حچاية التنگال ٧١

التفاصيل

تم إنشاءه بتاريخ الأحد, 26 شباط/فبراير 2017 15:22

كتب بواسطة: د.سعد العبيدي

                           د.سعد العبيدي

ضلينهَ يجي ساعه نتناقش وتدرون إشگد نحب النقاش.

أگله يابه ترهَ مجتمعنهَ صار مريض ومتصيرلهَ كل چارهَ غير عمليهَ تشيل بيها أشياء گبل ما تنصاب بالگنگرين.
يگلي لا، إحنه ولد عشاير ومأصلين، وما علينهَ غير إنصَفِيّ نيتنهَ وندعي من الله سبحانه وتعالى يصلحنهَ.
يابه ترهَ مَحَدْ ينّصلِحْ بالدعاء وبسْ، الله خلقلنهَ عقل نفكر بيه، وأگلك ترهَ مَحَدْ جابنهَ ليوَرهَ غير الدعاء بغير وكته والنيّهَ مو بمكانها.
گال هذا كفر.
أجي وياك إعتبرهَ ما تعتبرهَ، لكن تعال فَسّرليْ من إجوي اليابانيين البوذيين يساعدون أهل السماوهَ المسلمين ورهَ ٢٠٠٣ ونصبوا ذاك المعسكر بالمعسكر القديم الله يذكره بالخير، وانطوا رواتب من هاي الزينهَ للمترجمين والعمال وبدوا يشتغلون من كل گلبهم، وبعدهم بأول خطوهَ اجتهم عشاير المنطقهَ وگالولهم هاي الگاع الگاعدين بيها مالتنا أباً عن جد، ولازم تنطونهَ إيجار، وبعدَ طلعتهم باشويه ضربوا هاونات.
وإنطوهم اليابانيين إيجار مثل ما رادوا حتى يتچفون الشر.
سمعت العشاير القريبهَ وهم إجوهم وتفگهم باچتافهم، وگالوا هاي الگاع مشاع وعدنا حصهَ بيها ومثل ما نطيتوا لذولاك تنطونهَ، وما ضل عد اليابانيين لا شغل ولا عمل غير يتلگون تهديدات، ويشگفون هاونات، وينطون گواني إفلوس، الى أن بزعوا وگالوا باطل، لازم نطلع، وطلعوا سنة ٢٠٠٦ وخسرت السماوه فرصه چبيرهَ.
وليش العشاير گعدوا راحه، لأن بعد اليابانيين يلملمون بغريضاتهم مكسورين لأن ما ساعدوا، اشتغلكْ الفرهود لغراضهم وأشيائهم من ولد العشاير.
ها خويهَ متگلي ليش هيچ تسوي العشيرهَ؟.
وعشيرتك هاي تگدر تخلصنا من محنتنا؟
وشتگول يكفينا الدعاء حتى نخلص؟.
سكتْ!!.

الگاردينيا: الأخ الدكتور سعد ، بارك الله فيكم ..شوفوا هذه الصورة:الياباني المسكين ياكل التمن بعودتين، هنا شمروا العود على صفحة والخاطر العشاير گاموا يأكلون باليد..يعني كل هذا و مارضوا عليهم. وحق الحق لو يجي ما أدري منو فلا يرضون عليه.. خليها سكتة دكتور الشگ چبير و الرگعة صغيرة.. مشكور عيونا دكتور والى المزيد.