حچاية التنگال ٢١

التفاصيل

تم إنشاءه بتاريخ الجمعة, 01 نيسان/أبريل 2016 10:03

كتب بواسطة: د.سعد العبيدي

                        د.سعد العبيدي

لو إحنه اليسمونه الشعب جهال منفتهم، قشامر، ينضحك علينه بسرعه.
لو همه اليسموهم مسؤولين إزغار، يعتقدون ديضحكون علينا، ويقشمرونه بحچايتين.

لو الدنيا مال هلوكت الأگشر عوجه، تمشي عكرفلوي، خلتنا إزواج، وخلتهم إزغار ويحاولون يستزغرونه.
لو أكو فد قوة بهذا الكون، عقلنا بتكوينهَ الحالي بعده قاصر، ما يگدر يعرفها، ذابه علينا اتراب ادريس وخالتنه مدوهنين كلشي ما نفتهم، من الي صار والديصير والي راح يصير.
لو الله سبحانه وتعالى ما راضي علينه، لأننا بس نحچي وحچينا بوجهين وماصخ، وما بيه كل فايده، ولا راضي على عبادتنا إلي صفت بس مظاهر "محابس وتصفيط حچي" وگعده على الكراسي، وهو بجلالة قدره، رايدها تصير هيچي سوده إمصخمه، حتى نحس على نفسنا، ونشوف دربنا ليش ماشين بالأعوج، بلكت إنتوب وانصحح مشيتنه.
لو هي وحدهَ من علامات الساعه، الى يگولون يظهر بيها جيل دعدع:
ياكل ميشبع، تدزه ميرجع، تحاچيه ميسمع.
والا اشلون إنفسر بعض وزراء مال هلوكت الصعب، ينحمقون فجأة، ويهرولون الى الأمام على أساس دا يجارون الشعب المحتج، ويصلحون البنيان الغلط، عن طريق تقديم الاستقالات،  بس ها قدموها الى رؤساء كتلهم، مو لرئيس الحكومه.
يرحم أبوكم وأبو كل طيب بهالشعب الي ما شاف راحه من ستين سنه لليوم، جاوبونا على هاي الأسئله:
الوزراء الي قدموا استقالات لرؤساء كتلهم همه ويه الحكومه ورئيسها، لو ضده؟.
يريدون باستقالاتهم بهاي الطريقه الزگزاگ يصلحون الخربان الي معظمهم مساهمين بيه، لو يسعون من جوه العبايه الى عرقلة الاصلاح؟.
الصدگ المسألة تحير وآني عن نفسي كلشي ما افتهمت من خطوتهم هاي.
علواه لو واحد يفهمنا، وهم يقصر علينا الطريق ويگول ترى الي صار علامه من علامات الساعه حتى على الأقل نصلي من صدگ.