د.سعد العبيدي
حچاية التنگال ١٤٩
كِثَرْ الحچي على الفاسد والفساد، وامتلت العقول بالمفردات الي تحچي عالفساد. الريس، لا، الرؤساء لإن إحنه عدنه (٣) رؤساء كلهم يحچون على الفساد، ومثلهم الوزير والمدير والاستاذ والقاضي والناموسز والعارسز والأدبسز، هم حادين لسنهم ويحچون عالفساد، ومن كثر الحچي ما بقه أكو شي يمكن ان ينحچي.
الناس تسأل ليش.
الجواب ببساطة، لأن إحنه مجتمع فاسد، وأهله فاسدين، وهواه فاسد ومياها فاسده.
لا تزعلون، لان سياسي يطلع ويگول فشلنهَ، نرجع نصفگله القائد الضرورة. وبرلماني يعترف بايگ وماخذ ومتقاسم والقضاء ما يتحارش بيه. ومحافظ كلها تعرف بيه يبوگ بذاك الزمان وبهذا الزمان يصير وزير، ينحكمْ، ويطلع بعفو ويرجع يرشح بالانتخابات ويجيب أعلى الأصوات. ولأن بالتصويت داخل البرلمان واحد يباوع على ورقة الثاني ويجي ثالث يصوّرْ أوراق التصويت علناً، ورابع يفتر بين المصوتين يشتري أصوات ويبيع، ولا چن المقدرْ صايرْ. وكلمن يصير چبير حتى لو بايگ حملْ البعير نصفگلهَ ونردحله وانهوسله، ومن يفوت من يمنه نسميه أبو الليثين.
عمي لا تسألون ليش، لأن كليتنه قابلين هذا الي دا يصير، متونسين عليه، عبالك نسوي الشي، ونساهم بيه ونرتاح من نحچي عليه. مجتمع تحسه منخور من جوه، أنتهى بيه العيب، ونگطة إلْحيهَ وگعت. أگول منو يجرأ يگل للفاسد أنت فاسد والعشيره الفاسدة تحاميه، خو إذا عنده فلوس بالملايين وهو صخي من الزينْ مثل أبو فلان، كلها تگوم تطحن بصفه.
الحل، بادينا احنه، إنتوب احنه، نرجع نستحي احنه، نواجه الفاسد احنه لو نبقى هيچ الى أن يمسخنه الزمن قرود لا حَيْهَ ولا حظورْ.
611 زائر، ولايوجد أعضاء داخل الموقع