شباط ١٩٧٢ ،، بيروت العظيمة سابقا !! سالفة من الزمن الجميل !!!!!

                                                        

                         سيف الدين الألوسي

         

شباط ١٩٧٢ ،، بيروت العظيمة سابقا !! سالفة من الزمن الجميل !!!

قرر مجموعة من الاصدقاء الاطباء والاقارب الذهاب الى بيروت خلال العطلة الربيعية سنة ١٩٧٢ وكنت بالرابع اعدادي في كلية بغداد ،، والبيريوديك تيبل في الكيمياء او الجدول الدوري !! وجوليوس سيزر بالانكليزي !!! ولويس وجيميه ابو الفرنسي !! ،، وهؤلاء الاخوة والاصدقاء هم ، والدي رحمه الله والعم د خليل الالوسي رحمه الله وكان مستلم رينو ١٦ بالباكيت من الشركة ، والدكتور غانم الصفار رحمه الله !!! كنا ننتظر هذه السفرة بفارغ الصبر لأن بيروت ولبنان بالشته لها طعم مميز غير الصيف !! كملنه امتحانات نص السنة في ٢٦ / ١ / ١٩٧٢ ،، واخذت تكسي للبيت ولم انتظر الباص ،، موعد الانطلاق في بيتنا بالمنصور الساعة الرابعة عصرا وقبل مغيب الشمس ،، ومواعيد الله يرحمه الدكتور خليل اوامر وبالثواني والدقايق ،، وشحده اللي يخالف الاوامر !!! حضرنا سيارتنا الشوفر امبالا ٦٥ ومليناها بالغراض والذي منه من اكل وماء وشراب ومن كلأ !!! اتى في الرابعة الا ربعا العم د خليل الف رحمة عليه مع د غانم رحمه الله بالصدر ،، والسيدة زوجته ام عاكف ، وعاكف وعلي ( الف رحمة عليه ) بالخلف ، والسيارة مملوءة بالذي منه ايضا ،، والعم خليل لابس مستلزمات السفر المعتادة والتي نعرفها كوننا سافرنا عشرات المرات سوية ،، كليته صوف بالرأس وسترة مال صيد وكان رب الاناقة ،، والدكتور غانم سترة محققة انگليزية ويتشاقه كعادته مع العم خليل !! العم خليل خال موسيقى كلاسيكية بالمسجل الجديد بالرينو !! وبعلو حسه !!! والكل گاعدين عقال بسيارته وصافنين على زمانهم !!
والدي رحمه الله كان سبورت وانا وعمر ويحيى گاعدين ليوره !! ووالدتي بالامام ملتهية تزق بينه لفات وچاي وگهوة من الترمس !!! يابه منريد !! ميفيد !!!
حياوي او يحيى اخوية ، كان صغيرا ونام واني مراهق وده اتفرج مغيب الشمس بطريق الرمادي !!!
عمر اخوية مغفي بس ينام ويگعد !!! انطي والدي مجموعة شرايط ،، قسم غربية حبيات ، وقسم شرقية وقسم لگوگوش وقسم اغاني تركية وهو متونس ،، بعد الرمادي تم تسليم قيادة السيارة ليلا وتحت اشراف والدي ،، والعم خليل صار عصبي ،، شلون تخللي يسوق لهذا الزعطوط !!! رجعت انطيت القيادة للوالد رحمه الله قبل الرطبة بنص ساعة وحيث وصلناها ساعة ١٠،٥ ليلا ،، وبوجهنه الى فندقها السياحي التعبان ذو ريحة الچراچف المخمخمه !! مي الشور بارد والطهارة مكسورة ،، الشي الوحيد الذي يشتغل هو البار الجامع للمسافرين والموظفين !! گعدنه ملخ بالمخاديد الجايفة اني وعاكف وعلي وعمر ، عركة مال مخاديد !!
الساعة الرابعة فجرا دگت صافرة الانذار ، العم د خليل !! لبسوا وتعالوا تريگوا رح نطلع بالخمسة ،، شلون برد بالرطبة والواحد مجبوب مدفي ببطانيات محمضة امر من بطانيات الجيش !! وفوگ القهر قيام اجباري !!!
