مونة رمضان ..

التفاصيل

تم إنشاءه بتاريخ الخميس, 09 حزيران/يونيو 2016 20:22

كتب بواسطة: ايمان البستاني

مونة رمضان
من مسلسل  تحت موس الأيام
كتابة - إيمان البستاني

سيد رجب : علاوي وليدي ... وين صرت ... دروح بساع لخالتك أم محمد ... ترا وصتني عليك من طلعت الصبح ..استعجل ابوية .. باچر رمضان .. ورمضانك مبارك وليدي .. ربي يحفظك لأمك ... ويوم اللي نفرح بيك

علاوي : صار عمي ولو ماأفتهمت شي

سيد رجب : هذا لازم حچاية ... حچاية .. مايستوعب الحچي مرة وحدة .. ابني روح لبيتنا ..زين ..خالتك هناك تريدك خوش حچي؟؟

علاوي : صار عمي ...أروح لخالتي أم محمد ببيتكم ... زين ليش؟؟

سيد رجب : مو باچر رمضان ... زين ..آفتهمتها هاي ... وتريد خالتك غراض تشتريلها من سوك حنون ... هسة افتهمت؟؟

علاوي : شنو ماكو غيري يتسوك؟.. هسة صايرة لخة بالسوك

سيد رجب : أدري ابني .. أخذلك حمال أبو عربانة ... دشوفني آني الگهوة لازمتني ... ومحمد طلع من الصبح لشغله .. وخالتك زين لو رجليها توصلها لرآس الدربونة... ومرة محمد الجهال متعلگين باذيالها .. شفت .. ماعدنا غيرك ... ديلا ابني ..حزام ظهري

علاوي : صار عمي ... افتهمت ... اروح لخالتي وأگوللها .. عمي يريد حزام لظهره

سيد رجب:ولك ملعون ...دروح...والله تفتهم كل شي ..بس تريد تشلع گلبي .. ديلا انقلع
 
 أم محمد : هذا منو عالباب؟؟

علاوي : هذا آني خالة ..عمي يگول تريديني أروح للسوگ

أم محمد : هذا علاوي ... يمة دطب ... تعال وليدي .. متريگ ؟

علاوي : عمي دز على تكة من خضير ابو العربانة .. وأكلها كلها

أم محمد : داگعد وليدي ... هاي طاسة خاثر ويمك خبز تنور جديد .. بين ما أفهمك شنريد... يمة نجيبة حطيتي معجون الطماطة بالبستوگة

نجيبة مرة محمد : بلي عمة

أم محمد : يمة نجيبة ... لميتي البيتنجان اليابس وحطيتي بجيس ابو الخراطة

نجيبة مرة محمد : بلي عمة

أم محمد : يمة نجيبة ... نظفتي الرازونة من مخاطين الشيطان

نجيبة مرة محمد : بلي عمة

أم محمد : يمة نجيبة .. غسلتي چراچف مال گعدة الحوش بجويت آزرك

نجيبة مرة محمد : بلي عمة

أم محمد : دناوشيني مخاديد التجوة ... مال كعدة الحوش

نجيبة مرة محمد : بلي عمة

أم محمد : يمة وليدي ... علاوي .. خلصت ريوگ .. دگوم أخذ المخاديد لحجي جبار النداف ... وكوله .. خالتي تسلم عليك .. وتكول بلكت يندف المخاديد ويرجع يخيط حلكها .. كلها حلكها مفتوك .. ذولة جهال محمد يشمروهم مثل الطوبة

علاوي : بلي عمة ... أگول صار خالة هسة أوديهم

أم محمد : ديلا وليدي .. ترا ورانا مية شغلة
 
 

علاوي : هل هلالك يارمضان .. شهر البركة والغفران ... الله يساعدك حجي جبار .. خالتي أم محمد .. تكول بلكت يندف المخاديد ابو حلك المفتوك .. وإلا العب به طوبة

حجي جبار : أخذ مخاديدها ... وآني إلي روحة لرجلها سيد رجب واعاتبه

أم محمد :ها وليدي .. أشو رديت بالمخاديد؟؟

علاوي : حجي جبار يگول لخاطر رجلها سيد رجب .. آني أجي آخذ المخاديد

أم محمد : عجيبة .. زين ابني ... دآخذ هاي الجدورة والقروانات لمبيّض الجدور .. ترا صايرة سودة فحم .. وخلي يبيضها ويخليها تبرج
 
