعيط وينبّح صوتنه، ولا نهذري ويروح صوتنه، وچان عشنه بثبات ونبات وعسانه لا خلفنه لا ولد ولا بنات بهذا الزمان الي ما ينفع بيه لا ولد ولا تلد. والي أريد أگوله اليوم بعلو صوتي قبل ما ينبّح، منقول عن أساتذه بجامعة بغداد. گالوا:
دزتلنه الوزارة واحد تنسيب "أكيد ما عنده واسطه". عود يگولون دكتوراه بعلم النفس، بس الفايل والأوليات مالته تلفها النظام السابق. هم ميخالف كلشي يصير ولو ما تنعقل.
سألوه يابه إسم اطروحتك: نسيت.
منو ناقشك: ما أتذكر.
منو المشرف على رسالتك مال الدكتوراه: مات.
أحد يعرفك بمجال علم النفس: اي نعم د. فلان.
راحوا للدكتور فلان، حلف يمين گال ما أعرفه.
المهم كتبوا للوزارة هذا مشكوك بأمره وميصير يتعين ويدرس. إجاهم الرد:
لا تسئلون بعد ولازم يباشر. وفوگها رفعّوه طفره وحده من مدرس الى أستاذ، وحسبوا خدمته من الثمانينات لليوم، ولأنه مو دكتور وما يعرف الدكتره راح  گعد ببيتهم ما يدرس ويقبض أربع ملايين.
إيصير؟. لا ميصير. يمعود دروووووح.