جاسمية تفضح ربع ابو جاسم

التفاصيل

تم إنشاءه بتاريخ الثلاثاء, 21 آب/أغسطس 2018 19:34

كتب بواسطة: د.مؤيد عبد الستار

                             مؤيد عبد الستار

جاسمية تفضح ربع ابو جاسم

                   مشهد تمثيلي الحلقة ١٣

* دكَـن حـيل خالاتي وياي ... جـبته برشـيح العـين ومراجـشف جـلاي
- ها جاسمية ... مطربة اليوم .... ليش ما تروحين لـلتلفزيون بلجن تصيرين بمجان حضيري ابو عزيز .
* اي .. من نار البكَـلبي ..جا هي صايرة دايرة .. بعد كل ها العنجلية والطربكَـة وجيب قاضي ودي قاضي تطلع سالفة الانتخابات هيه هيه .. ما تكلي شلون دبرتوها .. شلون دسترتوها ؟ّ!
- النوب احنا دسترناها .. احنا ياهو مالتنا .. هو القاضي راضي .. المفتي شعليه .
* ماطول هيجي .. خلي القاضي باجر يفيدكم من تهجم الوادم على المنطقة الكَـشرة .
- لا تخافين علينا .. ماطول السفارة الجبيرة يمنا .. ما حد يكَـدر يهجم علينه .
* جا ، ما نفعت سفارة ابو ناجي نوري السعيد .. اذكرك لو نسيت ... يومن صاحبكم لبس عباية وسحلوه بالشوارع !!
- راح ذاك الزمان .. جان اكو شارع يفتهم ، يهـز اكبر حكومة .. هسـه الشارع ملتهي باكل بطنه ، لا تظلين بعكَـل أهل كَـبل .. الدنيا تغيرت .. يا دوب تلكَـين واحد يقـره ويكتب وشهادته ما مزوره .
* والله ما كو غير ربعك شهاداتهم مزورة .. ذولاك ربعنه كلهم شهاداتهم من صدك والعالم كله يعرفهم .. لاجن انتو ما تنطون للوادم طريق .. انتو ماكلين الاخضر واليابس بحجة الدين اللي برئ منكم ومن حيلكم .
- هسه ياجاسمية قابل اني حارف رويسه .. مو كل الوادم تبوك وتنهب الاخضر واليابس .. احنا شطايح بيدنا.
* شوف ابو جويسم .. كل شط واله جرف .. انتم ما تكدرون تسون الشط مرك والزور خواشيك .. احنا تاليها ناخذ حقنا بايدينا .
- يعني جاسمية انتي تهددينا .. تره احنا مو تايـهـين ... احنا اولاد عشـايـر اجاويد .. اذا تهددينا نعرف شغلنه وياج !
* والله تعرف شغلك ما تعرف ... اولاد الملحة راح يسحلوكم بالشوارع واحد واحد .. حتى لو لابسين عمايم بلاك اند وايت .. وانا وياك على مد الله .