سلامات يا شبل القائد !!!!!

                                                   

                            سيف الدين الألوسي

        

        سلامات يا شبل القائد !!!!!

في يوم الخميس ١٢/١٢/ ١٩٩٦ ،، كان لدي مكتب في بناية ميسلون بالمنصور ،، المكتب مؤثث جيدا ومرتب ولقلة الاعمال حولته الى مرسم ومحل للاختلاء بالنفس والكتابة والرسم !!!
ذهبت الى المكتب عصرا واتى ابني البكر عبد الله مع اصدقاؤه وكان في الثاني متوسط ليذهبوا للوقوف مثل صرمپارية الاول قرب دوندرمة الرواد وهم في بداية المراهقة !!! في الساعة السابعة الا چارك اتصلوا بي مجموعة من الاصدقاء ودعوني الى كعده في نادي المنصور حيث نضع الاسكنجبيل بالقوري بسبب الحملة الايمانية المباركة !! تذكرت ان تانكي البنزين بالسيارة وصل الى الربع ولخوفي على الفيت بمب من الگوه مان ولسعره العالي ،، كنت افول السيارة دائما ،، نزلت من المكتب للسيارة ولاذهب لتفويلها من بانزين خانة ابو جعفر المنصور ومن ثم لارجع واخذ ابني ابو نجم من تجمع صرمپارية المنصور ! وارجعه للبيت ،، ثم ابدل ملابسي واهج لنادي المنصور السياحي مع الربع !!! وحيث سهرة الخميس الشتوية مع عودت عيني !!
فتت بالسيارة واشرت لابني بالتحضر ولكوني ذاهب لتفويل السيارة بالبنزين وعائد لأخذه !!!!! وانا واضع هوز البنزين سمعت رشقات كلاشنكوف قريبة !!! بسرعة فولت ورجعت خوفا على ابني ابو نجم !! قبل الرواد بخمسين متر رأيت سيارة بورش بلون شامبيني تمشي على السلولي !! ودون سائق !! والدنيا مثبورة وضابط مرور برتبة نقيب يركض مفرع وحيث اتى ابني ووجهه اصفر من الفزة وقال لي :: بابا كتلوه لعدي !!!! كتله اصعد بسرعة وصعد ،، واخذت فرة ده اشوف شنو القضية ، حيث استمرت البورش المنگبة بالرصاص تتهادى وتصطدم السيارات الواقفة على جنب الشارع ولحين وقوفها على رصيف الجزرة الوسطية المقابلة لزهور ريحانة ومحلات مرجانة للالبسة الرجالية ! وقرب الاشارة الضوئية !! والدهن يخرخر من الكيس والهايدروليك من الكير !! ركض جمع من الناس لاخراج عدي من السيارة وحيث كان نائما تحت المقعد الامامي الايمن واخرجوه وكلنا عبالنه انه ميت ! لا نبض لديه او نبضه متوقف وينزف بشدة ! حيث اوقف صاحبه سيارة تيوتا ١٩٨٥ سوبر زرگه فيها عائلة وانزلهم من السيارة ،، واصعد عدي بالسوبر بمساعدة الناس وطار بالسيارة باتجاه معرض بغداد ،،، اني رجعت قفلت المكتب واخذت ابني وبالمنطرد للبيت !! وخابرت الربع وكلتلهم عندي أفلونزا شديدة ومصخن ومرح اجي للكعده !! افتهموا الموضوع وطلعوا كلهم افلونزا وصخونة وكلمن كعد انجب ببيته !!
بقيت احتسي وادخن وانتظر بث الخبر من التلفزيون ولحد الساعة ١٢ حيث قطع البرنامج وبث خبر محاولة الاغتيال وان شبل القائد سلامات !! كلت مع نفسي والله جذب ،!! ، شفته بعيني ميت !! المهم خرج الرجل من الموت باعجوبة ليموت بعد سبعة اعوام موته مشرفه اكثر كثيرا !
كان لدينا صديق يخاف من خياله !!! ومنذ ايام الكلية والعسكرية !!! وهو وردة مال الله ،،، لديه محل سبير بارتس في شارع ابو جعفر المنصور ،، عزل محله لمدة شهر بعد الحادث ورجع فتح محله ، وقلنا له تره اجو الفرقة الحزبية والامن الخاص وسألوا لمن هذا المحل ، ولماذا لم يعلق لافتة (( سلامات يا شبل القائد )) مثل بقية المحلات والتي تم رفعها قبل ايام !! راح ابن الخايبة وخط لافتتين تربل اكس لارج ، وحدة سلامات يا شبل القائد والاخرى سلامات يا زين الشباب ،، علگها بباب المحل وبعد ان رفع الجميع لافتاتهم !!!!
!ثم قلنا له ذبحت ذبيحة على سلامة الشبل ؟؟ قال لا !!
گناله هنالك توجيه وتبليغ من القيادة بذبح عجل مربرب او جلب صينية قوزي ، وصينية دجاج لاجل اهل النقرس ومن تجهيزات الانعام حصرا ،، ودعوة كل الاصدقاء والجيران من المحلات حصرا للاكل والدعوة للشبل بالشفاء العاجل !!!
خطية راح جاب صينيتين قوازي وصينية فوگاها عشر دجاجات واربع تباسي بيتنجان وفاصوليا ،،، من الانعام بالصليخ حصرا !!
واحنه نضرب بالقوازي والدجاج وندعي بالشفاء للشبل وبالموفقية للصديق الوردة والذي باع محله بعد دكت الشبل التي كلفته بكد ربح وشغل سنتين !!!!

ودمتم سالمين جميعا وبليه قوازي ودجاج !!!!!!!!!

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

907 زائر، ولايوجد أعضاء داخل الموقع