بغداديات .. آذار وعبد الحليم حافظ والشوفر أمبالا ١٩٦٥!!

                                                   

                            سيف الدين الألوسي

       

  بغداديات ..آذار وعبد الحليم حافظ والشوفر أمبالا ١٩٦٥!!

   

ذهبنا انا ووالدي رحمه الله والحاج نجم سائقنا رحمه الله ظهر ذلك اليوم الى كراج شوفرليت في شارع الصناعة الحالي ( گراج ڤولڤو لاحقا ) ،، وكنت في الصف الثالث ابتدائي وذلك لاستلام سيارتنا الجديدة عروسة السيارات الشوفرليت امبالا موديل ١٩٦٥ زرقاء اللون من الشركة وكانت مغسولة ومحضرة حسب الاصول وفيها جدول للسيرفس وضمان وتايرات فايرستون ام القلم الابيض والگبات بالصندوق مغلفة !! مع الجك العمودي والسبانة المربعة ام الصليب وهيم لفتح الگبات ورفع الجك !!! ،، وطخمين من ستة مفاتيح مع ميداليتين شوفرليت كل طخم مفتاح للتشغيل مسدس الاضلاع ومفتاح بيضوي للابواب والصندوق ومفتاح صغير للاريل !!! ومفاتيح جي ام معروفة !!! ،، وهي اتت قبل استلام اخوية الصغير حياوي بأيام ،، او المهندس الاستشاري يحيى اليوم وهو جدو ،، اتت هذه السيارة ويحيى في نفس الشهر! يعني شغلتين جديدة بالبيت بالباكيت !!! ،،، وكانت لدينا شوفرليت امبالا موديل ١٩٥٩ رصاصي والسگف ابيض ام الجنح !!! وفيها مبردة للهواء تشتغل على قوالب الثلج المنزلية !! وتجلب هواء بارد ويمكن فتح شبابيك السيارة عند تشغيلها !!! وليست ايركندشن !!!
طبعا اقصر طريق من المنصور الى ساحة الاندلس كان يمر عبر جسر الجمهورية وشارع السعدون وبدلا من الجسر المعلق المفتوح حديثا والذي يؤدي الى الكرادة ولم يفتح طريق ام العظام ولا شارع الزيتون بعد ! ،،، وانا فرحان بالسيارة الجديدة وحيث كان والدي يسوقها وريحة الكشنات البيج الجديدة ووووووو والحاج نجم يسوق الامبالا ٥٩ بعدنا ،، واني انحبش بالراديو AC وشاد حزام الامان ،، لو اگلب بدفاتر الاستعمال والكتلوك للشوفر وكانت بالچكمچة !!! وكانت اول موديل شوفر فيه حزام امان بس مثل مال الطيارة مو مثل الحزام اليوم !!! يعني ينشد بس على البطن ،، ويمكن هسه ينرادله ططواله من كرشي !!!! المهم في طريق رجعتنا وهسه تذكرت زيارة عبد الحليم حافظ لبغداد وحفلته في سينما النصر اكبر سينما في الشرق الاوسط في ذلك الوقت ،،، كانت الحفلة في نفس يوم استلام السيارة وهو جاي مشي من اوتيل بغداد وداير مدايره المعجبات !!! و في رجعتنا چان اكو ازدحام كبير كمظاهرة وحركة نسائية شبابية وفتاتية كبيرة وشكو صرمپارة ببغداد مبردغ وواكف بشارع السعدون وخال ريحة منين لو اولد سبايس ومسوي شعره تواليت !!!
ابوية الله يرحمه وهو متونس بسيارته الجديدة وجگارته الروثمان التي لا تفارق شفتيه سأل :

هاي شكو ؟؟ .

واحد جاوب معبود الجماهير حليم وفائزة احمد !!!!

گاللهم من طاح حظكم وحظ حليم وفائزة على هايه الهوسة ،، ليش سادين الشارع !! ؟؟

  

وخله ايده على الهورن الاي سي ديلكو الزين حتى يفتحولنه الدرب گبال السينما !!!! وبعدين فضت ورجعنا للمنصور...

وهذه السيارة تعلمت فيها سياقة وشديتلها هورن هوه خمس نغمات وهورن بقرة من بيروت وفرفرت بيها من سنة ١٩٧٠ ولغاية ١٩٨٤ وحيث باعها الوالد رحمه الله وقطرة صبغ مابيها !! ،، وكنت اترك سيارتي الرينو دوشيش التي حولت هورن البقرة الها ،،، وافتر بالشوفر لعشقي لها وبقيت مدمن امبالا الى يومي هذا ،،، بس اكو فرق بين الشوفرليت مال الاول وموديلاتها حيث كنا ننتظر الموديل الجديد نهاية كل سنة في شهر تشرين ثاني ، وبين سيارات هذا الوكت التعبان اللي متفرق بيه بين شوفر ومرسيديس وكيا وكامري ووو ڤولكا ،،، الكل صاروا مثل الصينيين نفس الگصة ،، والف رحمة على روحكم فرانك سيناترا والڤيس وعبد الحليم وفريد وام كلثوم وكل المناضلين في الزمن الجميل بكل شئ .
بس لو اعرف وين صارت الامبالا الزركه سماوي ،،، معبودتي وكاتمة اسراري ورفيقتي في حكايتي مع الزمان !!!!!!
تحياتي للجميع وخصوصا محبي الامبالا وحليم وعبد السلام النابلسي !!!

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

732 زائر، ولايوجد أعضاء داخل الموقع