ألحشيش ألعربي..فانتازيا عراقية !

التفاصيل

تم إنشاءه بتاريخ الأحد, 30 كانون1/ديسمبر 2012 22:53

                                                         إيمان البستاني                                      

 الحشيش ألعربي/فانتازيا عراقية - بقلم إيمان ألبستاني

  
 
أبو ضوية - أگول أبو نجيبة ....دتسمع بهاي ثورات ألربيع ألعربي
أبو نجيبة - أي .....شبيها؟؟

أبو ضوية - لا  مابيها شي ....أگول يمتة نسمع ثورة ألربيع ألعراقي
أبو نجيبة -  لا تضحكني بروح أبوك ....وأني شالع رحاتي ...شلون ...شگلت ....ربيع عراقي ....معلوم ....هو صار من زمان بس أنته ماواعي عليه
أبو ضوية - يمتة بروح أبوك ....صدگ صاير ربيع عراقي
أبو نجيبة -  بثورة ألعشرين ...قبل ٩٠ سنة ....وماصار بعدها شي ينفهم
أبو ضوية - شلون فاتتني ....أي أدري بثورة ألعشرين ...أني دأحچي  على هالوكت ....مو مابقت ....ألگرعة وأم ألشعر صار عدهم ربيع عربي ....ألا  أحنا
أبو نجيبة -  أنطيني هسة زلم مال گبل ...مال ثورة ألعشرين ...وأني أضمنلك ربيع يخبل ....كله حشيش ...منين أجيبكم  أبو ألجون وألضاري وألحفيد
أبو ضوية - أگول أبو نجيبة  ....هية شلون صارت ....وعلگت هالعلگة ...ترا معجزة ...كل ألعراق هب هبة وحدة
أبو نجيبة -  لا معجزة ....ولا بطيخ ....چانت ألزلم عدها غيرة على وطنها ...وتفتهم ...عرفوا أول ما طبوا ألانگليز للعراق ...وجابوا وياهم سالفة شيعة وسنة ....أول ماوگف بوجههم جعفر أبو ألتمن ...كاللهم ...ولكم ملاعين ألوالدين  أبلعوا لسانكم احسنلكم ...حنا كلنا عراقيين وبس
أبو ضوية - شريف والله

أبو نجيبة -  خوب ألرجال جعفر أبو ألتمن شيعي أباً عن جد ودرس بالكاظمية على ايد الخالصي ...حتى دزوا عليه بالنجف ...تعال دنسوي تحالف شيعي ...گال ...لا أجي ...ولا أوصل ....عيب هالحچي

أبو ضوية - أي ذولة بيت ألخالصي اشراف ولد أشراف ..ولحد هسة ...هسة ألكاظمية بيد فلان وفستكان ...يگولك ما تمشي بالكاظمية سافرة ...زين ...تمشي متر تسمعهم يصيحون وراك ...متّع ...متّع ...بورقة والمرا من عدنا ....أيا با على هالزمان...أي يعني ما ترهم تعلك هسة
أبو نجيبة -  أگوله ثور ....يگول أحلبوه ....عمي زلم أشراف جانت ...ماتقبل ألحيف ....من ريحة ألنخوة واحد يناوشها للاخ ...بالرميثة عشيرة ألظوالم شالوا رايات ألحرب على ألانگليز ..گام ألحاكم ألعسكري ودز على شيخهم شعلان أبو ألجون ...وگام يرزل بي ...وين يقبلها الشيخ بهدل ألانگليزي بهدلة ...گام ألانگليزي وحبس ألشيخ على يدزه للديوانية بالقطار ...الشيخ التفت عالمرافق مالته وگاله أريد عشر ليرات عثمانية قبل مايمشي ألقطار
أبو ضوية - شيسوي بالليرات ...ها ....عرف بنفسه محبوس وأحتمال ينرادله مصرف
أبو نجيبة -   لا يابا لا ....يا مصرف شنو رايح سفرة ...أبن عمه ألشيخ غثيث ألحرجان عرف مقصد ألشيخ ....ودزله عشر تفاگة ....للمغرب ألشيخ أبو ألجون بمضيفه ...وصاح بربعه ...

