سفير سابق حاروگة وشعب مرتاح !!!!!

التفاصيل

تم إنشاءه بتاريخ السبت, 09 شباط/فبراير 2019 20:40

كتب بواسطة: سيف الدين الألوسي

                        سيف الدين الألوسي

سفير سابق حاروگة وشعب مرتاح !!!!!

أحد اصدقائي القدماء كان لديه خال وزير مفوض بالخارجية في البرازيل ،، ثم اصبح لاحقا سفيرا للعراق في دولتين قبل ان يحال على التقاعد بداية الثمانينات للعمر القانوني ،، الف رحمة على روحه الطاهرة ،،، وهذا الخال هو نجل احد كبار الشخصيات العراقية والبغدادية في العهد الملكي ،، وكان يشبه احد مدرسينا في كلية بغداد !!!

سنة ١٩٧٥ وفي تموز اتى الوزير المفوض لبغداد في مهمة وسكن ببيت اخته والدة صديقي الغالي ،،، وصادف ذلك الوقت مع احتفالات تموز الكشرة ،،

وكانت تطلق الصعادات والالعاب النارية من وسط الدوب في نهر دجلة ،، وعلى شارع ابو نواس ،، وحيث يشهد هذا الاحتفال جموعا بشرية مثل يوم المحشر !!
كانت هناك في ذلك اليوم حفلة في نادي العلوية للعزيز الصديق الهام المدفعي مع فقرات غنائية لمطربين ومطربات عراقيات ايضا وراقصة ومطرب لبناني لا اتذكره بالضبط اما عصام رجي او سمير يزبك !!!!
الدنيا مثبورة ونحن حاجزين ميز ابو عشرين نفر بالنادي ،، وكنت مسافرا بعد اسبوع !! في النادي الاوخ ينتظر ،،، وانا مبردغ من صدك ،، فذهبت لاخذ صديقي ابن اخت الدبلوماسي وصديقه وصديقي القريب ايضا من بيتهم بالساعة ٨ مساءا ،، وقبل وكت حتى نتلافى الازدحام في الكرادة على الجسر المعلق !! ولكون جسر الجمهورية مقبط لابو موزة من متفرجي الصعادات بالشط !!!
دكيت هورن صوت الهايشة في الرينو دوشيش مالتي ،، ليخرج اصدقائي وخال صديقي والكل مبردغين وكاشخين وخالين ريحة !!! گال صديقي ،، خالي رح يجي ويانه !!
يابه مو هو ضيف واحنه ميزنه مقبط واخاف ميدخلوه بالنادي ،، وهذا أويتر حقنة ، ميعرف ابوه وهو المسؤول عن استعلامات العلوية ،، گال ، بكيف أويتر ،، خالي سفير !!!
يابه ميخالف ،، صعد خالو بالصدر يمي والاصدقاء كاعدين ليوره !!
وين ما فوت الشارع مقبط وازدحام ، واني مستعجل !! اباوع بالمراية وامد ايدي وافشر على اصدقائي بالاشارات الكفية !!!
عبرنه المعلق وطلعت عل البره والناس مثبورة وازدحام ومتونسة !!! وخال صديقي !! يقول كل دقيقة ((( شعب مرتاح ))) ،، شعب مرتاح متونس !!!!
كتلهم رح ننحرك !!! لو رح نندعم لو الشعب مرح يضوك الراحة طول عمره !!!
رجع گال ، البرازيل، شعب سعيد بس ممرتاح !!
العراق ، شعب مرتاح وسعيد !!! شباب مرتاح ،، شباب سعيد ضامن للمستقبل !
ماعندي حرمل أطكطك بالسيارة كولت عجايز الاول ، وحتى اقره المعوذات !!
گلت ويه روحي ،، رح يحرگنه حرگ ،، اذا مو هسه بعد سنوات !!
نريد نطرد عيون ، ماكو قبض ووصلنا للنادي ساعة عشرة والباركنغ مقبط ،، وكل دقيقة ،، شعب مرتاح ،، متونس !! عمي انزل خلي اطبك السيارة واجيكم ،، وصوت الهام يلعلع من الحديقة !! وكفت السيارة بالچعب يم باب الخروج !!
رجعت لگيت صديقي يقول بأن اويتر موظف الاستعلامات ميقبل خالي يفوت !! فدوه اويتر مروتك ،، تره هذا سفير وبعد يومين مسافر ،، قنع وخلانه نفوت !!
حديقة العلوية مقبطة ، وميزنه مال الشباب بخانة الشوادي يم ملاعب التنس ،، وميز الاوخ بالجهة المعاكسة يم القاعة الجديدة ،، والخال الضيف يقول ،، ليش ذبونه اهنا ، ولام اليشا المنتدب من المنصور للعلوية وقبل انتدابه للقصر وهو شقيق عبد البارمان الوردة ، على بعد ميزنا ،، كتله اليشا معليك ،، جيبلنه شكو درافت عل الميز !! ومكذب خبر اليشا الورد !!
المهم تونسنه في ظل الهام وسعدون جابر وحسين نعمة ولميعة توفيق وغيرهم ، وبعد ان تفرقنا حسب المنهج ، للمراجعة والمطالعة داخل النادي وخارجه وللضرورات اللوجستية !!
وحيث اصر الخال السفير على دفع حسابه وحساب ابن اخته وحسابي وصديقنا ،، حيث اشترى دفترين لفلوس النادي بعشرين دينار ،، كل دفتر بعشرة دنانير ( كانت في النوادي دفاتر تعادل مبلغ من العملة ،، باوراق مثل لعبة المونوبولي !! ) ،، وعندما جلب اليشا الدفترين شكهم مثل بطاقة باص الامانة وخله اليشا يفشر علينه وعلى ساعة السودة وهو يلملم الاوراق بالظلمة وبالثيل ساعة اربعة الصبح !!
ومن ثم توسلت بصديق لارجاعهم للمنصور ،، ورحت اني ضربت عشرين شيش تكة مكحلة باللية الزينة ويه الكراث والرشاد والصمون الحار ، من مجيد الله يرحمه بفرع سينما النصر ولاكمل احتفالي لشروق شمس تموز!!
وبقه الشعب مرتاح وسعيد ومتونس شيبا وشبابا لليوم !!! حرگ العمر والامة كلها بشعب مرتاح !!
الف رحمة عليه.
تحياتي لكل المرتاحين والسعداء فور ايڤر !!!!!!! وللابد