حچاية التنگال ٣٠

                                            

                           د.سعد العبيدي

ماضينا القريب ما بيه شي نفتخر بيه، والحاضر ماكو أتعس من الي إحنه بيه، وعلى هذا الحچي يكون المستقبل على گولة الشاعر موفق (الجاي بعد أنگس).

لكن خلونه نخالف هاي الحقيقة ونطلع اشوية من الهموم الغرگانين بيها للگوگه. وانشوف مستقبلنا بطريقة مختلفه نگلب بيها الفوگ حدر مثل ما يگولون، ونتخيل بلادنا سنة ٢١٠٠.
أيباه بهاي السنه دا أشوف أهل الجمجمة بالحلة واگفين يحتفلون على سطح أعلى ناطحة سحاب بالعالم بنوها بمكان المغيسل بمناسبة مرور سنه على تطبيق الاختراع الي سجله عالمهم گويش وزرع بيه شريحة بالمخ يگدر منها الواحد يدخل على النت يقرأ الكتب والاخبار من غير استخدام العيون، ويگدر يحفظ الي يقراه بالذاكرة مجرد يمر عليه. وبالاحتفال أعلن العالم الجليل گويش نجاحه بتطبيق (السينوسايت) وهو السفر الشعوري عبر الزمان والمكان، يعني وانت گاعد بمكانك تدخل على منظومة السينوسايت وتختار شتريد تسوي:
مثل تريد تسافر للمريخ ياخذك شعورياً وتعيش نفس خبرة السفر للمريخ، أي تحس بيها وكأنها واقعيه.
واذا تريد تتزوج حوريات هم تختار من أي مكان بالعالم والعدد مفتوح، لكن مشكلة هذا الاختراع هو اعتراض البرلمان عليه أخلاقياً، لأن رئيس حزب الأغلبية يگول هذا يخالف الشرع، لأن الزواج ميزيد عن أربعه، ويزيّدْ عدد العوانس، ويقلل الايمان لأن هواي من الشباب يصلون على مود الحوريات، فاذا صارن مضمونات بالدنيا عليمن يجازفون بالآخرة.
اهنا رد رئيس المعارضة وگال هذا نوع من الزواج الالكتروني مثل باقي الزواجات المسيار والمتعة والسفر الي دا تمارس وكلها مو حرام. ثم ماكو مشكلة عوانس لأن البنات هم يگدرن يختارن حوريين وهم بكيفهن قابل بس على الولد، وگال هذا ما يقلل الايمان وبالعكس راح نعرف منو ايمانه صدگ ومنو كلاوچي.
ودا أشوف بهاي السنة صارت جلسة للبرلمان رأسها اليهودي حسقيل رئيس حزب الأغلبية (حزب النخلة) ناقش الغاء وجود الجيش بعد ما مرت على البلاد ثمانين سنه بلا حروب، وطرح السيد حسقيل الاستفادة من تخصيصات الجيش لدعم مشروع مركبتنا الفضائية لدراسة الثقب الأسود، وحصل على الأغلبية بالتصويت.
وبهاي السنة اتفقت دول الشيعستان والسنستان والكردستان والتركمانستان والمسيحستان أن يجرون جميعاً استفتاء على عمل اتحاد بيناتهم يسموه عراقستان بعد ما تأكدوا أنو ماكو فايدة من الانفصالات الي صارت.
لا تستغربون كلشي جائز بهاي الدنيا!!.      

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

768 زائر، ولايوجد أعضاء داخل الموقع