جيمس بوند ٠٠٧ - العراقي قاهر المستحيل !

التفاصيل

تم إنشاءه بتاريخ الجمعة, 01 آذار/مارس 2019 09:48

كتب بواسطة: سيف الدين الألوسي

                        سيف الدين الألوسي

جيمس بوند ٠٠٧- العراقي قاهر المستحيل !

في فيلم دايموندز آر فورايڤر ، للبطل جيمس بوند او العميل ٠٠٧ ، والذي ميوكف شي كدامه ولا يعصى عليه شي ،،، وعنده خلگ يقره الغزال رغم الاخطار ويروح بيها وعلى الزلم ميخليها !! ،،، فيدخل مع الحسناء الغنوج الى غرفة الاوتيل او طولت الخيل ليمارس الفاحشة بنص العركه ، ووروره بحزامه وحسب المقتضيات ،، وووووووو يتسلق مداخن الفنادق ويتعلق بالحبال وفوك المصاعد ،، دون ان يتوسخ قاطه السموكنغ الاسود ولا تنعوج الفيونكه مالته اللابسها على ثوب ابيض مغسول بچويت ، ناصع البياض ، يبقى نظيف مثل الورد رغم الصعاب والمغامرات ،، وليدخل من السطح الى الحفلة مجكنم مبردغ مرتب ،،وخال ريحة اولد سبايس و ليفتن النساء ورغم انه كان معلك فوك ناطحة السحاب قبل دقايق !! ومثل حنقباز السيركس !!!

المهم في هذا الفيلم ان السيد بوند جان ديسوق سيارة فورد موستانغ حمره مال صاحبته ، بعدها بالباكيت موديل ١٩٦٨ ،، حادتهم ٣٠٠ سيارة شرطة بلاس فيغاس لانه دخل منشأة عسكرية لبحوث الفضاء ، ولعب بيهم چقه وشبر ،، يشبر ويچق سيارة شرطة ،، يشبر ويجق !!! ،، الى ان حاصروه وفات بدرب ضيق ديد اند ميطلع ،،، تعرفون شسوه جيمس ابو الغيره ؟؟؟ گال لصاحبته دنگري جوه الدشبول شويه !! ، وهو كفخهلها بنزين للموستانغ وصعد رمبة ، وبقى يسوق السيارة كاز على چرخين لا طره ولا كتبه ، الى ان طلع من الدربونة ام عرض متر !!! وفلت من الشرطة والامة كلها تدور وراه !!،، وبوجه راح للاوتيل ويه الاوخ وغسلوا بالگبه وما اكمل الباقي !!!! وبقت تتواله عليه المشاكل من الاعداء وساعة يسوق سيارة رواد الفضاء على القمر وساعة ينزل بالبراشوت مختفي بالچيس !! دمرهم ،،وهو لوتي يطلع منها كل مرة ، ووتخلص وصفى شكو ذنب للاستعمار وخائن ومرتزق عميل !! وبتك ايد !!!! ،، وبعدين صفه هو والاوخ مالته ،مرتاح برحلة للكاريبي بالباخرة وجناح فخم من تكريم المخابرات البريطانية والاميركية !!!،، ولخدماته في تدمير قمر اصطناعي يستعمل الليزر للاذية،، و من صناعة اعداء الانسانية هذوله الدماغسزية،،،!!!
هسه احنه بالعراق ينرادلنه واحد اخو خيته ،يسوق سيارتنه كاز على جرخين ،، يعرف مصلحة وطنه وبلده ويخاف عليه ، حتى يخلصنه من المشاكل والمطبات من ١٦ سنة واللي مندري منين تجينه !!! اشو داير حبل شادين سنونهم ومكزكزين علينه ! منعرف شمسويلهم العراقيين !! ،، وبعد ان ترك سيارتنه سايقها السابق بليه بريك واستيرن وبوب وشبابيج قبل ذلك ، وخلاها وحدها تروط مثل الواحد المتيه صول جعابه !!!!!!!!!
شوكت رح يجي ابو جاسم لر بوند للعراق ومهما يكون ليستعمل مهاراته في كل شئ لنهضته وبعد غيبوبته التي طالت !! ،، بس الفقهاء بالعلم ،. يدرون ،، انكل سام وانكل ابو ناجي وما بينهما !!!!!!!!!
تحياتي للجميع .