الحياة في أميركا للشياب الحايرين مثلي !!!

التفاصيل

تم إنشاءه بتاريخ السبت, 15 حزيران/يونيو 2019 07:35

كتب بواسطة: سيف الدين الألوسي

                        سيف الدين الألوسي

الحياة في أميركا للشياب الحايرين مثلي !!!

١- تگعد الصبح تصعد الحفيد للباص .
٢- ترجع تسوي گهوة زينة وتشربها وتطلع بره ويه ماغ الگهوة وباكيت الجگاير لو للگراج لو للحديقة تدخن !!! والدنيا باردة ،، المهم التدخين داخل البيت من المحظورات حظرا باتا !!!
٣- الشباب كلهم بالشغل ، تبقه انت تفتر بالبيت مثل مفتش عام الوزارة المصاب بالقلق المزمن !! ،، تگلب التلفزيون يطلعلك برنامج سياسي عراقي مطلع فد واحد منتهي الاكسباير ديت مالته مثل البلاستك المعاد ، ولازگ بالسياسة لو ترجع الى روتانا زمان وتتفرج فريد وهو يحرگ دمه على هند رستم وثنينهم يعوون على حظهم المصخم مثل البوم ،، وتصير كآبة وتطلع بالحديقة ويحودك جلب الجيران وتگلله ،، ولك بوبي اني احبك واحب الچلاب وعندي چلب حباب ببغداد وبزونه روعة اسمها طروب ،، تبرد اعصاب الچلب ويصير صديقك !! ويگلك سوري !!
٤- ترجع تنتظر الحفيد ومن يوصل الباص تستقبله استقبال الابطال !! ،، وسايقة الباص تقول هلو جدو ،،، ثبرني ثبر بجدو ! ، ار يو جدو ؟؟، يمكن عبالهم اسمي جدو !!
٥- ترجع تتغده ويه بنتك والاحفاد وكل ساعة تطلع تدخن جگارة بالشارع مثل الارتيستات وترجع بعدين تاكل قمردين وبسكت !!
٦- يرجع الشباب من الشغل ، وبعد ان اخذت نومة صغيرة الظهر طلعت زقنبوت من وره الاحفاد ،، وواحد منهم ييجي يدغدغك وانت نايم واللاخ يضربك على بطنك ،، وتگعد من النوم مسطور بالف سطرة !!
٧- المغرب ، تطلع للحديقة تحچي ويه السنجاب المخرف ، مواضيع الساعة وتفتح قوطية بيرة وجگارة ،، وبعدين يهجم عليك البگ والبرغش وتنسحب الى الداخل تجر ذيول الخيبة والهزيمة والعار !! ،، وتكمل زقنبوتك وسط هوسة الاحفاد !!
٨- بالعشرة ونص تاكل لگمه وتفوت .... وتنام ،، لان المنطقة كلها نايمة ودير بالك ...... ليفز الجيران لو ابو بريص مختار المحلة ، وتبتلي !!
٩- تكرر هذه الوصفة يوميا لكل السكان ،،،
١٠- من طاح حظه لهذا العمر البومه وچ الحصان المنشول لولي العهد لباجي ليزا !!!
تحياتي للجميع من بلاد العالم الجديد المحير للعباد !!!