حل فرض ألخامس گوموله

أبو ضوية - أي عفية شلون سباع
أبو نجيبة - ألهتلية ألانگليز گاموا قصفوا ألرميثة بالطيارات
أبو ضوية - هيچ لعد علگت ...وبعدين؟؟
أبو نجيبة -شيخ زوبع ألشيخ ضاري ألمحمود ...دز عليه لجمن ألقائد ألعسكري وگام يتعنفص برأس ألشيخ ويتفتف بهدومه ...على أنتو قطاعين طرق ...ذاك بعد عيني ...ماأنتظر ...وخصمها بساعتها ... أنطاه أياه  ترس بالگصة....وهز لندن وبجاها أبو سليمان ...گاموا السرسرية ألانگليز قصفوا خان ضاري وسووا القلعة مالته ويا ألگاع
أبو ضوية - أي هسه حفيده يگولون عليه ارهابي ...ما استحوا من تاريخ جده ...ماتشوف ألرجال نفض عباته وهج
أبو نجيبة - أي مو أنت تحچي ألصخر ...وراها فزعت ألمشخاب عشاير أل فتلة وأل شبل وآل أبراهيم ...هجموا عالباخرة ألحربية ونعلو سلفة سلفاهم
أبو ضوية - يايابا ...يابوية ...أدري هما شعدهم ذاك ألوكت حتى يگومولهم بالطيارات والبواخر
أبو نجيبة - ربعنا وداعتك بطرك ألفالة وألمگوار وجم تفگة ...وراها عقدوا مؤتمر بالكوفة على اساس هدنة ويا ألانگليز ٤ أيام ...وين أهل ألكوفة بثالث يوم هجموا على ألسراي وطلعوا فتوى ...أللي ماينظم للثورة كافر
أبو ضوية - سبحان مغير ألاحوال ...لعد ليش ألفتوى أنگلبت هالايام ويا ألامريكان ...صار أللي يقاتلهم كافر
أبو نجيبة - بالكوفة ...ألحامية ألانگليزية حاصروها ٣ أشهر حتى ألمدفع مال ألانگليز أخذوا وكاموا يقصفون به ألانگليز ...ولو أول أيام ماعرفوا شلون يشغلوه ...بس وراها وگعولهم دك
أبو ضوية - وألله فلم ولا صاير ...يعني لا ناتو ساعدهم ولا دول مجاورة
أبو نجيبة - يم قناة ألرستمية في ألرارنجية يم ألكفل ...صارت معركة گشرة ...هبت عشاير عفك والدغارة وگاموا شلعوا سجة ألقطار ...بهدلوا ألانگليز بهدلة تعجبك
أبو ضوية - ولا تنمل هالسالفة كلها مرجلة
أبو نجيبة - ألسيد هادي ألمكوطر ...أجى من ألنجف وحرض ألعشاير في ألخضر على مهاجمة ألانگليز ...وهماتين شلعوا سجة ألقطار ولزموا ألانگليز لزمة ألجريدية
أبو ضوية - أيام مباركة صدك
أبو نجيبة - بالنجف ألناس گالت للمرجعية ....أحنا ويا ألحرب ...ماكو صلح ويا ألهتلية ألانگليز
أبو ضوية -أي عفية ...أول مرة أسمع ألمرجعية تسمع من ألناس
أبو نجيبة -  يگولك ثلثين ألطگ لأهل ديالى ...عشيرة ألكرخية وبخالص عشيرة ألكبيشات وعزة نزلوا ألعلم ألبريطاني ورفعوا علم ألثورة ألعربية ...وأشتغل قصف ألمدن عليهم
أبو ضوية - وبالشمال أبو نجيبة

أبو نجيبة -  أجاهم ألشيخ محمود ألحفيد وألشيخ أحمد ألبارزاني ...ما گالوا وكتها أحنا أكراد وماعلينا ...شالوا چيس ألتتن وألتفگة وكضوا ألتوبة بالانگليز ...تاليتها ألانگليز نفوهم كلهم للهند ....أهل ألجنوب كلهم وگفوا ويا الشيخ محمود ويهوسون
ثلثين ألجنة لهادينا
وثلثها لكاك أحمد وأكراده
نسوان ألاكراد تبرعوا بذهبهم لثوار ألعشرين بخانقين ومندلي وبدرة والصويرة والحي والنعمانية ...وتهوس العالم
تجار ألحي فدوة ألشانة
أبو ضوية - شيجيبها ذيچ ألايام ...وألله فورت دمي
أبو نجيبة - هسة صارت قشمريات ولا تتسولف ...ومن ورا ثورة ألعشرين تأدبوا ألانگليز وگالوا خلي انحطلهم ملك ونخلص هاي نخوة وسباعية اهلنا گبل ولك ياأخوي ...أنگليزي گص ذيل چلب اسمه مرزوك مال فلاح من عشيرة أل أزرج ....گاموا ألعشيرة أسروا ٤ جنود انگليز ونزعوهم هدومهم حتى يكتلوهم بمكان ذيل ألجلب ...وگاموا يهوسون گدام ألضابط ألانگليزي
شمسوي الچلب ذيله الظهر ينگص؟
چا خليتله منه ثلث يو نص
امه اتريد تفخر گبل ما تخنص
من لحم الصوجر متخومه

                           جندي أمريكي في العراق.. من غير تعليق!!!!

أبو ضوية - أتفضل أغاتي ....هاي على ذيل چلب كل هالهوسة ...ونريد حشيش عربي
أبو نجيبة -  مخلص ألحچي عمي أهل گبل أخذوا ألخير وألحشيش وياهم وصفينا هسة بنص شوك ألحرامية وألعاگول...أرتاحيت هسة ....ايريد ربيع عراقي