يا سـمرَة هـَـلي

التفاصيل

تم إنشاءه بتاريخ الخميس, 18 أيار 2017 20:06

كتب بواسطة: ميسون نعيم الرومي

ميسون نعيم الرومي

يا سـمرَة هـَـلي

هـَـبّ الهـوَه واتـمايـــل الريـحـــان
نـَـفـْحـَه امـن العـطـر للعـاشـگ الولهـان
 
يا(عـيـطـَه)* العـِـلـَت والتـَمـر مايـنـلاح
يانـَهـر العـِـشـگ وامضَيـّع الشـطآن
 
اهـديـك الگـمـَـر والشمس والألوان
وانـجـوم السـِـمـَة عـِـقـد للخـلآن
 
يـاوَرْد الربـيـع الذاب عَ الشـِـفـَّـه
ياغصن الورد متعـَـلـّي عَ الأغصان
 
يالزلفـَـك عـَـتـابـَه اوناي صوت العود
والگـِذلـَه ذهـَـب وامطـَرّزه ابـمرجان
 
يالخـَـدَّه دفـو بـيـه النـَـسـيـم ايـلوذ
يابـَحـر العـشگ للعاشگ النـشوان
 
محتاره القوافي بالحسن شنهي اتگول
متعـَـثـرَه الصور بالوصف والأوزان
 
يالعمرَك ضوَه اوشـَـمعات السنـيـن
بـَـتّ البلگـَـلب واظفـَرْتـَه الك فستان
 
زحـَـف ليك الگـلب يتهاده هالخجلان
يـحـَـنـّي بالجـدم وابـچـَـفـَّـك الريـّان
 
الِمـَّـن بالحـَرف واهـديـلـَك الأشـواق
يـغـافـلني غـَصب وايـتـيـه بالأكـوان
 
يالحـسـنـك حـِسـِـن بـغـداد والعـشار
ياسـمرَة هـَـلي يا اغـلـَه كـل عـنـوان
 
ياسـمرَة هـَـلي يا اغـلـَه كـل عـنـوان
--------------------
*يا(عـيـطـَه):- العيطه النخلة الباسقة الطول
--------------------
مايس / 2017
ســـــــــــتوكهولم