العيد قبل ٤٥ سنة !!!!

التفاصيل

تم إنشاءه بتاريخ الأربعاء, 13 حزيران/يونيو 2018 15:21

كتب بواسطة: سيف الدين الألوسي

                        سيف الدين الألوسي

           العيد قبل ٤٥ سنة !!!!

ملاحظات عن مجتمع بغداد والبصرة لكوني حضرت اعياد في تلك المدن قبل ،، ٤٥ سنة ::
١- بغداد ، صلاة العيد والتكابير من اروع ما يكون في صباح العيد،،،،، وقبل قضاء الناس اعيادهم صباحا في المقابر للاسف لاحقا !
وفي الليل ،، وقبل ٤٥ عاما الجميع سعداء ودك حفلات بالنوادي والنقابات والمطربين والفرق تفتر على النوادي لكثرة الطلب ،،، فرق اراكس وكنار والهام المدفعي وايغيلز ووو العديد في النوادي وريحة كلي وي وفيڤر وكريستيان ديور وشانيل تعط بالبنات وبروت وارامز وباكو روبان ودراكار وبيير كاردان كانها برج الزوراء وسفاج لكرستيان ديورللشباب ،،

والمرحومين يوسف عمر وصاحب شراد ومائدة نزهت وسعاد عبد الله ،، وفاضل عواد وحسين نعمة وسعدون جابر وانوار عبد الوهاب وفخري عمر ورياض احمد وامل خضير وووو العديد ،، يفترون على النوادي والنقابات مثل الطبيب الخفر !!! اذا كان العيد صيفا فالجيران يحتفلون بالسطح !!! لان الصوت الذي في الحدائق يصدح على سابع جار ،، واذا بالشته فالكل مقندله وخصوصا بعد الواحدة صباحا !!! والكل تريد تدفع الحساب على الميز بعد التقندل !!! اكو اروع من هيچي ايام؟؟ !!
اما السينمات كسميراميس والنصر وغرناطة وبابل والاعظمية فعدد الحسان اكثر من الزلم !!! وخصوصا اذا كان فيلم ابي فوق الشجرة لعبد الحليم وميرفت والمستورة نادية لطفي والهيبة عماد حمدي !!! والسندباد والافلام الهندية !! الكل تطلع تبچي !!!!!
اما المطاعم مثل فوانيس وفاروق والشموع والبرمكي وستراند وتاج محل الهندي والاوبرا ووو فهي مقبطة من الظهر الى ثاني يوم فجرا !!! والبارات في شارع ابو نواس والسعدون مقبطة لابو موزة !!! اما ٢١ والليل الساحر والبولينغ في العرصات فهو مقبط وخصوصا بسبب وجود فتيات يركبون ماطورسيكل مثل ف ب وغيرها ،، ونص الشباب يرحون للبولينغ يسوون بلانص وميزانية !!!!! طبعا ابو يونان وتاجران وكباب نينوى وابن هبوبه السره يطول ساعة اذا مو اكثر!!!
الناس متونسة وقسم مقندلين ولكن لا مشاكل ولا طائفية ،، تجمعهم فريدة وشهرزاد وشهريار الگطف وكهرمانه ،،،

ويتعاركون منو يدفع الحساب بعد التقندل واكل التكه أو الفشافيش لو الباجة وچ الصبح ومحد يعرف هذا شنو دينه لو قوميته لو طائفته ،، ومنو يفكر بهكذا غباء وقلة خلق بالسؤال !! ،، عيب تسأل واحد انت شنو !!!!!!! بالاخير واحد يبوس اللاخ ويتواعدون على باچر وين الگعده !!!!
الملاهي كالطاحونة الحمراء ومطعم المطعم وسيليكت والامباسي كانت تمتلأ بالبياعة شراية مال السيارات والمقاولين و اقارب المتنفذين ،،، وكانت البطاقة للدخول دينار ونصف مع بطل بيره او بيك ويسكي سبيرتو دملوغ !!!!!! والارتستات اما فرق فنلندية او اسبانية او يوغسلافية ويونانية ،، والدرجة الثانية مصريات وتركيات وسوريات ولبنانيات مرحلات مثل التكسيات المديلات القديمة !! لان غادين برگونده !!! كرش الراقصة اكبر من كرشي الان !!! هذا مختصر جدا لبغداد !!!!! ولياليها ايام العيد !!

٢- البصرة : اجمل مدن العراق شتاءا بدون منازع ،، اوتيل شط العرب في المعقل وهو مطار البصرة سابقا وحفلاته ،، والكويتيين مثل غادين درنگه !! من الشرب من صباحيات رب العباد ومتعرف خبط ويسكي على بيرة على جن !!! وبعدين ينامون في صالة الفندق على قنفاته الجلد الحمراء والبيضاء والسوداء ،، وارضيته الباركيه الخشب. لو ....... بالحمامات وبالباركنغ مال سيارات الفندق ،،، ادري مشايفين اسكنجبيل ؟؟!!!!!
اما نوادي الميناء والنفط فحفلاتها وطعامها لا يعلى عليها وهي تشبه نادي العلوية والسكك ببغداد ، شغل انگليز !! والهام المدفعي ياتي بالطائرة ليغني في البهو والبطاقات مقبطة ،،، اما شارع الوطني وملاهيه ورواده فينرادله ملحق كتاب ،،، شط العرب واليخت الملكي الذي كان يسمى عاليه ، تحول الى اسم الثورة !!!!
وسفراته الى الفاو مرورا بعبادان. وخرمشهر!!! ثم الطريق الى عبادان وخرمشهر حيث اشتريت مسجل فيليبس اخر موديل واشرطة كاسيت هدية مع المسجل لام كلثوم وكوكوش وناظم الغزالي !!!! تصوروا !!!!
اما العراقيين فيزركون للكويت ليلة ويوم لجلب صابون الكامي واللوكس ونساتل المارس والماكنتوش والكت كات والسمارتيز والفروت غامز والكهربائيات !!!!
محبة وعيد مبارك للجميع واذا ضاك خلگك تذكر ايام عرسك في بغداد والبصرة !!!!!!!