سيف الدين الألوسي
سوالف ومشاهد عراقية عتيگة في طريقها للزوال !!!
١- تغطية التلفزيون بجرجف حتى لا ينشل ويستبرد .
٢- كلاص خاص لرب العائلة ريحته يانسون ومحدد من جوه !!!
٣- وجود المغسلة بصف باب الطهارة ،، وبيها جرجف بلاستك مشجر داير حبل وصابونة رگي صايره ورقة !!
٤- الاوجاغ متغير لونه من الابيض الى البرونزي من طفار الدهن من الطاوه !!!
٥- مزهرية بنص ميز الاكل بيها ورد جوري اصطناعي وامام الميز لوحة ستل لايف مال شيف ركي وعنكود عنب وخوخاية وتفاحة وبطل واين ،، چانت قبغ مال قوطية نستلة مال بسكولاته !!!
٦- جلب صغير لعابه ،، يم جامة السيارة الوره يهز رگبه بالطسات من تمشي السيارة !!
٧- فرو احمر على دشبول السيارة منكب من جمرات الجكارة !!!
٨- عمل الطهارة او بيت الادب او الخلاء جوه الدرج ،، وبمساحة ٩٠ سم مربع ،، ماخذ منه ٣٠ سم مربع البريك والمزمبلة !!
٩- صورة لرب العائلة وزوجته مال زواجهم معلگه بنص الهول ،، يگابلها الرجال بالليل ويشرب ويبجي !!!
١٠- بطل اسفنيك جوه الدرج ،، وبايسكلات ام تلاث چروخ وقعادة وقنادر وبوابيج عتك !!!
١١- قواطي مال حليب كيكوز بالثلاجة مليانه مي ،، وريحتها بيض لان الجهال شربوا بيها مي گبل ميغسلون حلگهم !!! ووحدة بالفريزر حتى تجمد لاستعمالات رب الاسرة في الهابي اور !!
١٢- مبردة بليه طوافة والمي يخرخر للشارع !!
١٣- صورة لمن يحكم البلد تتبدل تلقائيا ويه تغيير النظام والشخص !!!
١٤- غسالة سيمنس فوكاها چرچف ومزهرية وطاولي !!!
١٥- طمغة مال نعال ابو الاصبع على حايط الهول !!
١٦- ابو بريص بالسگف يم الرازونة ،، ديتفرج من فوگ على متحف اللوڤر !!! .
١٧- صناديق بوش مال ببسي وفريدة وتايرات عتك وجاملغ مال انگليا بالسطح !!
١٨- شيشة مال طرشي شلغم عتيك مكطن ، بالرازونة مال المطبخ !!
١٩- دفتر رسم مال ابو البيت من چان صغير ،، بيه شمس دتضحك واشجار وبلم ،، على اساس لوحة لبيكاسو !!
٢٠- بكرات لفريد الاطرش وام كلثوم ومسجل فيليبس يعلس ، في گبة الخطار بالركن الهادئ منها !!
٢١- ردن بجامة بازة عتيكه ،، صايرة وصلة مال مسح طوز مسينه !!
٢٢- كتلي وقوري مفعصه على الطباخ !!
٢٣- شيشة ريحة منين خضرة وشيشة بريل كريم على المراية فوك المغسلة ،، مع مشط مليان گشره !!
٢٤- لباس مال جاهل ساد البلوعة والبلوعة مطوفة !!!
٢٥- راديو گروندنك ابو اللمبات يخرخش !!
٢٦- تلفون انكليزي أسود ودليل تلفونات طايره نص اوراقه !!!
٢٧- لعابه بلية ايدين ورجلين بنص المطبخ !!
٢٨- صوبة علاء الدين قبغها صاير أسود من تفال الجهال !!
شوية سوالف مضحكة حتى ننسى مآسينا ولتغيير المزاج المكتئب للجميع ،، مع كل التحيات والمحبة للجميع .
595 زائر، ولايوجد أعضاء داخل الموقع