حچاية التنگال ٩٣

التفاصيل

تم إنشاءه بتاريخ الأحد, 20 آب/أغسطس 2017 20:14

كتب بواسطة: د.سعد العبيدي

                               د.سعد العبيدي

حچاية التنگال ٩٣
ندري هيئة الحج والعمرة كل منتسبيها دَيّنِيينْ، صايمين مصليين، ما مسوين أي مكسوره بدنياتهم، وروحتهم للحج بالجمله مو يريدون يمسحون ذنوب سجلها عليهم منكر ونكير، لا أبداً أحلفْ بدوبةْ قرائين سجلاتهم بيضة مثل الگطن، بس خطية ينكسر گلبهم على الحجاج فيروحون يداروهم ويكسبون بيهم ثواب.
بس الحچي بيناتنا هو ليش الحجي من چان بديرتهَ وبين ناسه، همهَ محترميه ومخلصين معاملاته وهو گاعد ببيته مثل الأوادم، لو يضلون يذلون بيه ويبتزوه علما يطلعون روحه. بعدين أگللكم مو معقوله الفازعين دا يدارون الحجاج المساكين بالمئات حتى من گالت الوادم ونشرت بالصحف وعلى النت أنهم أربعمية وكسر خو آني ما صدگتْ، وبيني وبين نفسي گلت مو معقوله... يابه خلينهَ نگول ميه، ومن كتبت الناس وگالت مخصصاتهم ست مليارات وگلن هم ما صدگت لأن هواي والبلد محتاج الفلس، خلونه نگول مليارين واشويه مثل ما الهيئة تگول.
بعدين هي المليارين واشويه بهاي الأيام السودة والخزينه تصوصي مبلغ قليل، ثم الَحَجْاجْ طالعين على حسابهم والأجر مثل ما يگولون على گد المشقة، هي الهيئة الموقره لاحگتهم بعربانه شنو، واشراح تسويلهم؟.
تدرون گبل وزارة الأوقاف الله يرحمها تدز موظف واحد يشوف وضعهم ونوبات ماكو، والسفارة هي مثل كل السفارات تتابعهم رعايا بلدها.
ما ندري بهذا الوكت الاصرار على الغلط ليش؟.
عمي إذا عدكم فلوس زايدة منگول تبرعوا بيها للحكومة دتشتري سلاح وتحارب عنكم.
لا: ابنو بيها مشروع يفيد ربعكم الي كتلهم الجوع وصاروا يدعون عليكم الليل والنهار، لو تگعدون وتسترون علينه وعلى نفسكم، من الله...