شلش العراقي يكتب: حفل انتخابي لعشيرة جائعة

التفاصيل

تم إنشاءه بتاريخ الثلاثاء, 22 كانون2/يناير 2013 18:47

حفل انتخابي لعشيرة جائعة
(باللهجة العامية)
كتابات - شلش العراقي

قبل ان ينهي سيد خلف محاضرته التي خص بها عشيرتنا هذا اليوم، رمى بعمامته السوداء على الارض وبانت صلعته الحمراء المتعرقة وهو يصرخ بنا :

ولكم شبيكم ماعدكم غيرة على مذهبكم، شتكلون لعلي بني بي طالب ؟، تكولولة انتخبنا الشيوعين لو العلمانيين الكفار، شتحجون وية ام البنين ؟ ، تكلولها احنا خذلنا الحسين بكربلاء، احنا تركنا العباس تتكطع جفوفه ، احنا كطعنا المي عن عبد الله الرضيع

ولكم حطوا براسكم شوية عقل ، لتبقون سفهاء ، لتبقون معدان ، لتبقون همج ، قائمة الائتلاف الله ورسوله مباركيها ، (بأعلى صوته ) هاي قائمة شهيد كربلاء ، قائمة الطف ، هاي قائمة زينب وام البنين والسجاد ، قائمة ابو الجوادين ،(بصراخ) والله راح تظلون بيوم الحساب تفرون بذانكم ، اول سؤال راح يكولك شنتخبت ؟ ، شراح اتجاوب ؟ اتكلهم انتخبت العلمانيين ؟ طيح الله حظكم اذا صدك ، سود الله وجوهكم يامعدان اذا صدك.

اليوم انتحر كدامكم هنا ،اليوم اموت هنا ، اكتل روحي اذا ما تحلفون براس العباس تنتخبون قائمة الائتلاف ، يالله احلف حجي رشك انت اول واحد ، احلف بالعباس وخل يحلفون وراك واحد واحد

تقدم حجي رشك خطوتين وهو تحت تأثير الصدمة والرعب والخوف من صراخ سيد خلف ونبرته الحادة ,ارتجفت يداه ونشف ريقه وهمَّ بالقول : عمي احلف بالعباس ....

لاتحلف ،(جاءه الصوت من فالح بن عاتي) ..لاتحلف ، العباس شنو دخله بالانتخابات ؟ (التفت الى سيد خلف الذي انشغل باعادة عمامته الى صلعته ). آني احلف (اضاف فالح) احلف بالعباس ابو فاضل ، احلف بالعباس ابو راس الحار سيد خلف وجماعته اكبر چذابين ، وين چانوا عنا هسه جايين ؟ وين چانوا من مرت علينا سنين شفنا بيها الظيم ؟ وين جانوا من اطفالنا ماتت بالجفاف؟ وين جانوا من نسوانا كامت تجدي بالشوارع ؟ وين جانوا من بعنا حتى شبابيج بيوتنا وطبخنا حتى الزبالة ؟ وين جانوا من جانت لكمة الخبز حسرة علينا ؟ شو محد اجه وكال انتوا اهلنا وتجمعنا وحدة المذهب ، عاشوا كل حياتهم متنعمين ووجوهم حمرة ونسوانهم يفترن من دولة لدولة ، واحنا خيرتنا كامت تبيع زوري ، وخيرنا كام يشتغل بالبالات ، ليش ما كالوا اهلنا ماتو من الجوع ؟ اطفالنا ماتت بين ايدنا ، وماعدنا فلوس نعالجهم، بناتنا نعال ماعدهن يرحن للسوك ، شو محد سأل علينا ؟ ومحد خاف من يوم الحساب ؟ ومحد منهم استحى من الحسين والعباس؟ اطفالهم اغلى من اطفالنا ؟ لو نسوانهم احسن من نسوانا ؟ لو شبابهم الفاهين احسن من ولدنا ؟

