عمليات التجميل !!! والگرجية الحسناء المحورة !!!

التفاصيل

تم إنشاءه بتاريخ الأربعاء, 16 أيار 2018 11:44

كتب بواسطة: سيف الدين الألوسي

                         سيف الدين الألوسي

     عمليات التجميل !!! والگرجية الحسناء المحورة !!!

في الايام الغابرة السعيدة ،، مو الغبرة والمغبرة مثل أيامنا اليوم ،، چانت أذا اكو وحده حلوة ببغداد ، وبأيام أجدادي ،، يگلون هذي چنها گرجية !!! والگرجية يعني جورجية او من جورجيا الاصلية مو جورجيا الولاية الاميركية ،، اللي كل نمونة بيها تگول أني !!!
الگرجية تتمتع بمقاييس جمال تعتبر قياسية بهذاك الوگت ،، مثل الشعر الگلبدون او الاصفر والخشم چنه مصقوله ،، والعيون الزرك او الخضر الچبيرة ،، الشفايف مثل اللوز وردية ،، والخدود المتفحة ،، والقوام الممشوق المملوء ،، مو مثل عوج بن عنق بس طول ورشاقة !! مثل عارضات الازياء هل الوكت !!!!
طبعا ،، النسوان ايام زمان ، واذا ممضربات ببيبيات ، گرجية أو تركية او عجمية او سورية او اصيلة مأصلة عربية وعيونها سود حور ،،،، وخصوصا بزواج الاقارب المتوالي حيث تطلع المره خشمها ، چنه كباية حامض ،، وعيونها دكدك لو چقله ،، وشفايفها چنها شفة أسماعيل ياسين الله يرحمه ،،، وشعرها چنه سيم مال مواعين لو جلافة لو ليفة !!! وطولها لو گطف مال جكارة چيتان كصيرة ، لو چنها طنطل يلبس بابوج ٤٦ بليه دبان اصطري !!،، وجسمها مثل ماري منيب الله يرحمها ويمكن عقلها تخته وتخته !!!!!!
نرجع لسالفتنه ،، قبل أربعة أيام چانت الانتخابات ،، وچنه فرحانين بلگت تطلع حلوة ، مثل الگرجية وجبنه فرقة شايف خير للمزيقه الشعبية ، وحجزنه مطعم شباب الكرخ للخطار والمعازيم !!!! والخطبة والنيشان بعد ساعتين الى ثلاثة وهو اعلان نتيجتها الاولية ،، ويومين على الاكثر للنتيجة النهائية وگطع المهر وسط الافراح والبهجة للعريس وهو الشعب العراقي !! اللي ليهسه مشايف العروس !! بس الحچي ، على جمال العروس وشلون رح تغير جمال النسل بعد ان شبعنا قبح وحچي !!!
رح تصير خمسة أيام والعروس خاتله ببيت أبوها ،،، وشوكت رح يشوفها العريس ،، الله تعالى بس هو اليدري ،،، واعمام العروس وأمها !!!! يعني حتى لو ينرادلها دوه حمام اوڤر اوول ميطول ساعتين ،، وهمين ساعتين حتى تحني ،، وساعة حتى تحك رجلها بالحجر اذا مسينه ومفطره !!! ،،، يابه يومين تكون جاهزة للعرس الانتخابي !!
أشو الشغلة طولت وبس لا العروس تطلع تشبه بيبية ليلى ومن تنكر الذيب محلها وتحمر ولبس هدومها ونام بمحلها ، ومثل كل مرة !!!
وهسه يمكن دك عمليات نفخ سيليكون للوديان والخسفات مال المجاري ،، وشفط للجبال والهضاب والانتفاخات مال غاز h2s ، وصبغ للشعر الجلافة بلون أشقر رمادي مع عملية تسريحه بالفير ، مع البادكير والمونكير ، و عند حلاقة شانت ماري للسيدات قرب الجندي المجهول السابق او الميريديان حاليا ( فندق فلسطين لاحقا ) ،، ووضع عيون زرگ عدسات محل العيون الرمده ،،، واهداب بدلا للاهداب المهلوسة ،، وتخم تايرات العفو سنون جديد !!!!!! وحتى تطلع چنها عروس گرجية أصلية أم النعلجة !!! وحتى العريس يرگع راسه بالتنگه مال المي مثل كل مرة ،، بمصباحية الزواج وره متبين على حقيقتها العروس !!!
ويگوم يسب ويشتم !!!! وييجي ابو العروس وتجي أمها ،،، يگلوله ،، أنجب وأسكت ولتظل تون !!! لو تركع راسك بالحايط ماكو فايدة !!

رحمة على اهلكم اعلنوا اسماء الفائزين بالتفصيل ، مع عدد الاصوات وبلية شغل دفنيتللي دفن ، مال دناغيز !!!

تحياتي للجميع وليهسه بهذه اللحظة النتائج جزئية ،،، بعد اكو اربعة عمليات ترگيع وتصغيير للخشم وفتحات الكابريته !!!!!!!!!
استغفر الله ،، ويگلك ليش تهج للگبور !!!