سيف الدين الألوسي
من الذاكرة البغدادية الجميلة !! مشاهدات كوميدية !!
١- ابو البيت بعصرية في تموز ديرش الحديقة الاصلية ،، ثم الحديقة الامامية وهو لابس فانيلة علاگه مسينة ،، ولباس يا ظالمني ،، ومرته ،، فوت خش جوه مو عيب كدام الجوارين طالع بالشارع باللباس !!.
٢- باص امانة اي سي ،، مبيج من يم الباب ،، بسبب الثگل !!
٣- شاب صرمپارة قديم ،، شعره تواليت وبكله بدهن بريل كريم !! راكب بايسكل ومجلب بلوري شوفرليت كلابي ديجره ، هو والبايسكل !! راحت كل الهيبة !!
٤- نص بارات بغداد گبل ولغاية الثمانينات ،،بأسم سنحاريب ووالده سرجون الذي تغزل ببغداد قبل بناؤها بثلاثة الاف سنة ،، چان ضارب قونياك بالصودا !!!
٥- ابو التكة والفشافيش ، اذا مو الذبان داير حبل ،، يعني اللحم مو لحم غنم !!
٦- ريحة العمبة الشريس مال ابو العربانة كبل ويه البيض ،، تبقى متلازمة ستة ايام مثل الاصبع البنفسجي للانتخاب !! متروح لو تغسل ايدك الف مرة !!
٧- ريحة تتن جگارة بغداد جايفة مثل ريحة جواريب الجرسي مال البسطال !! وره واجب بتموز !!
٨- سعر النفر بالصواريخ ( فورد تاونس الماني ڤان موديل ١٩٦٠ ) من المنصور لباب الشرجي ٢٥ فلس !! وللعلاوي يم محطة قطار البصرة ( كراج العلاوي اليوم) ، ١٥ فلس ( بسعر الببسي ) !! والسكن يغلس ويكلك ماعندك خردة !! التاونس شركة لاسرة بيت عريم الكريمة من الفلوجة أيام زمان .
٩- بنات الثانويات گبل ،، يقلدون زبيدة ثروت ولبنى عبد العزيز وفاتن حمامة ونادية لطفي ومريم فخر الدين ووو من يطلعون من المدرسة ،، والولد الصرمپارية يقلدون كمال الشناوي وعمر الحريري وحسن يوسف ويوسف فخر الدين واحمد رمزي ووو، والمديرة مال البنات چانت تصبغ شعرها مثل ميمي شكيب وهي ذراعين بالعرض راهي !! تريد ترجع نونو !!
١٠- طلاب وطالبات گبل تشرب چكاير مفرد ، ٣ ب ٢٥ فلس ،، الولد يشربون الجكاير بالشارع والبنات ببيت الخلاء ، حيث الجو شاعري !!
١١- سماعة التلفون تحمه اذا الواحد حچه بيها اكثر من ساعة وخصوصا لاغراض لوجستية ،، وعندما يسأل ابو البيت ، اشو التلفون صارله ساعتين مشغول ،، الاجابة ،، ممطبوك زين !!! !!
١٢- في حفلة راقصة مثلا ،، قبل ٥٠ سنة وفي احد نوادي بغداد !! صرمپارة ذكر قديم خجول ،، وبتشجيع من ربعه للرقص ويه صرمپارة انثى معجبة به غير خجولة !! والاغنية دي (ليلى گبل متخرف ) للسير توم جونز !! يروح الولد وهو يعدل بهدومه ويگول للبنية ،، تسمحيللي بهل الرقصة ،، تجاوبه بخجل جذابي ،، متأسفة ، تعبانه ،، على اساس شايله عشرين چيس چبنتو !! ويرجع ابن الخايبة ردود ،، مخنوك بالف عبرة ،،، والكل تضحك عليه ،، اناثا وذكورا !!
١٣- في امتحان الوراثة ،، تزوج ثور مطكع جوزي وابيض عيونه زرك وعنده شامة بالرگبة ،، بهايشة سوده مطكعه بابيض وعيونها سود ،، ما هي نتائج الزواج !!؟
اني جاوبت طلع محلل استراتيجي !!!
كل التحيات للجميع
602 زائر، ولايوجد أعضاء داخل الموقع