جاسمية ترشح للوزارة على عناد ابو جاسم

التفاصيل

تم إنشاءه بتاريخ الجمعة, 12 تشرين1/أكتوير 2018 10:21

كتب بواسطة: د.مؤيد عبد الستار

                           مؤيد عبد الستار

جاسمية ترشح للوزارة على عناد ابو جاسم

مشهد تمثيلي ساخر 16 

* نايل جـتـلني ونايل غير الواني / ونايل ببحر شوكَـك طحت / سهران خلاني
- اي بالله جاسمية ..كملي .. هاليوم سويحلي
* ولك يا سويحلي .. هذا من ضيم كلبي
- اسم الله على كَـلبج جاسمية .. شعندي غيرج .. اكَـول سمعتي بالخبر الجديد
* خير يابه .. انت ما وراك غير الاخبار المصخـمه
- لا والله .. اليوم خبر تازه ....يكَـولون ريس الوزارة ، يعني الراس الجبير بالحكومة ، طالب من الناس ترشح للوزارة حتى يختار منهم وزراء .
* اي .. شكو بيها .. خوش سالفة .. بلجي يحصل على ناس اولاد اوادم يسويهم وزراء .
- انتي كل عكَـلج يحصل على ناس اولاد اوادم .. مو راح اليسوه والمايسوه يرشح نفسه ، وتعال عمي شـيّـلني .
* ليش تعال عمي شيلني .. يسوون لجنه من الختيارية ويستنكون شجم واحد ابن اوادم مو حراميه ويسلموهم الوزارات .
- يعني هذا ابن الاوادم من يصير وزير ما راح يبوك .. قابل ضارب لقاح ضد البوك .. اشو الدولارات والدنانير جـوه إيـده بالمجر مال الميز .. وياخذ شمايريد مو ابو المثل يكَـول .. ماطول بالنخله تمر ماجوز من شرب الخمر
* ابو جويسم .. شجاب هاي على سالفتنه .. يا تمر يا خمر ..!! انت ما بالك غير السوالف المكسرة ، يعني انت شايف كل الناس حرامية .. ابو جويسم روح اقره شلون سـوه مخاتير محمد بماليزيا حتى تعرف الشريف من الحرامي
- منو يابه هذا مخاتير .. هو مختار واحد عدنه بالسلف وبالينه بلوه .. هالنوب مخاتير ماليزيا .. جاسمية خلينه بضيمنه .. وين تردين بينه .. مخاتير ماليزيا ... هذوله وين لكيتهم ..!!
* ابو جويسم .. هذا ريس وزارة اسمه مخاتير .. شوكت تتعلم .. لو بس تعرف تفرهد مال الله وعباده .
- آني أفرهد .. ده شوفي مجلوب السلف شلون صار آفه من صار نايب .. كَـام يبلع عمارات ومارسيدسات ..
آنه شمحصل .. تاير مال سيارة ما قابض .
* جا وينه حجيك ذاك .. تكَـول نبربع بس يصير مجلوب السلف بالحكومة !! اشو ايد من وره وايد من كدام .. مو كَـتلـك ربعك ما بيهم خير .. بس يعرفون ينهبون مال الوادم .
- كلها من وراج .. خالّـه خشمج بها السياسة العوجة مالتج .. والله شنو حقوق المرأة .. يابه كطعتي خبزتنه .. حتى مجلوب السلف كَـلب علينه من وراج وره سالفة حقوق وعقوق المرأة .
* انت ما تعرف شكثر حقوق المرأة ضرورية للشعب وللوطن .. ولعلمك آنه رشحت على وزارة المرأة ووديت طلب لريس الوزارة .
- ها .. مو كَـلت اليسوة والمايسوة يرشح نفسه .. انتي بلا وزارة الله ما يجرعج .. هالنوب تصيرين بالوزارة ..!!
والله خوش .. اكـيد راح تكَـطعين رزقي هـينوب .
اكَـوم أقدم طلب آني هم بلكت اصير وزير الرجال مو بس انتي وزيرة المرأة . حتى يصير دك الاصبعتين للصبح .