زكريا وشموع وصينية

التفاصيل

تم إنشاءه بتاريخ الأحد, 30 نيسان/أبريل 2017 10:03

كتب بواسطة: علي سليمان

بقلم :علي سليمان

زكريا وشموع وصينية

ذكرني بلمة احباب وأيام منسية
تنگة وورق ياس وشموع مضوية
ضحكات وأحلام ونذور مرجية
التنگة من طين دجلة والياس انسقه بميه
استحت منه الأماني والرجايا وختلت بفيه
چم رجا وچم نذر نام باحضانه وغنى أغنية
يا رازق المحروم اكرمنا بعطية
اليوم راحوا الاحباب شي ردهم إليَّ
سكتت الضحكات والشوگ يصل عليَّ
تدور بينا الايام ونذورنا هيه هيه
اللي مضيع محب واللي مضيع ولد بس الضاع مية
ضاع الوطن ودجلة غرق بدموعه ونشف ميه
ألم الفراق چلچل ماتكفيه شمعة ولا تحمله صينية
چم شمعة وچم نذر وچم ورقة مطوية
چم سنة وچم عام نشعل الشمعة ونطلب بقية
بهالعمر دنشوف يوم يرجع الاحباب ويردهم إليَّ
رجانا بالرحمن اللي بشر سيدنا زكريا
وانطاه يحيى وقال لاتيأس وادعي ليَ
ياربي تفرح كل قلب محروم وتهديه هدية
ونلگي وطنا الضاع ونرجع للنهر ميه
ونسقي بيه الياس ونشيلة بالصينية
ونگعد حواليها احباب ونلتم كلنا سوية
ونقول للقهر روح ونكسر وراه تنگة وما نطش ميه