رحلة باريس - سان فرانسيسكو !! تجربة مرة !!!

التفاصيل

تم إنشاءه بتاريخ الخميس, 28 آذار/مارس 2019 10:17

كتب بواسطة: سيف الدين الألوسي

                        سيف الدين الألوسي

رحلة باريس - سان فرانسيسكو !! تجربة مرة !!!

بعد سنة ٢٠١٠ ولغاية سنة ٢٠١٤ كنت اذهب بزيارات منتظمة من محل سكني في خليج سان فرانسيسكو ، ولمرتين بالسنة الى عمان ، وكل زيارة لثلاثة اشهر ، وذلك للعناية بوالدي رحمه الله والذي كنت معه كصديق ايضا وليس كأبن فقط ،،، وخصوصا وقد تردت صحته للاسف ،، الا ان رجعت لاقيم معه سنة ٢٠١٣ ولحين عودتنا الى بغداد ووفاته بها وحسب وصيته لي ، وبعد اصابته بالمرض اللعين السرطان . رحمه تعالى بواسع رحمته واسكنه فسيح جناته .
كنت اتي من سان فرانسيسكو الى شيكاغو واستلم جنطتي في عمان بعد شحنها من سان فرانسيسكو ،، ولاركب الاردنية من شيكاغو لعمان مباشرة ليلا ، ولاخذ نومة تستغرق كم ساعة وبعد لط قليلا من شربت الرمان المختوم او عصير الشعير !!!! وفي رحلة تستغرق يوما كاملا ٢٤ ساعة منها ١٦ ساعة طيران !!
ارجع لسالفتنه ،، في حجز الرجوع احجز من عمان على الفرنسية او البريتش ايرويز ، وقبلها اللوفتهانزا ،،، وذلك حتى اشحن الغراض من عمان وانزل باميركا مباشرة في سان فرانسيسكو ودائما تكون متعبة واطول من القدوم لمروري ترانزيت في شارل ديغول المطار الباريسي الغير ناطق بغير الفرنسية او بهيثرو لندن او فرانكفورت ،، وحسب الاسعار والرخص !!
طبعا الخطوط الاوروبية كلها ، ليست بمستواها مثل ما كانت بالستينيات والسبعينيات وحتى معظم خطوط العالم رجعت كللي ليوره وبعد ان كان السفر متعة وطقوس ، وللفائدة المالية وقلة التنافس بسبب زخم المسافرين ،، اللوفتهانزا تنطي وجبة ..... وحدة لو لازانيا لو دجاج مگحف او سمچ جري مكطن !! وبعدين يقشمرونه بالجرزات والعصيان المملحة و لمدة ١٢ ساعة من فرنكفورت الى سان فرانسيسكو !!
البريتش ايرويز بطل واين صغير لو بيرة لو قنداغ ،، ووجبتين مال مكادي وحدة تمن وكاري ودجاج زفر لو ميت و لحم هندي وتمن ،، ووجبة اخرى للمجاملة ، سندويجة جبن وسلامي لو (تركي او فسيفس ) وجبن وجاي وجذب !!
اير فرانس الفرنسية وكنت راجع عليها للمرة الثانية والاخيرة ما دمت حيا ، والتوبة اذا اركبها بعد !!! تجيب اكل يلعب النفس على الغدة ، دجاج مجولك وزفر فوكاه صلصة فرنسية مليانة ثوم ... ،، يلعب النفس ، وشوية صمون فرنسي بالسلة يوزعوه ، اخذ ثلاث صمونات واتغده صمون وزبد ،، وبعد ستة ساعات يجيبون الوجبة الثانية ، لو روبيان فضايل مال اسواق ، لو محار مع صلصة بالثوم وما اعرف شنو وشوية تمن بالبخار ،، وزبد وصمون فرنسي بايت !!
المهم اني احجز الكرسي بالانترنت ودائما يم الشباك مثل الجهال !! جلست بجنبي صدفة فتاة عراقية بعمر ابنتي وصديقتها وكانت تدرس لتكملة الكلية في عمان والالتحاق بعائلتها المهاجرة في خليج سان فرانسيسكو ،، المضيفة الفرنسية سمراء طولها ١٩٥سم وحذائها ٤٦ اذا مو٤٨ ،، تبتسم لنا وانا ابتسم ،، وخصوصا عندما اتكلم مع الابنة العراقية بالعربي ،، كلتلها لابنتي العراقية ، بجنبي ،، عندي صديق حباية ومفشوگه يشبه هذه المضيفة ، چان يلعب دفاع يمنه ، ويلعب سلة بس چان يلبس ٤٤ وهاية تلبس ٤٨ !! وضحكنا والمضيفة تضحك !!
ثم جلبت طبق الروبيان والمحار لي وچان جامد نست ان تضعه في مايكرويڤ الطيارة ، ولكوني جوعان جدا ، فلطيته وسويت تشريب محار وصلصة ويه الصمون البايت !!! المهم ،، وره نص ساعة ، كضيت بقية السفرة والفترة لحين نزولنا بطهارة الطيارة واسهال وزواع ،، وطلع الاكل زقنبوت وبقيت متقولج اسبوع وراها بسبب التسمم بالمحار !! ،، ومن ده انزل قالت لي المضيفة أم ذراعين كولت اهل الزوالي ،، انا اعرف عربي شوية ، بابا من المغريب وماما من السنغال ،، هابي جيرني بروذر !! گلتلها ، انكس جيرني او رحلة بحياتي ،، ومن ساعة السودة (نواراو نواغ بالفرنسي كلوك ) ،،، وبس لا خلتلي زرنيخ بالاكل من سمعت ده احچي عليها واضحك !!!
والتوبة اذا اركب اير فرانس بعد !!! لو اعرف اعبر المحيط سبح !!!