فتاة تدعى جول !!!! طلعت چوله

                                                  

                       سيف الدين الألوسي

       

     فتاة تدعى جول !!!! طلعت چوله

        

في بداية السبعينيات كنا في الثانوية نذهب الصف كله الى السينما وحسب نوع الفيلم !!! وبعد ان كبرنا ونضجنا وكان يأتي معنا في بعض الاحيان استاذنا في الانكليزية ومسرحية يوليوس قيصر لشكسبير وكانت تدرس في الصف الرابع اعدادي في كلية بغداد وماكبث في الخامس ،، كان يأتي معنا الاستاذ الفاضل ساطع الداوود وهو مرشد شعبتنا العاقلة ايضا وبطلة كلية بغداد بالساحة والميدان ، والثانية بكرة القدم بعد ان خسرنا النهائي بخطأمن عندي !!! ويرافقنا ايضا الاستاذ دمر الراوي مسؤول المكتبة وغرفة الرياضة في الكلية ،، نذهب الى السينما ثم نعرج على احدى گازينوات ابو نواس للعب الطاولي والدومنه والبليارد واكل السمچ المسگوف او التكه والعودة بعد منتصف الليل بقليل !!!
في احد اسابيع شتاء سنة ١٩٧١ كان يعرض فيلم اسمه فتاة تدعى جول في سينما سميراميس ونسيت قصته !!! ذهبنا في دور الاربعة وكانت السينما مقبطة بالحسان من تلميذات المدارس الاعدادية والكليات ،، وبعد ان تغدينه كص من الزين من مطعم فيتامين المجاور للسينما !!!
كانت هنالك فتاة جميلة جدا جدا ،، سمراء وعيونها خضر ،، ممشوقة القوام وشعر اسود روعة ولابسه ميني جوب ليس بالقصير جدا وبوت ابو جعب عالي !!!
احنه بقينه فاتحين حلگنه مثل الچذبات على هذا الحسن والجمال ،، وكانت كل الانظار تتجه عليها ولأنها وجه جديد على الشاشة ومن مدرسة من غير المعرفة لدينا بال مثل الاميركان والراهبات والرسالة والقديس توما والكفاح العربي وغيرها ،،، وبعد تقصي واشتغال كل الاجهزة الاستخبارية لدينا وزرع عميلات من المخابرات نعرفهم بالسينما ،، طلعت البنية بالصف الخامس بثانوية الحريري للبنات !!! اكبر من عدنه سنة بس صدك خلقة !! بده الفيلم واحنه ملتهين بالسوالف والعمليات اللوجستية وكل ساع نازلين مشترين شامية لو جرزات وقسم من البنات يخلوك كل ساعة كامز ،، وقسم كاتبين مثل ميكتبون على السيارات الريم (( اتركني انا مخطوبة ))) !!
وره شوية منسمع غير صوت طبه وفد واحد عثر ووكع !! وعلى درج السينما بين المدرجات ،، طبعا جماعتنه صاحوا ،، الله وعمه !!! بس اني ابو گلب الحنين محجيت ورحت اشوف منو تكربس بالدرج !!! طلعت الاخت المسكينة ،، وجعب البوت انكسر ،، وقبل ميفتحون الاضوية راحت ويه صديقاتها وطلعت من السينما تعرج !! اني نزلت وياهم لباب السينما مثل الاسعاف الفوري ،، ولكن دون نتيجة !!! وبقينه نروح بكل الادوار ونفتر يم الحريري وبشارع طه وكل قبض ماكو !!! فص ملح وذاب والى اليوم صورتها مرسومة !!!!
اشتعل أبوج جول ،، صدك چولة ،،،
اكيد الاخت هسه بيبي !!!!!!!واكيد هاجه لاميركا لو لكندا لو للسويد ،، لو صايرة حجية توزع خبز العباس لتخرج حفيدها من المتوسطة !!!
تحياتي للجميع

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

1066 زائر، ولايوجد أعضاء داخل الموقع