لاتحلف حجي رشگ ، آني احلف ابدالك ، ذولة جهنم ارحم منهم، جم مدرسة ومستشفى بنوها بفلوس الخمس بايران ، جم قصر بنوا بلندن ؟ جم سيارة جانت تمشي وراهم ؟ واحنا بالتاتات نخاف نصعد خاف ماعدنا كروة ، احنا اهدومنا تكطعت علينا ، شفنا الضيم والقهر ، هم الجوع وهم صدام المجرم، انسنجنا وانكتلنا ومتنا والامراض لعبت بينا جولة ، وهمه كل واحد منهم وجهه هاعرضه ومتفح وعلباته تگول تاير

لاتحلف حجي رشگ،الانتخابات مو إلنه، الانتخابات إلهم ، حتى يكعدون بالقصور، وينهبون ويفرهدون براحتهم، موانتخبناهم ذيج المرة ، شقدمولنا ؟ شو زاد الضيم والقهر وطاسة مي نظيف ماكو ببيوتنا..
اطلع بره حجي رشگ وشوف سيارة سيد خلف ، وشوف لاندكروزات الحماية ، شوف اتباع آل البيت إسال سيد خلف كله وين بيتك مولانا ؟ منيلك بيتين بالجادرية مولانا؟ منيلك عشرين سيارة مولانا؟ منيلك بيت بلندن مولانا ؟ وين بناتك مولانا ؟ ليش بايران مولانا ؟ ليش ما يجون يعيشن ضيم بناتنا ؟ شنو بناتك نازلة بيهن آية مولانا؟
اسمعوا اخوتي ، الله ما يشتغل بمفوضية الانتخابات حتى يحاسب على التصويت ، والحسين نصير المظلومين مو نصير الحرامية، والعباس يكره اهل القصور والسيارات المسروقة من دم الناس، وام البنين تحرس اولادنا ، لان اولادهم يحرسها فيلق بدر، لا ..لا سيد خلف احنا ما نحلف ، روح شوف غيرنا ، بعد محد يضحك علينا ، اليوم عرفتونا وصرنا احبابكم ؟ عشرين سنة، دينار واحد ما وصلنا منكم ، لو واصلنا دينار واحد ، جان صدك كلنا عدكم شرف ، ضحكتوا علينا هواي ، كافي ،، لهنا وكافي ، بعد احنا مو لعبة بيدكم ..

ولدنا قندرة ماعدهم وعمارالحكيم اشترى النجف كلها. ولدنا ماشايفين الصويرة اولدكم من سويسرا لامريكا ، يقبل الحسين والعباس بهاي؟ الحسين والعباس ولد رسول الله من حاصرتهم السيوف ما شردوا لايران ، ومن ضاقت بيهم الدنيا ما عاشوا بلندن ، الحسين والعباس مامدوا ايدهم على بيت المال ، وانتوا ولدكم اخذوا البيت والمال ..
اسمع سيد خلف هاي قوانة المقابر الجماعية بعد هم ماتمشي علينه ، المقابر الجماعية مقابر ولدنا مو ولدكم ، ومن ولدنا اندفنوا جوه الكاع ولدكم جانوا يصيفون بفرنسا ..

اطلع بره سيد خلف ، (بصوت اعلى) اطلع برا ، بعد ما ينضحك علينا ، احنا نعرف دربنا ، والمرجعية هم نفظت ايدها منكم ، والائمة ائمتنا نصراء الفقراء والمساكين ، نسوانا الطاحت من الجسر مو نسوانكم ، واطفالنا الماتت على الجسر مو اطفالكم ، اطلع بره وصلت حدها وياكم ،اطلع ,, اطلع .. اطلع ..

عدل سيد خلف من وضع عمامته وهو يرتجف وقد اصطبغ وجهه المدور بحمرة جعلته كثير الشبه بنصف رقية .
سقط فالح بن عاتي على الارض بعد ان ارتفع ضغط دمه وهرع اليه ابناء العشيرة يحملونه متجاهلين خروج السيد ذليلا منكسرا يردد مع نفسه ..
* المعدان وقود جهنم..المعدان قرود ..المعدان دبش .. المعدان حمير!!