ابو جاسم يقرصن صندوق جاسمية

التفاصيل

تم إنشاءه بتاريخ الثلاثاء, 19 حزيران/يونيو 2018 06:56

كتب بواسطة: د.مؤيد عبد الستار

                          مؤيد عبد الستار

ابو جاسم يقرصن صندوق جاسمية

مشهد تمثيلي 

- خير جاسمية ... السلام لله !
* انت َ خليت سلام .. والله لو ما باجر عيد جان هسه اكَـلبها كَـلاب .
- جاسمية .. شنو القصة .. اشو انتي ايدج والكَـلاب .. ما عندج غير سالفة .
* لا ما عندي .. انت ليش صاير مثل القراصنة .
- هاي شنو النوب .. اول مرة اسمع قراصنة ... جاسمية يومية جايبتلي قوانة جديدة .
* اي .. سوي روحك ماتعرف كلشي .. مكرود .. ولا جنك هذاك انته .
- هسه انتي بدال ما تصبيلي استكان جاي .. تتلكيني بجنبش .
* لا جنبش ولا جالغي .. وين رحت بالصندوك ؟
- ياصندوك .. مال الانتخابات !
* اي .. غشيم الله يحفظك .
- انتي ليش حجيج كله دفن .. كَـوليلي يا صندوك حتى افتهم . مو شلعتي جبدي .
* اويلي عليك .. ياصندوك .. ابو جويسم اني عاجنتك وخابزتك .
- ما طول هيجي .. اكَـلج الصدك .. انتي مو بس خابزتني .. لا وماكلتني هم فوكاها .
* ما كلتك .. ليش هو انت تنضاك .. اشو جنك منشار تاكل وما تنوكل .
- هسه صرت منشار .. اي .. الله يرحمك سيد عليوي .. لمن جنتي ترحين يمه تسوين دعه حتى املجج.
* لا دعه .. ولا حرز .. ذيج سوالف الجهل .
- وهسه شنو يابه .. صرتي دختوره لو نايبه بالمجلس .
* اي .. الزمان يعلم .. ما كتلي وين اخذت صندوك العرس .
- اهوووو .. صندوك العرس .. هو شكو بيه حتى اخذه .. ما سامعه مظفر النواب يكول :
مثل صندوك العرس,,, ينباع خردة عشك .... من تمضي السنين
* اي حقـك .. صار خرده .. بس كلي وين اخذته .
- موجود جوه الدوشك فوك المرفع .
* ليش ضامه هناك .. خاف فرهدته ، اروح اشوفه
- لا تشوفيه ولا تدوخين ..جان بيه شجم فلس اخذتهن قرضه حسنه .
* قرضه حسنة .. كول لفطتهن .
- لا . والله ، صويحبي ( مجلوب السلف ) عاز فلوس للدعاية الانتخابية وطلب اساعده حتى يمشي اموره .
* شوف ابو جويسم .. تروح هسه تجيب الفلوس وتجي لو ما لك كعده بهاالبيت .
- جاسمية اصبري عليه شجم يوم ، خلي مجلوب يصير نايب وانا اجيبلج ميت صندوك .
* انا فلوس حرام ما اريد .. كوم جيب الفلوس لا بهذا الفاس اشوف شغلي .كال ( مجلوب السلف ) يصير نايب ! بعده ما صار ، ناويهه على الفرهود .. لا... قيم الركاع من ديرة عفج .