طلعنه من الرطبة ساعة خمسة شارب كولت العم خليل ،، طبعا دكتور غانم ووالدي يداهروه ،، وساعة السيارة مدتشغل من البرد وحيث اتى معنا دكتور غانم !!
وصلنا الحدود السورية القديمة ابو الشامات قرب دمشق، لم ننزل من السيارات !! اعطينا لمعقب خمسة دنانير عراقية، وهو المطلوب لختم الجوازات !!
وفي الخروج بعد ساعتين من سورية ، نفس الحالة !!! في حدود المصنع اللبنانية اخذت انا الجوازات كلها لطمغها ،، طمغها ضابط الجوازات اللبناني ما عدا جوازي ،، حيث قال لي صيح لي بيك !! رجعت لبيي واجه ويايه وطلع جوازي خلصان منذ اسبوعين !! وقال لبيي ،، بليس ضبطوا بالسفارة العرائية ببيروت !!
لم نزبطه وطلعت بي ورجعت سالم مسلح لبغداد بعد ثلاثة اسابيع لبغداد ومحد لكفها !!
بعد الريوگ الزين في كافتريا. بديعة مصابني بشتورة ،، ودخول الجميع للادب النظيف اللبناني ،، انطلقنا الى بيروت في جو ممطر ووصلنا الروشة ساعة وحدة الظهر وفي الروشة ريزادينس الحديثة قرب شقق مرحبا والتي تغيرت اليوم !!
استلمنا الاجنحة وكنت انا وعمر بجناح صغير وحياوي مع اهلي بجناح اكبر ود غانم بجناح وعاكف وعلي بجناح والعم خليل والخالة ام عاكف بجناح وكلها مطلة على البحر ما عدا اجنحة ولد الخايبة سيفي وعاكف وعلي وعمر ، فهي مطلة على الشارع ، بس احسن !!!
اكتشفنا بأن ريمون ابو السنترال ابو التليفون ،، ميگول الو ،، يگوول آنوو بتنعوص ،، وحرگنه مذهبه طيلة ثلاثة اسابيع !!! آنووو بلگت گبة ٨١٤ !! وهو ميعرف شنو گبه !! شو بليز ؟ سويت ٨١٤ ، او كي هلا معاك !! وره دقيقتين لو علي لو عاكف!!
انووو بلكت سويت ٨١٦ !! هلا معاكن !! گام ياخذ ليبريوم واتيڤان من ورانه!! خبلناه لريمون !!!
كان هنالك فيلم مصري يمثل بالاوتيل واني گابلت حجية شمس البارودي بالريسيبشن مثل الچذبة ولانني چنت بعمر القلب يعشق حتى العوبات ،، واما بنعمة ربك فحدث !!
گضينه الاسابيع الثلاثة ونسه واني افرفر بالشوفر ببيروت ومحد يوگف سيارة رقمها بغداد بل بالعكس ، اهلين وسهلين!! ،، حيث شديتلها هورن هوه خمسة ابواق بخمسين ليرة مع هدية هورن بقرة في عين المريسة حولته الى الرينو لاحقا!!

   
وديت الربع فديوم الى سينما اولدارادو وبعد لعبنا البولينغ القريب ،، وكان الفيلم The Baby Maker !! ثم حرگ مذهبي العم د خليل لانني وديت زعاطيط للفيلم وقطط مغمضة وهم علي وعمر ،، خلاني بالمنع وابوية يضحك مع د غانم ،، ودكتور غانم يقول ،، اكو خوش دونديغمة يم السينما ، خو ما رحتوا ،، بيها بنات موزينات ،، وهوه خربان من الضحك مع والدي والعم خليل يرجف من العصب!! ثم يقلب الموضوع د غانم ويقول !! خليل سمعت نتائج مباحثات النفط بمونتي كاغلو!! هايه اذاعة جديدة !!
كانت سفرة من العمر حقا ،، من ايام الزمن الجميل ورحم تعالى بواسع رحمته الاساتذة في الطب الكبار الدكاترة غانم اسماعيل الصفار وخليل ابراهيم الالوسي وفاروق سيف الدين الالوسي.قدوتي في الحياة وما تبقى منها . تحياتي للجميع .

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

961 زائر، ولايوجد أعضاء داخل الموقع