يابو گصايب ذهب

التفاصيل

تم إنشاءه بتاريخ الإثنين, 02 تموز/يوليو 2018 10:24

كتب بواسطة: ميسون نعيم الرومي

ميسون نعيم الرومي

يابو گصايب ذهب

يا بـو گصايـب ذهـَب..
واعيـون ماويـه
بالگلب حبه وشـم
ومطرِّزه خدوده نجم
لو حچه صوته حلم
قداح من دربه نلـِم
ابن الجنوب الترف
الفي الشمس روحي ترف
الحب كلف.. كلش كلف
يحله الغزل .. بيه او إله
يتنعثر ابشفته عسل
جمار يا دمع النخل
للعين.. ضي او كحل
فرحة گلب صبح وامل
حسنه حسن شع الضوه
نسمة سحر.. يا طلته
مشتاگه روحي اوبس إله
تسـألني وآنه شلوني
والضيم غير لوني
والدنيه ضاگت بيه
يابو گصايب ذهب..
واعيون ماويه
***
يابو گصايب خصل
سالوفة گلب ضوَّه الليل
فـَتـَّح ورد باس الوجن
يالبيك روحي تمتحن
وبشوفتك ضحكة نهر
عنبر ورد لمن تمر
رصعة ضوه فوگ النحر
حبك صبي كل العمر
بعيونك الحلوه فرات
واهوار والبردي او گصب
دجله عذب .. كلش عذب
بچفوفي المك فرح
والرمش علمني غزل
يالحبك اهلاله كمل
راحت سنه وجتي سنه
دنيه زهت.. لمن تهل
كهرب ضوه .. عيون الشهل
تسألني وآنه اشـبيه ؟
والدنيه مالت بيه
يابو گصايب خصل
واعيون ماويه
----------
1 / تموز / 2018
ســــــــــــتوكهولم