الفرق بين الحلم العراقي والحلم الاميركي !!!

التفاصيل

تم إنشاءه بتاريخ السبت, 30 كانون1/ديسمبر 2017 08:00

كتب بواسطة: سيف الدين الألوسي

                         سيف الدين الألوسي

         الفرق بين الحلم العراقي والحلم الاميركي !!!

بالحلم العراقي تتمنى ان الله يستر عليك بسگف ومعك عائلتك جميعا واحفادك وان يمن عليك تعالى بنعمته دون ان تمد يدك وتحتاج لاحد ،،، اما الحلم الاميركي فهو ان تتملك قصر يلدز على البسفور او بحيرة ميتشيغان أو ماليبو !!! ،، وان ترى اولادك بالسنة مرة وانت تفتر بالقصر ويه الجلب مالتك !! اما الاحفاد فانت محظوظ اذا رايتهم بالسنة مرة !!! وتظل تدفع بيلات وقوائم وحتى بعد الممات وانت بالأخرة !!!
الحلم العراقي هو ان تحلم بانك اذا طرقت او متت ولاي سبب كان ،،،،،،،فأن هنالك من يشيل جنازتك ويوديك الى المكبرة وحتى لو كنت مكطوعا من شجرة ،،، اما الحلم الاميركي فانت اذا متت وما عندك احد تحجي وياه يوميه للشغل لو للروابط الاجتماعية المقننة مثل الباسطرمة ! ،، فانت تجيف وميبقى غير الجلب يبجي عليك ويدفر بيك !!! حجي او عمو گوم عاد ،، جاوبني،،،،،، مو انحصرت منو رح يطلعني ويفررني !! وانت متجاوب !!!
الحلم العراقي ،،، هو ان تلتهي بنجاحك في الحياة واهدافك الاسمى ،،تربية الاولاد والبنات احسن تربية وتزويجهم ،، النگره اليومية ويه الحجية او المره بكل نجاح لمدة اربعين سنة ،،، وان تصير سانتا كلوس للاحفاد طيلة السنة وتوصلهم للحضانة والمدرسة بكل سعادة في سيارة جدو !! لان امهم او ابوهم ملتهي كلمن بضيمه !!!
اما الحلم الاميركي فهو ان ترى مطلقتك بعد ١٥ سنة من الزواج ومع صديقها ابو سنون تركيب وتكلها ، هاي سويتي ،، وطبعا بالنفاق ،، شفتي الولد والبنات والاحفاد ،، هي تجاوب لا ووالله ، ام سو سوري ،، بيكوز اني اختنكت بالطخم مال صديقي من ديبوسني وردت اطرق ، ولو مو مخابرين ٩١١ وجايين مطلعين الطخم من لوزتي جان هسه اني بالكبور !!!!
الحلم العراقي ،، ان يجوون اهلك وره متموت ،، وذلك مصباح كل عيد ،، ويوكفوون على گبرك ويقرون سورة يس ويرشون الكبر بمي ورد ويشعلون شموع ،، ويفتحون مسجل بيه عبد الستار الطيار وهو ديعدد عليك وهمه يبجون وانت تبجي بالكبر وبعدين تكلهم روحوا عاد مو كسرتوا كلبي ،، خلوني مرتاح ونايم ومرتاح الراحة الابدية !!
والحلم الاميركي ان تجي مرتك مع بزونتها ووردة حمرة تخليها على كبرك بصمت وانت تخنزر على بزونتها ،  ومرتك تطمك وانت بالكبور لان حجيت على البزونة !!!!
واخيرا وليس اخرا ،، الحلم العراقي ان تاخذ جواز اميركي تفوت بيه للاردن ومصر والامارات وقطر وبقية الدول العربية والاجنبية ووو باحترام !!
والحلم الاميركي ان يرى معاملة التقاعد للعراقي وشلون يحترك جد جده ،، وهو يقول او ماي غود !!! اشكد ظالمين وميخافون الله ، اهل التقاعد ويه البشر !!!
محبتي للجميع ودك احلام للصبح