حچاية التنگال ٤٨

التفاصيل

تم إنشاءه بتاريخ الأربعاء, 28 أيلول/سبتمبر 2016 19:59

كتب بواسطة: د.سعد العبيدي

                             د.سعد العبيدي

سالم أريد أطب للطبيب أشو مدَوهِسْ.
بعد شهر يالهَ يلحگك السرهَ.
هاي ٢٥ ألف.  
انتظر أدخلكْ بدل واحد من الـ متأخرين...
مرحبه عريف محمد آني سالم إجيت علـ الجنسية مال إبني.
إبنك مو هنا.
أدري هاي٥٠ ألف بس إخْصُملياها.
صارت ميهَ.
ماشي بس طلعها دا يقدم على الاقامة بالسويد...
سيدي نقيب حامد بلكت تحط أسمي بجدول الترقية تره كلهم غلبوني.
عريف محمد انت ما مستحق.
سيدي المليون جاهز.
خوش خليني أشوفلك چاره...
استاذ كاظم آني نقيب حامد، أريد أعين مرتي يَمْكمْ.
جيب تأييد من الحزب، ولازم تدخل قرعه هي خمس وظايف والمقدمين ألف، وتدري بالقرعه كلاوات.
أدري لعد آني ليش إجيتك. وهذا نص دفتر الي طلبتهَ جاهز.
خُوشْ خلي الفايل يمي وانتظر الامر الوزاري هلـ الاسبوع...
استاذ عادل، أكو وفد رايح لفرنسا اسبوعين، بلكت تخلي اسمي بيه.
كاظم، الوفد فني وانت ادارى، اشلون ترهم.
استاذ انت مدير الاداره وكلها بيدك، والوزير بحزبكم وميگلك شي، وهاي المخصصات مال الايفاد ليجدام انطيكياها وفوگاها بوسه...
ها عادل إشعندك جاي من الصباحيات.
معاليك تدري باخلاصي إلكم، وآني منكم وبيكم، جاي أريد تثبتني بمنصب مدير عام الاداره، وجواد خوما أحسن مني وثبتوه، على الأقل آني عندي دكتوراه.
عادل الدكتوراه مالتك كلك، وانت تشتغل بعقد، ميصير.
معاليك هو بس آني، أعددلك إشگد ثَبَتّوا گبلي.
لا تعد، ولا تدوخني، روح للجنة الاقتصادية بالحزب وهي تحدد الكلفه، آني معليهَ.
لعد منو الـ عليه.
انت تعرف وآني أعرف وربك يعرف طاسة ببطن طاسة وبالبحر ركاسه!.