د.سعد العبيدي
حچاية التنگال ١١٢: الاصلاح
لمن گبّوا أهل أوربا زغيرهم وچبيرهم وكلمن حط دشداشته بحلگه وركض گبلنا بستمية سنة، وطالبوا كنايسهم وملوكهم بالاصلاح وضلوا گاعدين أشهر واسنين بمكانهم يصيحون نريد اصلاح، وما نگوم الا تسوولنه اصلاح.
وبدت خطوات الاصلاح إشويه إشويه غصبن علي يرضه والي ما يرضه.
تدرون بذوله الي گابين اشسووا:
أول شي سَوُوه طبقوا الاصلاح على نفسهم، يعني من گالوا لأبونا القس خليك گاعد بالكنيسة، وما الك شغل غير بقضايا الكنيسه، وبالك ويالك تطلع بره وتحچي، وبعد لا تنطي صكوك غفران وگياعين بالجنة على الشط وتقشمر الناس.
وثاني شي بدوا يصلحون علاقتهم بالكنيسة، ويتصرفون تصرف مدني، مثل تسجيل زواجهم بالبلدية، ومحد يروح گدام القس يعترف بالذنوب الا القليل المتدينين جداً، وبالنتيجة أخذوا من الدين المسيحي الشي الزين ويناسب العصر وطبقوه على نفسهم، سووه قوانين نظمت حياتهم المدنية. وطبعاً تشوفون نتيجتها وين وصلوا وبچم سنه غلبونه إحنه المسلمين الي چنه غالبيهم باسنين واسنين، لا وفوگ القهر گاموا يعطفون علينهَ ويگولون مساكين ومتخلفين ومتيهين المشيتين.
وهنا وبهاي المناسبة الي أبد مو سعيدة أريد أسألكم بلا زعل يرحم والديكم، نگدر أحنة أنصلح نفسنه؟.
ونگدر نگول لشيخ العشيرة لو امام الجامع وَخِرْ عن دربنه ومالك شغل بينه؟.
لو اشويه ندگ رجل ونگول هاي الشغله بالذات مو شغلتك عوفها على أهلها؟.
لو نتوسل بالچبير ونگلة مصاريف المشي بالزيارة الجاية خلي نجمعها ونبني بيها مدارس يتعلمون أطفالنا بيها لو مستشفيات تعالج فقرائنا.
لو ساعدنا حتى نبطل التعليقات الدينية الطائفية بالفيس..
لو.. واللو زرعوه وما خَضّرْ.
636 زائر، ولايوجد أعضاء داخل الموقع