 
علاوي : هل هلالك يارمضان ... شهر البركة والغفران ...عمي الله يساعدك ... خالتي أم محمد تكول . .بلكت يا مسود الوجه تبيض جدورتنا

مبيّض الجدور : تعال أخذ جدورتها ...وآني إلي روحة لرجلها سيد رجب وأعاتبه

أم محمد : ها علاوي ... أشو ردن الجدورة مصخمة

علاوي : مبيّض الجدور يكول لخاطر رجلها سيد رجب .. آني أجي آخذ الجدورة

أم محمد : عجيبة ... هاي شبيهم اليوم ..صاير شي ... يلا طالما هو يجي ..خلصنا من شغلة... ابني هاي مرة محمد حاطة بالكوشر سجاجين عمية .. وجراخ السجاجين أبو صبرية .. واكف من الصبح براس الدربونة

 

علاوي : هل هلالك يارمضان ... شهر البركة والغفران ... عمي أبو صبرية الله يساعدك ... خالتي أم محمد تكول .. بلكت تحد السجاجين زين .. واذا ماحديتها كون الله يعميك مثلها

أبو صبرية جراخ السجاجين : اخذ سجاجينك ... وآني الي روحة لرجلها سيد رجب واعاتبه

أم محمد ..ها ولك ... أشو رديت انت والسجاجين شبساع؟؟

علاوي : أبو صبرية يگول لخاطر رجلها سيد رجب ..آني أجي آخذ السجاجين

ام محمد : شصار سيد رجب ... قايمقام؟؟ .. والكل تريد رضاه ... يلا ماعلينا ... وليدي ..من البارحة بليل كعدنا بالحوش .. وآني أكول شينرادلنا على رمضان ... ومحمد يسجل بالورقة .. وعمك يدك على رآسه .. أريدك تروح لسوك حنون وتآجر عربانة وحمّال وهاي الورقة وياك وهاي الفلوس

علاوي : دگولیلي شتردين خالة ... أخاف ما أعرف أقرا خط محمد
 

أم محمد : هماتين معقولة وليدي ... شوف ينرادلنا ... نومي بصره - طبقات قمر الدين وكلايد تين مجفف _وجوز _ولوز _ وجاي _ودهن _وتمن _ وبرغل ...ورشته ....وهيل ونشأ _وطحين _ و تمر _و حمص صحيح وحمص مجروش _وعدس _و ماش _ وطرشانه _ وكشمش وعلوجه -وشكر_ ولوبيا حمرا يابسه _وباقلا يابسه _وبهارات _ ودارسين

علاوي : حيل ؟؟؟؟؟...كل هذا راح ياكله عمي ؟

أم محمد : لا وليدي .. قابل عمك سعلوة .. هاي مونة رمضان .. مال شهر .. فطورنا وفطور الفقرا بالجامع

علاوي : يعني خالة تفطرون مرتين .. مرة بالبيت ومرة بالجامع

أم محمد : لا..وليدي ..أكو واحد يفطر مرتين .. احنا نفطر بالبيت .. وأريد تجي كل يوم قبل المغرب .. هماتين تاخذ فطور أمك .. وهماتين تاخذ فطور الفقرا بالجامع .. يصيبك أجر وليدي

علاوي : كل يوم خالة؟؟

أم محمد : أي وليدي .. كل يوم .. ديلا استعجل روح للسوگ قبل مايعزل ... اليوم لازم أحضر لعمك أول سحور ... تمن مطبك على رشتة وقمر الدين .. يگولون يطّفي العطش

 
علاوي : لون الحنة قمر الدين - شربت منه قمر الدين
بسحورك نشرب كل حين - لون الحنة قمر الدين
لف العرايس ملفوف - والصايم أصبح ملهوف
 
سيد رجب : تغني ملعون ... شسويت اليوم من مصايب .. مابقى واحد ما اجاني يعاتبني .. ولك ليش هيج ... ورحت للسوك .. لو هماتين وراك مصيبة لخ

علاوي : عمي يامصيبة .. ترست العربانة مسواگ .. وگلت لروحي عليش خالتي يومية تطبخ وتتعذب وآني أودي الفطور للفقرا بالجامع؟.. وداعتك عمي بوجهي گبل فرغت العربانة بالجامع والفقرا مكاتل عليها .. مرة وحدة ونخلص ..ها عمي شلونك بهاي الطلعة؟؟؟.