انا والططوة جيران !!!

                                             

                       سيف الدين الألوسي

     

            انا والططوة جيران !!!

الططوة لمن لا يعرفها هي نوع من انواع طيور البومة ،، لونها ابيض ولديها صوت حزين وعاطفي يزيد الون ونه ،، عندما تطير ليلا فوق حدايق بغداد !!

شافتني البومة الططوة گاعد بالحديقة وحيد فريد ، وگالت صدك چذب سيفي ابو سوالف الاول والتصنيف ،،حزين وگاعد وحده بالحديقة يدخن ويتزقنب !!! گالت الا انزل واگعد يمه !!
نزلت الططوة وعينها حمرة من التعب ،، وگالتللي تسمحلي أگعد يمك !! وبعد ان جرت الاسكملي وخلت رجل على رجل ،، سألتني ؟
ابو عبد الله ،، اول شي اگدر اخذ جگارة !! گدامج الباكيت !! اخذت جگارة وورثت ونفخت نفس بيه مليون آه !
هايه جگايرك ثگيلة كلش !!!
اخليلچ فد بيك اسكنجبيل ططوتي !!؟؟
اذا ممكن عندك واين ؟؟
لا والله ماعندي ،، اجيبلچ جن لايم تونك !!!
علواه !!!! بس لا هواية ،، تره معدتي مو زينة !!!
ثلج ؟؟
اي فدوة حبي ابو عبد الله !!
چبتلها الگلاص وبيه گصبة مال طيور حتى تشرب !! ومتغص !!!
وره اول گمع ،، صدك ابو عبد الله ،، اني اليوم مقهورة وفوگ قهري ،، جون مكين انطاك عمره !
اي الله يرحمه ،، چان اميركي اصلي ويحب بلاده .
اخذت نفس وكمع لاخ وگالت !!
سمعت بحسني الخفيف ،، سمنان وديريد يسوي نفخ ،، يمكن مخرف ؟!
گلتلها لا مسمعت ،،
گالت صارللي ساعة افتر فوگ المنصور ،،، بيوتها العتك لو هجوا لو ماتوا لو مجبوبين ببيوتهم مثلك ، عبالك فريد الاطرش ! ونادي المنصور والريسز صاير عبالك مگبرة !!
وين ايام اول ومن چنت افتر ، وحس غنه فرقة اراكس بالنادي يلعلع بالسمه ، ، حتى چنت انسى حزني ، وانسى نفسي ، واگوم اهز رگبة بالجو على اغنية كوانتا ناميرا !!
وكرعت اخر گمع بالبيك وورثت جگارة !! وگالت ،، اني الططوة رح اتخبل وره هل العمر ! ،، بلكت اهاجر للنمسا !! بس المشكلة ماكو ربع من الططوات والبوم بالنمسا ،، وبطرگ الغربان المجولحة !!
گلتلها فدوة طو طو ،، تزقنبتي ، ودخنتي ، ولغيتي ،، طيري هسه ،، مجبتي خبر بي خير من گعدتي لي هسه !!! زادت الكآبة وقل التفاؤل !!!
گالتلي ،، اشگد انت مكروه ،، يعني اني ططوة ،، شتريد اسويلك چالغي !! لو ارگصلك !!!!!!
ظل اسمع ون يا گلب ،، الى ان يگوم گلبك مثل عقل السليبرتي !!
باي وثانكس على الدرنك !! شلون صديق كآبة !!! شايل هموم الدنيا !!!
سسسسسسسسو ڤاج !!
طيري بومة ، ثولة !!! ططوة غبرة مال تالي وكت !!!!

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

502 زائر، ولايوجد أعضاء داخل الموقع