جاسمية : تفرهَـد البنك يا ابو جاسم

التفاصيل

تم إنشاءه بتاريخ السبت, 17 تشرين2/نوفمبر 2018 07:51

كتب بواسطة: د.مؤيد عبد الستار

                        مؤيد عبد الستار

جاسمية : تفرهَـد البنك يا ابو جاسم

مشهد تمثيلي ساخر 20

* على الويل ويلي سـطه / ابن الحمولة سـطه
باك الحـجـل واسـكـطه / وخـلـه الرجل خالـيه
- خير جاسمية منو باك الحـجـل
* ياحجل ابو جويسم .. أكبر من الحجل
- لا بالله .. شعدنه أكبر من الحجل .. قابل باكو الورور مالي
* ولك ابو جويسم باكو البنك
- البنك...!! شلون ينباك ... مو بي قاصه حديد
* والله انت كَـلب سمجه .. هو ابو القاصة منو ... غير مجلوب السلف
- يعني مجلوب السلف باك البنك ...؟ والحكومة وين !!
* الحكومة نايمة ورجليها بالشمس
- بروح ابوج ما تكَـليلي شلون يبوكَون البنك
* انه أكَـلـك .. مجلوب السلف بايـك القاصة وضام الملايين بـبـيت عمته
- ها .. وعمته فضحته ؟
* لا .. شلون تفضحه عمته .. ربك سبحانه وتعالى فضحه
- معقولة ..
* اي معقولة .. الله ما يضرب بحجار ، إجـت مطرة كـلـش على سطح بيت عمته وغركَـت البيت
- اي .. وشجاب المطرة على مجلوب السلف وفلوسه ؟
* المطرة غركَـت البيت والدنانير طوفن بالدرب ... والناس من شافت الملايين طايفه
راحت ركض لمركز الشرطة ولموا الدنانير وسلموهن للحكومة
- وشلون عرفوا هاي مال مجلوب السلف
* شافوا توقيع المحفوظ مجلوب السلف على الدنانير وعرفوا هي مالته وضامها إبـيـت عمته
- كَـولي غيرها جاسمية .. لاتنكَـلب بينه الدنيه .. صايره .. دايره ، واحد ضام البنك إبيت عمته
* اي صايره .. ما سمعت !! ناقشوها بالبرلمان ودزوا علـيّه شاهد لان آنه شفت الدنانير مسيسه بالشارع .
- جا .. مالميـتـينه شجم مليون نروح بيهن للحج
* عمت عينك ابو جويسم تريد تروح للحج بفلوس مجلوب السلف .