د.سعد العبيدي
حچاية التنگال ١٦٠
أگلك إنتَ ليش داير بال لامتحان السادس الثانوي. إبني، أبويه، أخويه، تمتحن مرة وتسقط مرة لا تدير بال. تعيدها ثاني وهم تسقط ولا يضل على بالك بال، أكو ثالثة. أگللكياها بصراحة، تنجح تنجح، هاي هي (فلسفة التعليم في عصر التنجيم) بعدين إحنه نريد نبني قادة المستقبل، خوما الي دا يقودون العالم أحسن منك، ونريد نرفع راس أمتنا العظيمة، والي دا يرفعون خوما أقوى منك، وبعدين اشلون نرفع غير انت الشاب الي راح ترفع، وما أخفيك سر، لا تحسب حساب المعدل لمن راح ترفع، قادة التعليم بهذا البلد الأمين حلوها هينه لينه، أبتدعولك سالفة الموازي.
رد وگال شنهي سالفة الموازي ما أعرفها؟.
سهله اشبيك مدوخ راسك، أبوك ما شاء الله فلوسه متلتله، يشتريلك خمس درجات من وزارة التعليم العالي والسعر حسب الكليات، يبدي قريب المليون واصعد فوگ، يعني إذا معدلك خمسه وخمسين وما انقبلت بأي كلية اشتري خمس درجات تصير ستين، بهاي الحالة تنقبل، واذا خمسة وتسعين وبالطبية ما انقبلت اشتري خمسه بچم مليون تصير مية وتنقبل.
زين مو هاي تخالف القانون؟. وك يا قانون؟.
قانون التعليم بالعراق الي يگول التعليم مجاني، وليش هسه صار بفلوس؟. أكلك انت صدك بطران، زين والفقير شيسوي؟.
أهو رجعنه للمثاليات، الفقير يطگ راسه بالحايط من گايله يصير فقير!.
خوش والاستيعاب؟. واشبيها يگعدون الطلاب لزگ.
خصم الحچي ذوله ولدنه ومن عدنه وبينه، لازم ينجحون ولازم يقودون وهمه الي راح يحققون النصر على أعدائنا، وهمه الي راح يرفعون راس الأمة للسما.
معقولة؟.
معقولة ونص.
1074 زائر، ولايوجد أعضاء داخل الموقع